Read Ndebele-IBhayibhili Elingcwele 2006 Unumeri 32 Bible Online

Unumeri 32 - Ndebele-IBhayibhili Elingcwele 2006 bible

Unumeri 32

¹Mayelana labantwana bakoRubeni labantwana bakoGadi, babelenkomo ezinengi, ezinengi kakhulu. Sebebone ilizwe leJazeri lelizwe leGileyadi, khangela-ke, indawo yayiyindawo yenkomo.

²Ngakho abantwana bakoGadi labantwana bakoRubeni beza bakhuluma kuMozisi lakuEleyazare umpristi lakuziphathamandla zenhlangano, besithi:

³IAtarothi leDiboni leJazeri leNimra leHeshiboni leEleyale leSebamu leNebo leBeyoni,

⁴ilizwe i Nkosi eyalitshayayo phambi kwenhlangano yakoIsrayeli, liyilizwe lezinkomo; futhi izinceku zenu zilezinkomo.

⁵Basebesithi: Nxa sithole umusa emehlweni akho, ilizwe leli kaliphiwe inceku zakho libe yimfuyo; ungasichaphisi iJordani.

⁶UMozisi wasesithi ebantwaneni bakoGadi lebantwaneni bakoRubeni: Abafowenu bazakuya empini, lina-ke lihlale lapha yini?

⁷Njalo lizadaniselani inhliziyo yabantwana bakoIsrayeli ukuze bangachaphi ukuya elizweni i Nkosi ebanike lona?

⁸Benza njalo oyihlo mhla ngibathuma besuka eKadeshi-Bhaneya ukubona ilizwe.

⁹Ekuhambeni kwabo ukuya esihotsheni seEshikoli, balibona ilizwe, badanisa inhliziyo yabantwana bakoIsrayeli ukuze bangangeni elizweni i Nkosi eyayibanike lona.

¹⁰Ulaka lwe Nkosi lwaseluvutha ngalolusuku, yasifunga isithi:

¹¹Isibili kakho kumadoda enyuka esuka eGibhithe, kusukela koleminyaka engamatshumi amabili langaphezulu ozalibona ilizwe engalifungela uAbrahama, uIsaka loJakobe, ngoba kabangilandelanga ngokupheleleyo;

¹²ngaphandle kukaKalebi indodana kaJefune umKenizi, loJoshuwa indodana kaNuni, ngoba balandele i Nkosi ngokupheleleyo.

¹³Lolaka lwe Nkosi lwamvuthela uIsrayeli, yasibazulisa enkangala iminyaka engamatshumi amane, kwaze kwaphela isizukulwana sonke esasenze okubi emehlweni e Nkosi.

¹⁴Khangelani-ke, selivukile esikhundleni saboyihlo, inzalo yabantu abonayo, ukwandisa futhi intukuthelo ye Nkosi evuthela uIsrayeli.

¹⁵Uba liphenduka ekuyilandeleni, izaphinda njalo ibatshiye enkangala; njalo lizabhubhisa bonke lababantu.

¹⁶Basebesondela kuye bathi: Sizakwakha lapha izibaya zezifuyo zethu, lemizi yabantwanyana bethu;

¹⁷kodwa thina sizahloma siphangise phambi kwabantwana bakoIsrayeli, size sibafikise endaweni yabo, labantwanyana bethu bazahlala emizini evikelekileyo, ngenxa yabahlali belizwe.

¹⁸Kasiyikubuyela emizini yethu, abantwana bakoIsrayeli baze badle, ngulowo lalowo ilifa lakhe.

¹⁹Ngoba kasiyikudla ilifa kanye labo ngaphetsheya kweJordani langaphambili, ngoba ilifa lethu selehlele kithi nganeno kweJordani empumalanga.

²⁰UMozisi wasesithi kubo: Nxa lisenza linto, nxa lizahamba lihlomele impi phambi kwe Nkosi,

²¹beselichapha iJordani, wonke ohlomileyo kini, phambi kwe Nkosi, ize ixotshe izitha zayo phambi kwayo,

²²lelizwe lehliselwe phansi phambi kwe Nkosi, khona emva kwalokho lizabuya, lingabi lacala e Nkosi ni lakuIsrayeli; lalelilizwe lizakuba yilifa lenu phambi kwe Nkosi.

²³Kodwa nxa lingenzi njalo, khangelani lizabe lonile e Nkosi ni; ngakho yazini ukuthi isono senu sizalithola.

²⁴Zakheleni imizi yabantwanyana benu lezibaya zezimvu zenu, njalo yenzani lokho okuphume emlonyeni wenu.

²⁵Abantwana bakoGadi labantwana bakoRubeni basebekhuluma kuMozisi besithi: Izinceku zakho zizakwenza njengalokho inkosi yami ilaya.

²⁶Abantwanyana bethu, omkethu, izimvu zethu, lazo zonke izifuyo zethu kuzakuba lapho emizini yeGileyadi;

²⁷kodwa inceku zakho zizachapha, ngulowo lalowo ehlomele impi, phambi kukaJehova empini, njengokutsho kwenkosi yami.

²⁸UMozisi waselayezela ngabo kuEleyazare umpristi, loJoshuwa indodana kaNuni, lenhloko zaboyise zezizwe zabantwana bakoIsrayeli.

²⁹UMozisi wasesithi kubo: Nxa abantwana bakoGadi labantwana bakoRubeni bechapha lani iJordani, wonke ehlomele impi, phambi kwe Nkosi, lelizwe lisehliselwa phansi phambi kwenu, khona lizabanika ilizwe leGileyadi libe yimfuyo.

³⁰Kodwa uba bengachaphi lani behlomile, bazakuba lemfuyo phakathi kwenu elizweni leKhanani.

³¹Abantwana bakoGadi labantwana bakoRubeni basebephendula besithi: Lokhu i Nkosi esikutshilo kunceku zakho - sizakwenza njalo.

³²Thina sizachapha sihlomile phambi kwe Nkosi siye elizweni leKhanani, ukuze imfuyo yelifa lethu ibe ngeyethu nganeno kweJordani.

³³Njalo uMozisi wabanika, kubantwana bakoGadi lakubantwana bakoRubeni lakungxenye eyodwa kwezimbili yesizwe sakoManase, indodana kaJosefa, umbuso kaSihoni inkosi yamaAmori, lombuso kaOgi inkosi yeBashani, ilizwe lemizi yalo emingceleni, imizi yelizwe inhlangothi zonke.

³⁴Labantwana bakoGadi bakha iDiboni leAtarothi leAroweri

³⁵leAtirothi-Shofani leJazeri leJogibeha,

³⁶leBeti-Nimra leBeti-Harani, imizi evikelweyo, lezibaya zezimvu.

³⁷Labantwana bakoRubeni bakha iHeshiboni leEleyale leKiriyathayimi

³⁸leNebo leBhali-Meyoni (sekuguqulwe amabizo) leSibima; basebebiza amabizo emizi abayakhayo nga manye amabizo.

³⁹Labantwana bakoMakiri indodana kaManase baya eGileyadi, bayithumba, bawakhupha amaAmori emfuyweni yawo ayekuyo.

⁴⁰UMozisi wasenika uMakiri indodana kaManase iGileyadi, wasehlala kiyo.

⁴¹LoJayiri indodana kaManase wayathumba imizana yayo, wayibiza ngokuthi yiHavothi-Jayiri.

⁴²LoNoba wayathumba iKenathi, lemizana yayo, wayibiza ngokuthi yiNoba ngebizo lakhe.