Read Ndebele-IBhayibhili Elingcwele 2006 Uhagayi 1 Bible Online

Uhagayi 1 - Ndebele-IBhayibhili Elingcwele 2006 bible

Uhagayi 1

¹Ngomnyaka wesibili kaDariyusi inkosi, ngosuku lokuqala lwenyanga yesithupha, ilizwi le Nkosi lafika ngoHagayi umprofethi kuZerubhabheli indodana kaSalatiyeli umbusi wakoJuda, lakuJoshuwa indodana kaJehozadaki umpristi omkhulu;

²lathi: I Nkosi yamabandla ithi: Lababantu bathi kakukabi yisikhathi sokwakha kithi ithempeli le Nkosi.

³Laselifika ilizwi le Nkosi ngoHagayi umprofethi

⁴lisithi: Kuyisikhathi yini sokuthi lina lihlale ezindlini zenu ezinhle, kanti lindlu ilunxiwa?

⁵Ngakho-ke i Nkosi yamabandla ithi: Ake libone ukuthi izinto zilimele njani.

⁶Lihlanyele okunengi, lavuna okuyingcosana; liyadla, kodwa kalisuthi; liyanatha, kodwa kalikholwa; ligqoke lingakhudumali, lohola imali uholela ukuyifaka esikhwameni esivuzayo.

⁷I Nkosi yamabandla ithi: Ake libone ukuthi izinto zilimele njani.

⁸Khwelani ezintabeni ligamule izigodo, lakhe indlu engithokozisayo, lapho engingabonakalisa khona udumo lwami, kutsho i Nkosi.

⁹Beliqaphele okunengi, kodwa khangelani, kube yingcosana elikuzuzileyo; lapho likuletha ekhaya, ngikuphephule konke. Kungani? kutsho i Nkosi yamabandla. Kungenxa yendlu yami elunxiwa, lina lilibele ngendlu zenu.

¹⁰Ngenxa yalokhu-ke amazulu avalekile ukuze kungabi lamazolo, lomhlabathi uvalekile ukuze lingazuzi izithelo zawo.

¹¹Ngilethile ukoma elizweni lezintabeni laphezu kwamabele laphezu kwewayini elitsha lamafutha laphezu kwakho konke okuvela emhlabathini, ebantwini lezifuyweni lakho konke abakwenzayo.

¹²Ngakho uZerubhabheli indodana kaSalatiyeli loJoshuwa indodana kaJehozadaki umpristi omkhulu, labo bonke abantu ababesele, balilalela ilizwi le Nkosi uNkulunkulu wabo, lamazwi kaHagayi umprofethi owayethunywe yi Nkosi uNkulunkulu wabo; abantu bayesaba i Nkosi.

¹³UHagayi isithunywa se Nkosi wasekhuluma ebantwini ilizwi le Nkosi, wathi: Ngilani, kutsho i Nkosi.

¹⁴I Nkosi yavusa umoya kaZerubhabheli indodana kaSalatiyeli umbusi wakoJuda, lomoya kaJoshuwa indodana kaJehozadaki umpristi omkhulu, lomoya wabo bonke abantu ababesele; beza ukuze basebenze endlini ye Nkosi yamabandla uNkulunkulu wabo,

¹⁵ngosuku lwamatshumi amabili lane lwenyanga yesithupha.