Read Ndebele-IBhayibhili Elingcwele 2006 Unumeri 27 Bible Online

Unumeri 27 - Ndebele-IBhayibhili Elingcwele 2006 bible

Unumeri 27

¹Kwasekusondela amadodakazi kaZelofehadi indodana kaHeferi indodana kaGileyadi indodana kaMakiri indodana kaManase owensendo zikaManase indodana kaJosefa; njalo la ngamabizo amadodakazi akhe: UMahla, uNowa, loHogila, loMilka, loTiriza.

²Asesima phambi kukaMozisi, laphambi kukaEleyazare umpristi, laphambi kweziphathamandla, lenhlangano yonke, emnyango wethente lenhlangano, esithi:

³Ubaba wafela enkangala; kodwa yena wayengekho phakathi kweqembu lalabo ababuthana ukumelana le Nkosi, eqenjini likaKora, kodwa wafa esonweni sakhe, wayengelamadodana.

⁴Kungani ibizo likababa likhutshwe phakathi kosendo lwakhe ngoba engelandodana? Siphe ilifa phakathi kwabafowabo bakababa.

⁵UMozisi waseluletha udaba lwawo phambi kwe Nkosi.

⁶I Nkosi yasikhuluma kuMozisi isithi:

⁷Amadodakazi kaZelofehadi akhulume iqiniso; uzawanika lokuwanika isabelo selifa phakathi kwabafowabo bakayise; uzadlulisela kuwo ilifa likayise.

⁸Njalo uzakhuluma ebantwaneni bakoIsrayeli usithi: Uba indoda isifa, ingelandodana, lizadlulisela ilifa layo kundodakazi yayo.

⁹Njalo uba ingelandodakazi, lizanika abafowabo ilifa layo.

¹⁰Uba-ke ingelabafowabo, lizanika ilifa layo kubafowabo bakayise.

¹¹Njalo uba uyise engelabafowabo, lizanika ilifa layo esihlotsheni sayo esiseduze layo sosendo lwayo, silidle. Njalo kuzakuba yisimiso sesahlulelo ebantwaneni bakoIsrayeli, njengokulaya kwe Nkosi kuMozisi.

¹²I Nkosi yasisithi kuMozisi: Yenyukela kule intaba yeAbarimi, ubone ilizwe engilinike abantwana bakoIsrayeli.

¹³Lapho usulibonile, lawe uzabuthelwa ebantwini bakini, njengoAroni umnewenu wabuthwa;

¹⁴njengokuba lavukela umlayo wami enkangala yeZini, ekuphikisaneni kwenhlangano, ukungingcwelisa phambi kwamehlo abo. La ngamanzi eMeriba eKadeshi enkangala yeZini.

¹⁵UMozisi wasekhuluma e Nkosi ni esithi:

¹⁶I Nkosi, uNkulunkulu wemimoya yenyama yonke, kayimise indoda enhlanganweni,

¹⁷engaphuma phambi kwabo, lengangena phambi kwabo, lengabakhokhela baphume, lengabangenisa, ukuze inhlangano ye Nkosi ingabi njengezimvu ezingelamelusi.

¹⁸I Nkosi yasisithi kuMozisi: Zithathele uJoshuwa indodana kaNuni, indoda okukuyo umoya, ubeke isandla sakho phezu kwayo,

¹⁹uyimise phambi kukaEleyazare umpristi laphambi kwenhlangano yonke, uyilaye phambi kwamehlo abo,

²⁰ubusubeka okodumo lwakho phezu kwayo, ukuze inhlangano yonke yabantwana bakoIsrayeli ilalele.

²¹Njalo izakuma phambi kukaEleyazare umpristi ozayibuzela njengokwesahlulelo sikaUrimi phambi kwe Nkosi; ngomlomo wayo bazaphuma, langomlomo wayo bazangena, yona labantwana bonke bakoIsrayeli kanye layo, ngitsho inhlangano yonke.

²²UMozisi wasesenza njengokulaya kwe Nkosi kuye. Wathatha uJoshuwa, wammisa phambi kukaEleyazare umpristi laphambi kwenhlangano yonke,

²³wabeka izandla zakhe phezu kwakhe, wamlaya, njengokukhuluma kwe Nkosi ngesandla sikaMozisi.