Read Ndebele-IBhayibhili Elingcwele 2006 Unarhume 3 Bible Online

Unarhume 3 - Ndebele-IBhayibhili Elingcwele 2006 bible

Unarhume 3

¹Maye kumuzi ogcwele igazi, wonke ugcwele amanga lempango! Ukuphanga kakupheli kiwo.

²Zwanini ukukhala kwesiswepu lomsindo wokugedlezela kwamavili, lowamabhiza amathayo, lowenqola ezigijimayo.

³Abagadi bamabhiza bayasukela; kubonakala ukuphazima kwenkemba, lokucwazimula komkhonto; banengi ababuleweyo; kukhona inqwaba zezidumbu, izidumbu ezinengi ezingelakuphela; abantu bayakhubeka phezu kwazo.

⁴Konke lokhu kungenxa yokuphinga okunengi kwesiphingi esibukekayo langenxa yobuthakathi baso abulalayo, esithengisa izizwe ngokuphinga kwaso labantu ngobuthakathi baso.

⁵Khangela, ngimelene lawe, kutsho i Nkosi yamabandla; ngizakwembula izidwaba zakho, ngitshengise izizwe ubunqunu bakho, lemibuso ihlazo lakho.

⁶Ngizaphosela amanyala phezu kwakho, ngikuthele ihlazo, ngikwenze ube yinto yokubukelwa.

⁷Bonke abakubonayo bazakubalekela, bathi: INineve lichithekile. Ngubani ozalililela? Ngizalidingela ngaphi abaduduzi?

⁸Wena Nineve, ungcono yini kulomuzi weNo owawusemfuleni uNile, uzingelezelwe ngamanzi, omthangala wawo wawululwandle, lamanzi engumduli wawo?

⁹IEtiyopiya leGibhithe kwakungamandla alo angelakuphela; iPuti leLibiya kwakungabasiz balo.

¹⁰Kanti lathunjwa laya ekuthunjweni, lezingane zalo zachotshozwa engonsini zazo zonke indlela; kwenziwa inkatho yokuphosa ngezikhulu zalo, labo bonke abakhulu balo babotshwa ngamaketane.

¹¹Laweke uzadakwa, uyendezele; udinge isiphephelo sokubalekela izitha.

¹²Inqaba zakho zonke zinjengezihlahla zemikhiwa elezithelo zokuqala, uba zinyikinywa, izithelo ziwela emlonyeni wodlayo.

¹³Khangela, amabutho akho anjengabesifazana nje. Amasango elizwe lakho avulekele izitha zakho; umlilo uyiqedile imigoqo yawo.

¹⁴Zikhelela amanzi ulungisele ukuvinjezelwa, uqinise inqaba zakho; ngena odakeni, uxove ibumba, ulungise ibhokisi lokubumba izitina.

¹⁵Lalapho umlilo uzakuqeda, lenkemba ikubulale. Zandise njengesikhonyane, uzandise njengezintethe.

¹⁶Wandise abathengisi bakho baze badlule inkanyezi zamazulu. Kodwa kabasekho njengesikhongwane eselula impiko zaso siphaphe, sihambe.

¹⁷Iziphathamandla zakho zinjengezintethe, lababhali bakho banjengomhlambi wesikhonyane esimisa inkamba othangweni ngosuku oluqandayo; lapho ilanga seliphumile, siyasuka siphaphe, singabe sizaziwa ukuthi singaphi.

¹⁸Abelusi bakho balele, nkosi yeAsiriya, leziphathamandla zakho ziyawozela. Abantu bakho bahlakazekile ezintabeni, kakho obabuthayo.

¹⁹Kakukho okukupholisa ukulimala kwakho, inxeba lakho libi; bonke abezwa umbiko ngawe batshaya izandla. Ngoba ngubani obungafinyelelanga kuye ububi bakho?