Read Ndebele-IBhayibhili Elingcwele 2006 Unumeri 24 Bible Online

Unumeri 24 - Ndebele-IBhayibhili Elingcwele 2006 bible

Unumeri 24

¹UBalami esebonile ukuthi kuhle emehlweni e Nkosi ukubusisa uIsrayeli, kahambanga njengezinye izikhathi ukuyadinga imilingo; kodwa wakhangelisa ubuso bakhe enkangala.

²Kwathi uBalami ephakamisa amehlo akhe, wabona uIsrayeli ehlezi ngokwezizwe zakhe, loMoya kaNkulunkulu wayephezu kwakhe.

³Wasephakamisa umfanekiso wakhe wathi: UBalami indodana kaBeyori uthi, lendoda elamehlo avulekileyo ithi,

⁴uthi ozwayo amazwi kaNkulunkulu, obonayo umbono kaSomandla, esiwa, njalo kuvuleke amehlo.

⁵Mahle kangakanani amathente akho, Jakobe, amakhaya akho, Israyeli!

⁶Njengezigodi zisabalele, njengezivande ngasemfuleni, njengezinhlaba i Nkosi ezihlanyeleyo, njengezihlahla zomsedari ngasemanzini !

⁷Amanzi azageleza evela embizeni zakhe, lenhlanyelo yakhe izakuba semanzini amanengi, lenkosi yakhe izakuba nkulu kuloAgagi, lombuso wakhe uzaphakama.

⁸UNkulunkulu wamkhupha eGibhithe, ulokunjengamandla enyathi, uzakudla izizwe, izitha zakhe, njalo uzakwephula amathambo azo, njalo azitshoke ngemitshoko yakhe.

⁹Waqutha, walala phansi njengesilwane, lanjengesilwane esisikazi; ngubani ozamvusa? Okubusisayo abusiswe, lokuqalekisayo aqalekiswe!

¹⁰Njalo ulaka lukaBalaki lwavuthela uBalami, waqakeza izandla zakhe, uBalaki wasesithi kuBalami: Ngikubize ukuze uqalekise izitha zami, kodwa khangela, uzibusisile lokuzibusisa okwalezizikhathi ezintathu.

¹¹Khathesi-ke zibalekele uye endaweni yakho. Bengithe ngizakuhlonipha ngodumo, kodwa khangela, i Nkosi ikuvimbile kudumo.

¹²UBalami wasesithi kuBalaki: Kangikhulumanga yini lakuzithunywa obuzithume kimi ngisithi:

¹³Uba uBalaki ebezangipha indlu yakhe igcwele isiliva legolide, bengingayikweqa umlayo we Nkosi, ukwenza okuhle kumbe okubi okwenhliziyo yami; lokho i Nkosi ekutshoyo yilokho engizakukhuluma?

¹⁴Khathesi-ke, khangela, ngiya ebantwini bakithi; woza ngikutshele ukuthi lababantu bazakwenzani ebantwini bakini ensukwini zokucina.

¹⁵Wasephakamisa umfanekiso wakhe wathi: UBalami indodana kaBeyori uthi, lendoda elamehlo avulekileyo ithi,

¹⁶uthi ozwayo amazwi kaNkulunkulu, lowazi ulwazi loPhezukonke, obonayo umbono kaSomandla, esiwa, njalo kuvuleke amehlo.

¹⁷Ngizambona, kodwa hatshi khathesi, ngizamkhangela, kodwa kungeseduze; kuzavela inkanyezi kuJakobe, lentonga yobukhosi izavuka koIsrayeli, itshaye amagumbi akoMowabi, njalo ichithe bonke abantwana bakaShethi.

¹⁸Njalo uEdoma uzakuba yimfuyo, loSeyiri abe yimfuyo yezitha zakhe, kodwa uIsrayeli uzakwenza ngobuqhawe,

¹⁹kuzavela-ke koJakobe umbusi, njalo uzabhubhisa oseleyo emzini.

²⁰Esebone uAmaleki, waphakamisa umfanekiso wakhe wathi: UAmaleki wayengowokuqala wezizwe, kodwa ukucina kwakhe kuyikubhubha okwesikhathi sonke.

²¹Esebone amaKeni, waphakamisa umfanekiso wakhe wathi: Iqinile indlu yakho, isidleke sakho usimise edwaleni.

²²Kanti-ke uKhayini uzachithwa, aze akuthumbe uAshuri.

²³Wasephakamisa umfanekiso wakhe wathi: Maye, ngubani ozaphila nxa uNkulunkulu esenza lokhu?

²⁴Imikhumbi izavela ekhunjini lweKitimi, ihluphe uAshuri, ihluphe uEberi; njalo laye uzabhubha okwesikhathi sonke.

²⁵UBalami wasesukuma wahamba wabuyela endaweni yakhe; loBalaki laye wahamba ngendlela yakhe.