Read Ndebele-IBhayibhili Elingcwele 2006 Uzefaniya 3 Bible Online

Uzefaniya 3 - Ndebele-IBhayibhili Elingcwele 2006 bible

Uzefaniya 3

¹Maye kuwo umuzi oxhwalileyo ongcolileyo, ocindezelayo!

²Kawulaleli lizwi, kawemukeli kulaywa, kawuthembeli e Nkosi ni, kawusondeli kuNkulunkulu wawo.

³Iziphathamandla zawo zinjengezilwane ezibhongayo; labahluleli bawo banjengezimpisi eziyizihwaba ezingatshiyi lutho kuze kuse.

⁴Abaprofethi bawo kabananzeleli, bayakhohlisa; abapristi bawo bangcolisa okungcwele, bephule umthetho.

⁵I Nkosi iphakathi kwawo ilungile, kayenzi okubi; insuku zonke ekuseni iletha ilungelo layo ekukhanyeni, futhi kayiphuthi; kodwa omubi kalanhloni.

⁶Ngizichithile izizwe, lenqaba zazo zidilikile; ngidilizile imigwaqo yazo ukuze kungahambi muntu ngayo; imizi yazo yenziwe yaba ngamanxiwa, kakusekho loyedwa ohlala kiyo.

⁷Ngathi: isibili umuzi uzangesaba, wemukele ukulaywa; kawuyikukhohlwa ukulaya kwami konke. Kodwa bavuke ngovivi bekhuthalela ngamandla ukwenza okungalunganga.

⁸Ngakho-ke ngilindela, itsho i Nkosi, kuze kube lusuku engizavuka ngalo ngahlulele izizwe. Ngoba isinqumo sami siyikubuthelela izizwe, ngiqoqe imibuso, ngithululele phezu kwayo intukuthelo yami, konke ukuvutha kolaka lwami; ngoba ngomlilo wolaka lwami lobukhwele bami wonke umhlaba uzaqotshulwa.

⁹Ngalesosikhathi ngizanika abantu ukukhuluma okuhlambulukileyo, ukuthi bonke bakhuleke ebizweni lami, bangikhonze nganhliziyonye.

¹⁰Kusukela phetsheya kwemifula yeEtiyopiya abacela kimi phakathi kwabahlakazekileyo bami bazaletha umnikelo.

¹¹Ngalolosuku lina bantu bami, kaliyikuyangeka ngenxa yezenzo eliphambuka ngazo kimi, ngoba ngizakhupha phakathi kwenu labo abazikhukhumezayo; kalisayikuziphakamisa entabeni yami engcwele.

¹²Ngoba ngizatshiya phakathi kwenu abantu abazithobileyo labathulayo. Bazathemba ebizweni lami

¹³abaseleyo koIsrayeli; kabayikwenza okubi, kabayikukhuluma amanga, kakuyikuphuma emlonyeni wabo amazwi akhohlisayo. Ngoba bazakweluka balale phansi, kungabi khona obethusayo.

¹⁴Hlabela kakhulu, wena Ziyoni, umemeze, Israyeli. Thokoza, uthabe ngenhliziyo yakho yonke, wena Jerusalema.

¹⁵I Nkosi isusile izigwebo zakho, izixotshile izitha zakho. UMbusi kaIsrayeli, i Nkosi, uphakathi kwakho; kawuyikwesaba okubi.

¹⁶Ngalolosuku kuzakuthiwa eJerusalema: Ungesabi, wena Ziyoni; kazingadinwa izandla zakho.

¹⁷I Nkosi uNkulunkulu wakho iphakathi kwakho, injengeqhawe elinqobayo; izajabula ngawe ngentokozo, ikuvuselele ngothando lwayo, ithabe ngawe ngokuhlabelela.

¹⁸Njengasosukwini lomkhosi omisiweyo. Ngizasusa inhlupheko zakho ukuze ungathwali ihlazo.

¹⁹Khangela, ngalesosikhathi ngizakuba lokwenza labo bonke abakucindezelayo; ngizasiza bonke abaqhulayo, ngibuthe abaxotshiweyo, ngiphendule ihlazo labo libe yingoma yokudumisa lodumo emhlabeni wonke.

²⁰Ngalesosikhathi ngizaliletha ekhaya esikhathini sokulibutha, kwami. Ngizalenza ukuthi libe lodumo, libongwe phakathi kwabantu bonke bomhlaba lapho sengibuyisa inhlanhla yenu futhi, kutsho i Nkosi.