Read Ndebele-IBhayibhili Elingcwele 2006 Umikha 6 Bible Online

Umikha 6 - Ndebele-IBhayibhili Elingcwele 2006 bible

Umikha 6

¹Ake lizwe okutshiwo yi Nkosi: Sukumani, lwisana lezintaba, lamaqaqa alizwe ilizwi lenu.

²Zwanini ukuphikisa kwe Nkosi, lina zintaba, lani zisekelo zomhlaba ezilamandla; ngoba i Nkosi iphikisana labantu bayo, izamelana loIsrayeli.

³Lina bantu bami, ngenzeni kini? Kuyini engilikhathaze ngakho? Ngiphendulani.

⁴Ngoba ngalikhupha elizweni leGibhithe, ngalihlenga endaweni yobugqili; ngathuma oMozisi loAroni loMiriyamu ukuze balikhokhele.

⁵Bantu bami, ake likhumbule ugobe lukaBalaki inkosi yakoMowabi, lokuthi uBalami indodana kaBeyori wamphendula njani, likhumbule lalokho okwenzekayo kusukela eShitimi kwaze kwaba seGiligali, ukuze lazi izenzo ezilungileyo ze Nkosi.

⁶Ngizakuza ngiphetheni e Nkosi ni, ngikhothame phambi kukaNkulunkulu ophezulu yini? Ngizakuza kuyo ngiphethe umnikelo wokutshiswa, ngilamathole alomnyaka owodwa yini?

⁷I Nkosi izakweneliswa zinqama eziyinkulungwane, lezinkulungwane ezilitshumi zemifula yamafutha yini? Ngizanikela izibulo lami ngenxa yesiphambeko sami, isithelo sesizalo sami ngenxa yesono senhliziyo yami yini?

⁸Ikutshengisile, muntu, okuhle; le Nkosi ifunani kuwe, kodwa ukwenza ukulunga, lokuthanda umusa, lokuhamba ngokuzithoba loNkulunkulu wakho?

⁹Ilizwi le Nkosi liyamemeza kuwo umuzi kuyikuhlakanipha okuqotho ukwesaba ibizo lakho. Zwanini, lina bantu lomphakathi womuzi.

¹⁰Ngingayikhohlwa inotho ezuzwa ngokubi esendlini yababi, lezilinganiso ezikhohlisayo yini?

¹¹Ngingamyekela umuntu olezikali ezimbi lesaka eligcwele izilinganiso ezikhohlisayo yini?

¹²Abanothileyo benu bagcwele okubi, labakhileyo bakhuluma amanga, lolimi lwabo luyakhohlisa.

¹³Ngakho-ke sengizalitshaya, ngilichithe ngenxa yezono zenu.

¹⁴Lizakudla, kodwa lingasuthi, kube khona ukulamba ngaphakathi kwenu; lizalondoloza, kodwa kungalondolozeki; lalokhu elikulondolozayo ngizakunikela enkembeni.

¹⁵Lizahlanyela, kodwa lingavuni; likhame izithelo zemihlwathi, kodwa lingagcobi ngamafutha awo; lizakhama izithelo zevini, kodwa linganathi iwayini lazo elitsha.

¹⁶Ngoba ligcinile izimiso zikaOmri, lenzile yonke imisebenzi yendlu kaAhabi, lahamba ngamacebo abo, ngakho ngizalichitha, labakhileyo benu babe yinhlekisa; lizakweyiswa ngabantu.