Read Ndebele-IBhayibhili Elingcwele 2006 Umikha 7 Bible Online

Umikha 7 - Ndebele-IBhayibhili Elingcwele 2006 bible

Umikha 7

¹Maye mina! ngoba senginjengokuvunwa kwezithelo zasehlobo, njengevini eselivunwe laphela; kakuselahlukuzo lokudliwa, lemikhiwa yokuqala engiyithandayo.

²Abalungileyo babhubhile emhlabeni. kakusekho oqotho phakathi kwabantu; bonke bacathamela ukuchitha igazi, lowo lalowo uzingela umfowabo ngembule.

³Izandla zabo zikhuthalele ukwenza okubi, isiphathamandla lomahluleli bathengwa ngemali, loyisiphathamandla wahlulela ngokuthanda kwakhe, kuhlanekelwe ukulunga.

⁴Omuhle wabo unjengameva, lolungileyo wabo unjengothango lwameva. Usuku lwempindiselo yabo, abatshumayela ngalo abalindi babo, selufikile, lokudideka kwabo sekusondele.

⁵Ungamthembi umakhelwane, ungamkholwa umngane; umvalele umlomo umkakho olala lawe.

⁶Indodana iyadelela uyise, lendodakazi ivukela unina, umalokazana uvukela uninazala, lezitha zomuntu zingamadoda endlu yakhe.

⁷Kodwa mina ngizalindela i Nkosi, ngilindele uNkulunkulu wosindiso lwami; uNkulunkulu wami uzangizwa.

⁸Ungathokozi ngami, sitha sami, ngoba lapho ngisiwa, ngizavuka; lapho ngihlezi emnyameni, i Nkosi izakuba yikukhanya kimi.

⁹Ngizathwala intukuthelo ye Nkosi, ngoba ngonile kuyo, ize imele indaba yami, ingenzele ukwahlulela. Izangikhuphela ekukhanyeni, ngizabona ukulunga kwayo.

¹⁰Isitha sami sizakukubona, zimbambe inhloni yena owathi kimi: Ingaphi iNkosi uNkulunkulu wakho? Ngizathokoza nxa ngimbona esenyathelwe phansi njengodaka lwendlela.

¹¹Kuzakufika usuku lokwakhiwa kwemiduli yakho; ngalolosuku imingcele yakho izadediselwa khatshana.

¹²Ngalolosuku bazafika kuwe bevela eAsiriya laseGibhithe, kusukela eGibhithe kuze kube semfuleni iYufrathi, bevela kuzo zonke inlwandle lezintaba.

¹³Kodwa ilizwe lizachitheka ngenxa yobubi babakhileyo kilo.

¹⁴Yelusa abantu bakho ngentonga yakho, umhlambi ongowakho impela ohlala wodwa ehlathini lasezihotsheni; kawalukele eBashani leGileyadi njengasendulo.

¹⁵Sitshengise izimangaliso njengensukwini zokuphuma kwakho eGibhithe.

¹⁶Izizwe zizabona, zibe lenhloni lanxa zilamandla, zibambe imilomo yazo, lendlebe zazo zibe yizacuthe,

¹⁷Zizahuba ngesisu othulini njengenyoka, lanjengezinto ezihahabayo zomhlaba; zizaphuma enqabeni zazo zithuthumela, ziphendukele eNkosini unkulunkulu wethu ngokwesaba, zitshaywe luvalo ngenxa yakho.

¹⁸Ngubani uNkulunkulu onjengawe, othethelela isono sabantu bakhe abaseleyo ayekele isiphambeko sabo? Kathukutheli kokuphela, ngoba uthokoza ngothando olungapheliyo.

¹⁹Uzasihawukela futhi, anyathele phansi ububi bethu. Wena uzaphosela enzikini yolwandle izono zethu zonke;

²⁰uzanika uJakobe ukuthembeka, lenzalo kaAbrahama uthando olungapheliyo, njengokufunga kwakho kubo endulo.