Read Ndebele-IBhayibhili Elingcwele 2006 Uzefaniya 1 Bible Online

Uzefaniya 1 - Ndebele-IBhayibhili Elingcwele 2006 bible

Uzefaniya 1

¹Ilizwi le Nkosi lafika kuZefaniya indodana kaKushi, kaGedaliya, kaAmariya, kaHezekhiya, ensukwini zikaJosiya indodana kaAmoni inkosi yakoJuda.

²Lathi: Ngizaqothula konke kuthi nya emhlabeni, itsho i Nkosi;

³ngizaqothula abantu lenyamazana, ngiqothule inyoni zamazulu lenhlanzi zolwandle. Ngizachitha ababi, ngiqume abantu basuke emhlabeni, kutsho i Nkosi.

⁴Ngizaphakamisela isandla sami phezu kukaJuda laphezu kwabo bonke abakhileyo eJerusalema, ngiqume konke okuseleyo kukaBhali kusuke kulindawo lebizo labapristi bezithombe,

⁵ngiqede labakhonza ibutho lamazulu phezu kwezindlu, labakhuleka kimi bangifunge, bafunge futhi loMilkomu,

⁶labangidelileyo abangangidingiyo, bangabuzi kimi.

⁷Thula phambi kweNkosi uJehova! Ngoba usuku lwe Nkosi selusondele. I Nkosi isilungisile umhlatshelo, yahlambulula labanxusiweyo bayo.

⁸Kuzakuthi ngosuku lomhlatshelo wami ngitshaye iziphathamandla lamadodana e Nkosi labo bonke abagqoka izigqoko zabezizwe.

⁹Ngalolosuku ngizatshaya bonke abeqayo umbundu womnyango, labagcwalisa indlu yenkosi yabo ngobubi langenkohliso.

¹⁰Ngalolosuku, itsho i Nkosi, kuzazwakala ilizwi lokukhala eSangweni lenhlanzi, lokulila esigabeni sesibili somuzi lokufohloza okukhulu kuzwakala emaqaqeni.

¹¹Khalani. lina elakhe endaweni yokuthengisela, ngoba bonke abathengisayo kabasekho, bonke abalinganisa isiliva baphelile.

¹²Kuzakuthi ngalesosikhathi ngihlole iJerusalema ngezibane, ngitshaye bonke abantu abazithokozisayo abazithembayo, abathi enhliziyweni zabo: I Nkosi kayiyikwenza lutho.

¹³Impahla yabo izaphangwa, lezindlu zabo zidilizwe. Loba besakha izindlu, kabayikuhlala kuzo, loba belima izivini, kabayikunatha iwayini lazo.

¹⁴Usuku olukhulu lwe Nkosi selusondele, luyeza ngokuphangisa; usuku lwe Nkosi lulobuhlungu, iqhawe liyakhala ngokubabayo kulo.

¹⁵Lolosuku lusuku lolaka, usuku lokuhlupheka losizi, usuku lokuchitheka lokubhidlika, usuku lomnyama, lolwamayezi, lomnyama onzima,

¹⁶usuku lokutshaya uphondo lokuhlaba umkhosi emizini ebiyelwe ngemithangala lezinqabeni eziphakemeyo.

¹⁷Ngizakwehlisela abantu usizi ukuze bahambe njengeziphofu, ngoba bonile e Nkosi ni; igazi labo lizachithwa njengothuli; lenyama yabo njengobulongwe.

¹⁸Isiliva sabo legolide labo kakuyikuba lamandla okubakhulula ngosuku lolaka lwe Nkosi. Umhlaba wonke uzaqedwa ngumlilo wolaka lwayo lobukhwele bayo; ngoba izaqeda, yebo izabajuma ibaqede bonke abakhileyo elizweni.