Read Ndebele-IBhayibhili Elingcwele 2006 Unarhume 1 Bible Online

Unarhume 1 - Ndebele-IBhayibhili Elingcwele 2006 bible

Unarhume 1

¹Leli yilizwi ngeNineve. Le yincwadi yombono kaNahume weElikoshi.

²I Nkosi inguNkulunkulu olobukhwele ophindiselayo; i Nkosi ingumphindiseli, igcwele ulaka; i Nkosi iphindisela ezitheni zayo, igcinela izitha zayo intukuthelo.

³I Nkosi iyaphuza ukuthukuthela, kodwa ilamandla amakhulu, kayiyikumyekela ngitsho olecala; indlela yayo isesivunguzaneni lesiphepheni, lamayezi aluthuli lwenyawo zayo.

⁴Ikhuza ulwandle lutshe, yenze imifula yonke itshe; iBashani leKharmeli kubone, lempoko zeLebhanoni zibune.

⁵Intaba ziyanyikinyeka phambi kwayo, lamaqaqa ayancibilika; ilizwe liyachitheka phambi kwayo, umhlaba labo bonke abakhileyo kuwo.

⁶Ngubani ongema phambi kwentukuthelo yayo? Ngubani ongema ekuvutheni kolaka lwayo? Ulaka lwayo luthululeka njengomlilo, lamadwala aqekezeke phambi kwayo.

⁷I Nkosi ilungile, iyinqaba esukwini lokuhlupheka; iyabakhumbula abaphephela kuyo,

⁸lapho izikhukhula zibafikela; kodwa labo abamelana layo izabachitha bathi nya, ixotshele izitha zayo emnyameni.

⁹Lenza amacebo bani nge Nkosi? Izaqeda konke, kayiyikuphindisela kabili ezitheni zayo.

¹⁰Njengameva abambeneyo bayaqedwa bonke, baphele njengamabibi omileyo.

¹¹Kavelanga yini kuwe, Nineve, owenza amacebo amabi nge Nkosi, wanika iseluleko esibi?

¹²I Nkosi ithi: Loba amaAsiriya elamandla, futhi emanengi, azaqedwa anyamalale. Loba ngikuhluphile, Juda, kangisayikukuhlupha futhi.

¹³Sengizakwephula ijogwe elikuwe, ngiqamule izibopho zakho.

¹⁴I Nkosi ilayile ngawe, Nineve, yathi: Kalisayikukhunjulwa ibizo lakho; endlini yabonkulunkulu bakho ngizachitha izithombe ezibaziweyo lezithombe ezibunjwe ngokuncibilikisa; ngizagebhela ingcwaba, ngoba ungcolile.

¹⁵Khangelani ezintabeni inyawo zakhe oletha indaba ezinhle, omemezela ukuthula. Gcina imikhosi yakho, Juda, ugcwalise izithembiso zakho, ngoba omubi kasayikumelana lawe futhi, uchithiwe waphela nya.