Read Ndebele-IBhayibhili Elingcwele 2006 Unumeri 23 Bible Online

Unumeri 23 - Ndebele-IBhayibhili Elingcwele 2006 bible

Unumeri 23

¹UBalami wasesithi kuBalaki: Ngakhela lapha amalathi ayisikhombisa, ungilungisele lapha amajongosi ayisikhombisa lenqama eziyisikhombisa.

²UBalaki wenza njengokutsho kukaBalami; uBalaki loBalami basebenikela ku lelo lalelo ilathi ijongosi lenqama.

³UBalami wasesithi kuBalaki: Mana emnikelweni wakho wokutshiswa, ngizahamba mina; mhlawumbe i Nkosi izafika ukungihlangabeza; lento ezangitshengisa yona ngizakutshela. Wasesiya endaweni ephakemeyo.

⁴UNkulunkulu wasehlangana loBalami; wasesithi kuye: Sengilungise amalathi ayisikhombisa, nganikela ku lelo lalelo ilathi ijongosi lenqama.

⁵I Nkosi yasifaka ilizwi emlonyeni kaBalami, yathi: Buyela kuBalaki, ukhulume kanje.

⁶Wasebuyela kuye, khangela-ke, wayemi emnikelweni wakhe wokutshiswa, yena lazo zonke iziphathamandla zakoMowabi.

⁷Wasephakamisa umzekeliso wakhe, wathi: UBalaki, inkosi yakoMowabi, ungilandile eSiriya, ezintabeni zempumalanga wathi: Woza, ungiqalekisele uJakobe, woza, umthuke uIsrayeli.

⁸Ngingamqalekisa njani uNkulunkulu anga m qalekisiyo? Kumbe ngingamthuka njani i Nkosi enga m thukanga?

⁹Ngoba ngisengqongeni yamadwala ngiyambona, ngisemaqaqeni ngiyamkhangela. Khangela, abantu bazahlala bodwa, kabayikubalelwa phakathi kwezizwe.

¹⁰Ngubani ongabala uthuli lukaJakobe, lenani lengxenye yesine kaIsrayeli? Umphefumulo wami kawufe ukufa kwabalungileyo, lokuphela kwami kube njengokwakhe!

¹¹UBalaki wasesithi kuBalami: Wenzeni kimi? Ngikuthethe ukuze uqalekise izitha zami, kodwa khangela, u zi busisile loku zi busisa.

¹²Wasephendula wathi: Lokho i Nkosi ekufaka emlonyeni wami, kakumelanga ngiqaphele yini ukukukhuluma?

¹³UBalaki wasesithi kuye: Ake uze lami siye kwenye indawo lapho ozababona khona; uzabona ukucina kwabo kuphela, ungaboni bonke; njalo ungiqalekisele bona ulapho.

¹⁴Njalo wamthatha wamusa ensimini yeZofimu, engqongeni yePisiga; wakha amalathi ayisikhombisa, wanikela ijongosi lenqama phezu kwa lelo lalelo ilathi.

¹⁵Wasesithi kuBalaki: Mana lapha emnikelweni wakho wokutshiswa, njalo mina ngizahlangana layo laphayana.

¹⁶I Nkosi yasihlangana loBalami, yafaka ilizwi emlonyeni wakhe, yathi: Buyela kuBalaki, ukhulume kanje.

¹⁷Esefikile kuye, khangela-ke wema emnikelweni wakhe wokutshiswa leziphathamandla zakoMowabi zilaye. UBalaki wasesithi kuye: I Nkosi itheni?

¹⁸Wasephakamisa umfanekiso wakhe wathi: Sukuma, Balaki, uzwe, ubeke indlebe, ndodana kaZipori.

¹⁹UNkulunkulu kasumuntu ukuthi aqambe amanga, loba indodana yomuntu ukuthi azisole. Utshilo, kanti kayikukwenza? Kumbe ukhulumile, kanti kayikukumisa?

²⁰Khangela, ngemukele ukuthi ngibusise; yebo, ubusisile, njalo ngingeke ngikuguqule.

²¹Kakhangelanga ububi kuJakobe, kabonanga isiphambeko kuIsrayeli. I Nkosi uNkulunkulu wakhe ilaye, lesimemezelo senkosi siphakathi kwakhe.

²²UNkulunkulu wabakhupha eGibhithe, ulokunjengamandla enyathi.

²³Isibili kakulamlingo ongamelana loJakobe, loba ukuvumisa okungamelana loIsrayeli. Ngalesisikhathi kuzatshiwo ngoJakobe langoIsrayeli ukuthi uNkulunkulu akwenzileyo !

²⁴Khangela, abantu bazasukuma njengesilwane esisikazi, bazisukumise njengesilwane; kabalali baze badle impango, njalo banathe igazi lababuleweyo.

²⁵UBalaki wasesithi kuBalami: Futhi ungabaqalekisi lokubaqalekisa, njalo ungababusisi lokubabusisa.

²⁶Kodwa uBalami waphendula wathi kuBalaki: Kangikutshelanga yini ngisithi: Konke i Nkosi ekutshoyo, lokhu ngizakwenza?

²⁷UBalaki wasesithi kuBalami: Ake uze, ngizakusa kwenye indawo; mhlawumbe kungaqonda emehlweni kaNkulunkulu ukuthi ungiqalekisele bona ulapho.

²⁸UBalaki wamthatha wamusa uBalami engqongeni yePeyori ekhangele ngasenkangala.

²⁹UBalami wasesithi kuBalaki: Ngakhela lapha amalathi ayisikhombisa, ungilungisele lapha amajongosi ayisikhombisa lenqama eziyisikhombisa.

³⁰UBalaki wasesenza njengokutsho kukaBalami, wanikela ijongosi lenqama ku lelo lalelo ilathi.