Read Ndebele-IBhayibhili Elingcwele 2006 Unumeri 25 Bible Online

Unumeri 25 - Ndebele-IBhayibhili Elingcwele 2006 bible

Unumeri 25

¹UIsrayeli wasehlala eShithimi. Abantu basebeqala ukuphinga lamadodakazi akoMowabi.

²Asebabizela abantu emihlatshelweni yabonkulunkulu bawo, labantu badla, bakhothamela onkulunkulu bawo.

³UIsrayeli wasezihlanganisa loBhali-Peyori; lolaka lwe Nkosi lwamvuthela uIsrayeli.

⁴I Nkosi yasisithi kuMozisi: Thatha zonke inhloko zabantu, uziphanyeke phambi kwe Nkosi maqondana lelanga, ukuze ulaka lwe Nkosi oluvuthayo lubuye lusuke koIsrayeli.

⁵UMozisi wasesithi kubahluleli bakoIsrayeli: Bulalani, kube ngulowo lalowo amadoda akhe ababezihlanganise loBhali-Peyori.

⁶Khangela-ke, umuntu wabantwana bakoIsrayeli weza waletha kubafowabo umMidiyanikazi phambi kwamehlo kaMozisi laphambi kwamehlo enhlangano yonke yabantwana bakoIsrayeli, besakhala inyembezi emnyango wethente lenhlangano.

⁷Kwathi uPhinehasi, indodana kaEleyazare, indodana kaAroni umpristi, ekubona, wasukuma ephuma phakathi kwenhlangano, wathatha umkhonto esandleni sakhe,

⁸waseyilandela indoda yakoIsrayeli ethenteni, wabagwaza bobabili, indoda yakoIsrayeli lowesifazana esiswini sakhe. Yasimiswa inhlupheko kubantwana bakoIsrayeli.

⁹Lalabo abafayo ngenhlupheko babeyizinkulungwane ezingamatshumi amabili lane.

¹⁰I Nkosi yasikhuluma kuMozisi isithi:

¹¹UPhinehasi, indodana kaEleyazare indodana kaAroni umpristi, uphendule ulaka lwami lusuka ebantwaneni bakoIsrayeli, ngoba wayelobukhwele ngobukhwele bami phakathi kwabo; ngakho kangibaqothulanga abantwana bakoIsrayeli ngobukhwele bami.

¹²Ngakho utsho: Khangela, ngiyamnika isivumelwano sami sokuthula.

¹³Njalo uzakuba laso, lenzalo yakhe emva kwakhe, isivumelwano sobupristi obulaphakade, ngenxa yokuthi elobukhwele ngoNkulunkulu wakhe, wabenzela abantwana bakoIsrayeli inhlawulo yokuthula.

¹⁴Lebizo lendoda yakoIsrayeli eyatshaywayo, eyatshaywa kanye lomMidiyanikazi, lalinguZimri indodana kaSalu, isiphathamandla sendlu kayise phakathi kwabakoSimeyoni.

¹⁵Ibizo lowesifazana owatshaywayo, umMidiyanikazi, lalinguKozibi indodakazi kaZuri, owayeyinhloko yesizwe sendlu kayise eMidiyani.

¹⁶I Nkosi yasikhuluma kuMozisi isithi:

¹⁷Phathani amaMidiyani njengezitha, liwatshaye;

¹⁸ngoba aliphethe njengezitha ngobuqili bawo, alikhohlisa ngodaba lukaPeyori langodaba lukaKozibi, indodakazi yesiphathamandla seMidiyani, udadewabo, owatshaywa ngosuku lwenhlupheko ngenxa yodaba lukaPeyori.