Read Ndebele-IBhayibhili Elingcwele 2006 Unumeri 34 Bible Online

Unumeri 34 - Ndebele-IBhayibhili Elingcwele 2006 bible

Unumeri 34

¹I Nkosi yasikhuluma kuMozisi isithi:

²Laya abantwana bakoIsrayeli uthi kubo: Lapho lingena elizweni leKhanani, leli lizakuba yilizwe elizawela kini libe yilifa, ilizwe leKhanani, ngokwemingcele yalo.

³Legumbi lenu leningizimu lizakuba kusukela enkangala yeZini, enhlangothini zeEdoma. Njalo uzakuba ngumngcele wenu weningizimu kusukela ekucineni kolwandle lwetswayi empumalanga.

⁴Umngcele wenu uzajika uvela eningizimu usiya emqansweni weAkirabimi, wedlulele eZini; lokuphuma kwawo kuzavela eningizimu kuye eKadeshi-Bhaneya; uzaphuma uye eHazari-Adari, wedlulele eAzimoni.

⁵Lomngcele uzajika uvela eAzimoni uye esifuleni seGibhithe; lokuphuma kwawo kuzakuba selwandle.

⁶Mayelana lomngcele wentshonalanga, ulwandle olukhulu luzakuba ngumngcele wenu; lona luzakuba ngumngcele wenu ngentshonalanga.

⁷Lalokhu kuzakuba ngumngcele wenu wenyakatho: Kusukela elwandle olukhulu lizazidwebela intaba yeHori;

⁸kusukela entabeni yeHori lizadweba umngcele oya ekungeneni kweHamathi, lokuphuma komngcele kuye eZedadi.

⁹Lomngcele uzaphuma uye eZifroni, lokuphuma kwawo kuzakuba eHazari-Enani. Lo uzakuba ngumngcele wenu wenyakatho.

¹⁰Njalo lizazidwebela umngcele wenu wempumalanga kusukela eHazari-Enani kusiya eShefamu;

¹¹lomngcele uzakwehla uvela eShefamu uye eRibila empumalanga kweAyini, lomngcele wehle ufike eceleni kolwandle lweKinerethi ngempumalanga.

¹²Umngcele uzakwehlela-ke eJordani, lokuphuma kwawo kuzakuba solwandle lwetswayi. Leli lizakuba yilizwe lenu ngemingcele yalo inhlangothi zonke.

¹³UMozisi waselaya abantwana bakoIsrayeli esithi: Leli yilizwe elizakudla ilifa lalo ngenkatho, i Nkosi elaye ngalo ukulinika izizwe eziyisificamunwemunye lengxenye eyodwa kwezimbili yesizwe.

¹⁴Ngoba isizwe sabantwana bakoRubeni ngezindlu zaboyise, lesizwe sabantwana bakoGadi ngezindlu zaboyise zemukele, lengxenye eyodwa kwezimbili yesizwe sakoManase yemukele ilifa layo.

¹⁵Izizwe ezimbili lengxenye eyodwa kwezimbili yesizwe zemukele ilifa lazo nganeno kweJordani, eJeriko, empumalanga, lapho okuphuma khona ilanga.

¹⁶I Nkosi yasikhuluma kuMozisi isithi:

¹⁷La ngamabizo amadoda azalabela ilizwe libe yilifa: UEleyazare umpristi loJoshuwa indodana kaNuni.

¹⁸Njalo lizathatha isiphathamandla kuleso lalesosizwe ukwehlukanisa ilizwe libe yilifa.

¹⁹Lala ngamabizo amadoda: Esizweni sakoJuda, uKalebi indodana kaJefune.

²⁰Lesizweni sabantwana bakoSimeyoni, uShemuweli indodana kaAmihudi.

²¹Esizweni sakoBhenjamini, uElidadi indodana kaKisiloni.

²²Lesizweni sabantwana bakoDani, isiphathamandla uBuki indodana kaJogili.

²³Ebantwaneni bakoJosefa, esizweni sabantwana bakoManase, isiphathamandla uHaniyeli indodana kaEfodi.

²⁴Lesizweni sabantwana bakoEfrayimi, isiphathamandla uKemuweli indodana kaShifitani.

²⁵Lesizweni sabantwana bakoZebuluni, isiphathamandla uElizafani indodana kaParinaki.

²⁶Lesizweni sabantwana bakoIsakari, isiphathamandla uPalitiyeli indodana kaAzani.

²⁷Lesizweni sabantwana bakoAsheri, isiphathamandla uAhiyudi indodana kaShelomi.

²⁸Lesizweni sabantwana bakoNafithali, isiphathamandla uPedaheli indodana kaAmihudi.

²⁹Yibo labo i Nkosi eyabalaya ukwehlukanisela abantwana bakoIsrayeli ilifa elizweni leKhanani.