Read Ndebele-IBhayibhili Elingcwele 2006 Urhabakhukhu 3 Bible Online

Urhabakhukhu 3 - Ndebele-IBhayibhili Elingcwele 2006 bible

Urhabakhukhu 3

¹Nanku umkhuleko kaHabakuki umprofethi.

²Nkosi, ngizwile umbiko ngawe, ngiyesaba izenzo zakho. Ziphinde futhi kuliminyaka, wenze ukuthi zaziwe kuliminyaka; ukhumbule umusa elakeni.

³UNkulunkulu wavela eThemani, oNgcwele wavela entabeni yeParani. Selah. Inkazimulo yakhe yasibekela amazulu, umhlaba wagcwala indumiso yakhe.

⁴Ukucwazimula kwakhe kwakunjengokukhanya, imisebe yavela esandleni sakhe, efihla lapho amandla akhe.

⁵Umatshayabhuqe wesifo wahamba phambi kwakhe, lomkhuhlane walandela eduze.

⁶Ekusukumeni kwakhe umhlaba wanyikinyeka, ekukhangeleni kwakhe kwathuthumela izizwe; intaba zendulo zahlakazeka, amaqaqa alaphakade atshona. Indlela zakhe zazilaphakade.

⁷Ngabona amathente akoKushani ephansi kosizi, lamakhetheni elizwe leMidiyani ethuthumela.

⁸Nkosi, ulaka lwakho lwaluvuthela imifula yini? Wawuthukuthelele imifula yini, lentukuthelo yakho yayivuthela ulwandle lapho ugade amabhiza akho, ukhwele phezu kwenqola yakho yokunqoba yini?

⁹Idandili lakho livele obala, lembuliwe, ufakile imitshoko yakho entanjeni. Selah. Waqhekeza umhlaba ngemifula.

¹⁰Intaba zakubona wena, zathuthumela, lezikhukhula zamanzi zedlula; amanzi amanengi akhupha ilizwi lawo, aphakamisela izandla zawo phezulu.

¹¹Ilanga lenyanga kwema endaweni yakho ekukhanyeni kwemitshoko yakho egijimayo, lekuphazimeni komkhonto wakho ocwazimulayo.

¹²Wadabula umhlaba ngokuthukuthela, wanyathela isizwe ngentukuthelo.

¹³Waphumela ukukhulula abantu bakho, ukukhulula ogcotshiweyo wakho. Ubhidlizele phansi indlu yomubi, waquphula lezisekelo zayo. Selah.

¹⁴Ngemitshoko yakho ucibile umkhokheli wamabutho akhe, afika njengesivunguzane ukusichitha, ethokoza kungathi azakudla abahluphekayo ekusithekeni.

¹⁵Wanyathela ulwandle ngamabhiza akho, kwavubana amanzi amanengi.

¹⁶Ngiyezwa, kuthuthumela umzimba wami, indebe zami ziqhaqhazele ngenhlokomo; ukubola kungena emathanjeni ami, kutshayane amadolo ami. Ngizalindela ngokuthula ukuthi usuku lokuhlupheka lufike phezu kwalabo abasihlaselayo.

¹⁷Loba umkhiwa ungavezi impoko, loba kungekho izithelo evinini lomhlwathi liphuthe ukuthela, amasimu angavezi ukudla, izimvu ziqunywe zisuka esibayeni, kungabi khona inkomo esibayeni,

¹⁸kanti mina ngizathokoza nge Nkosi, ngijabule ngoNkulunkulu wokukhululwa kwami.

¹⁹UNkulunkulu, iNkosi, ungamandla ami, wenza inyawo zami zibe njengezempala, engenze ukuthi ngihambe endaweni zami eziphakemeyo. Ngeyomqondisi womculo. Ezigincini zami.