Read Ndebele-IBhayibhili Elingcwele 2006 Unumeri 5 Bible Online

Unumeri 5 - Ndebele-IBhayibhili Elingcwele 2006 bible

Unumeri 5

¹I Nkosi yasikhuluma kuMozisi isithi:

²Laya abantwana bakoIsrayeli ukuthi bakhuphe enkambeni wonke umlephero, laye wonke olokugobhoza, laye wonke ongcolileyo ngofileyo.

³Kusukela kowesilisa kusiya kowesifazana lizabakhupha, kuze kube ngaphandle kwenkamba lizabakhupha, ukuze bangangcolisi izinkamba zabo, engihlala phakathi kwazo.

⁴Abantwana bakoIsrayeli basebesenza njalo, babakhupha baze baba ngaphandle kwenkamba; njengokutsho kwe Nkosi kuMozisi, benza njalo abantwana bakoIsrayeli.

⁵I Nkosi yasikhuluma kuMozisi isithi:

⁶Tshono ebantwaneni bakoIsrayeli uthi: Indoda kumbe umfazi, uba besenza loba yisiphi isono somuntu besenza ngokungathembeki, isenzo sokungathembeki e Nkosi ni, lowomuntu ulecala.

⁷Njalo bazavuma isono sabo abasenzileyo, abesehlawula icala lakhe ngokupheleleyo kwalo, engezelele phezu kwalo ingxenye yesihlanu yalo, anike lowo alecala kuye.

⁸Kodwa uba lowomuntu engelamhlengi oyisihlobo okungahlawulwa kuso icala, icala lizahlawulwa e Nkosi ni kube ngokompristi, ngaphandle kwenqama yenhlawulo yokuthula, azamenzela inhlawulo yokuthula ngayo.

⁹Lawo wonke umnikelo wazo zonke izinto ezingcwele zabantwana bakoIsrayeli, abaziletha kumpristi, uzakuba ngowakhe.

¹⁰Lezinto ezingcwele zawo wonke umuntu zizakuba ngezakhe; lokhu loba ngubani akunika umpristi kuzakuba ngokwakhe.

¹¹I Nkosi yasikhuluma kuMozisi isithi:

¹²Tshono ebantwaneni bakoIsrayeli uthi kubo: Loba yiyiphi indoda, uba umkayo eduha, ngokungathembeki kuyo enze isenzo sokungathembeki,

¹³lendoda ilala laye ngobudoda bokuhlangana, njalo kufihlakale emehlweni endoda yakhe, angabonwa, yena ungcolisiwe, njalo kungelamfakazi omelana laye, futhi yena engabanjwanga,

¹⁴lomoya wobukhwele ufike phezu kwayo, futhi ibe lobukhwele ngomkayo, njalo yena engcolisiwe, loba umoya wobukhwele ufike phezu kwayo, futhi ibe lobukhwele ngomkayo, lanxa yena engangcolanga,

¹⁵indoda izaletha umkayo kumpristi, imlethele umnikelo wakhe, ingxenye yetshumi ye-efa* lempuphu yebhali*; kayiyikuthela amafutha kuyo, ingabeki inhlaka phezu kwayo, ngoba kungumnikelo wokudla wobukhwele, umnikelo wokudla wesikhumbuzo, ukukhumbuza ububi.

¹⁶Umpristi uzasondeza-ke owesifazana, ammise phambi kwe Nkosi.

¹⁷Umpristi athathe amanzi angcwele embizeni yebumba, lompristi athathe okothuli oluphansi ethabhanekeleni, akufake emanzini.

¹⁸Umpristi uzamisa owesifazana phambi kwe Nkosi, athukulule inwele zekhanda lowesifazana, abeke ezandleni zakhe umnikelo wokudla wokukhumbuza, ongumnikelo wokudla wobukhwele. Lesandleni sompristi kuzakuba lamanzi ababayo aletha isiqalekiso.

¹⁹Umpristi uzamfungisa-ke, athi kowesifazana: Uba kungelandoda elele lawe, njalo uba ungaduhelanga ekungcoleni, uphansi kwendoda yakho, khululeka emanzini la ababayo aletha isiqalekiso.

²⁰Kodwa wena, uba uduhile, uphansi kwendoda yakho, futhi uba ungcolisiwe, lendoda yahlangana lawe, ngaphandle kwendoda yakho,

²¹umpristi amfungise owesifazana ngesifungo sesiqalekiso, umpristi athi kuye: I Nkosi kayikwenze ube yisiqalekiso lesifungo phakathi kwabantu bakini, lapho i Nkosi isenza ithangazi lakho liwe, lesisu sakho sikhukhumale.

²²Lamanzi la aletha isiqalekiso kawangene emibilini yakho, akwenze isisu sikhukhumale lokwenza ithangazi liwe. Owesifazana abesesithi: Ameni, Ameni.

²³Umpristi uzabhala-ke iziqalekiso lezi egwalweni, azesule ngamanzi ababayo,

²⁴anathise owesifazana amanzi ababayo aletha isiqalekiso, lamanzi aletha isiqalekiso azangena kuye, abe ngokubabayo.

²⁵Umpristi uzathatha-ke esandleni sowesifazana umnikelo wokudla wobukhwele, awuzunguze umnikelo wokudla phambi kwe Nkosi, awusondeze elathini,

²⁶umpristi acuphe isandla esigcweleyo somnikelo wokudla, sibe yisikhumbuzo sawo, asitshise elathini, lemva kwalokho amnathise owesifazana amanzi.

²⁷Esemnathisile amanzi, kuzakuthi uba engcolile, esenze ngokungathembeki isenzo sokungathembeki endodeni yakhe, amanzi aletha isiqalekiso esengenile kuye abe ngokubabayo, isisu sakhe sizakhukhumala lethangazi lakhe liwe, lowesifazana uzakuba yisiqalekiso phakathi kwabantu bakibo.

²⁸Kodwa uba owesifazana engangcolanga, kodwa ehlambulukile, uzakhululeka, uzakwemukela inhlanyelo.

²⁹Lo ngumlayo wobukhwele, lapho umfazi eduha ephansi kwendoda yakhe, abesengcoliswa,

³⁰kumbe indoda, uba umoya wobukhwele ufika phezu kwayo ibe lobukhwele ngomkayo; immise owesifazana phambi kwe Nkosi, lompristi enze kuye umlayo lo wonke.

³¹Indoda izakhululeka-ke ecaleni, kodwa lowo owesifazana uzathwala icala lakhe.