Read Ndebele-IBhayibhili Elingcwele 2006 Uhagayi 2 Bible Online

Uhagayi 2 - Ndebele-IBhayibhili Elingcwele 2006 bible

Uhagayi 2

¹Ngomnyaka wesibili, ngosuku lwamatshumi amabili lanye lwenyanga yesikhombisa, ilizwi le Nkosi lafika ngoHagayi umprofethi

²lisithi: Tshela uZerubhabheli indodana kaSalatiyeli umbusi wakoJuda, loJoshuwa indodana kaJehozadaki umpristi omkhulu, labo bonke abantu abaseleyo,

³ithi: Ngubani osekhona phakathi kwenu owabona lindlu ebuhleni bayo bakuqala? Kambe injani khathesi? Kayisize emehlweni enu yini?

⁴Kodwa qina, wena Zerubhabheli, kutsho i Nkosi, ume isibindi lawe Joshuwa, ndodana kaJehozadaki, mpristi omkhulu; qinani lani lonke, bantu belizwe. Sebenzani, ngoba mina ngilani, kutsho i Nkosi yamabandla,

⁵njengokuthembisa kwami engakwenza kini ekuphumeni kwenu eGibhithe. Umoya wami uhlala phakathi kwenu, lingesabi.

⁶Ngoba i Nkosi yamabandla ithi: Kuseyisikhatshana nje ngibuye nginyikinye futhi amazulu lomhlaba, ulwandle lomhlabathi owomileyo;

⁷ngizanyikinya izizwe zonke ukuze inotho yazo ifike lapha, igcwalise indlu le ngobuhle, kutsho i Nkosi yamabandla.

⁸Isiliva singesami legolide ngelami, kutsho i Nkosi yamabandla.

⁹Ubuhle bokucina balindlu buzakuba bukhulu kulobokuqala, kutsho i Nkosi yamabandla; lakulindawo ngizanika ukuthula.

¹⁰Ngosuku lwamatshumi amabili lane, lwenyanga yesificamunwemunye, emnyakeni wesibili kaDariyusi, ilizwi le Nkosi lafika kuHagayi umprofethi

¹¹lisithi: I Nkosi yamabandla ithi: Ake ubabuze abapristi lumbuzo uthi:

¹²Uba umuntu ethwele inyama engcwele ngesembatho sakhe, athinte ngesembatho sakhe isinkwa, loba isitshwala, loba iwayini, loba amafutha, loba okunye ukudla, kuzakuba ngcwele yini? Abapristi baphendula bathi: Hatshi.

¹³Wasesithi uHagayi: Uba umuntu ongcoliswe yisidumbu ethintana lalezizinto, ziyangcola yini? Abapristi bamphendula bathi: Yebo, ziyangcola.

¹⁴Khona uHagayi waphendula wathi: Banjalo lababantu sinjalo lesisizwe phambi kwami, kutsho i Nkosi, futhi unjalo wonke umsebenzi wezandla zabo, lalokho abakusondeza lapha kungcolile.

¹⁵Ake licabange ngokwenzakayo kusukela ngaphambili kuze kube lamhlanje; kungakabekwa ilitshe phezu kwelinye ethempelini le Nkosi,

¹⁶kwakunjani kini? Lapho umuntu esiya enqwabeni yezilinganiso ezingamatshumi amabili zamabele, wathola itshumi nje; lalapho esiya esikhamelweni sewayini ukukha imbiza ezingamatshumi amahlanu, wathola amatshumi amabili nje.

¹⁷Ngalitshaya kanye layo yonke imisebenzi yenu ngokutshisa langengumane langesiqhotho; kanti kaliphendukelanga kimi, kutsho i Nkosi.

¹⁸Ake licabange kuhle kusukela lamuhla, kusukela kulolusuku lwamatshumi amabili lane, enyangeni yesificamunwemunye, kusukela esukwini lokubekwa kwezisekelo zethempeli; cabangani kuhle.

¹⁹Inhlanyelo isesesilulwini yini? Ivini lomkhiwa lepomegranati* lomhlwathi, lokhu kungatheli yini? Kusukela lamuhla ngizalibusisa.

²⁰Ilizwi le Nkosi lafika ngokwesibili kuHagayi, ngosuku lwamatshumi amabili lane enyangeni,

²¹lathi: Tshela uZerubhabheli umbusi wakoJuda uthi: Sengizanyikinya amazulu lomhlaba,

²²ngigenqule isihlalo sobukhosi semibuso, ngichithe amandla emibuso yezizwe, ngigenqule izinqola labakhweli baze amabhiza labagadi bawo azakuwa, lowo lalowo awe ngenkemba yomfowabo.

²³Ngalolosuku, kutsho i Nkosi yamabandla, ngizakuthatha, wena Zerubhabheli, inceku yami, indodana kaSalatiyeli, ngikwenze ube njengendandatho elophawu yodumo; ngoba nguwe engikukhethileyo, kutsho i Nkosi yamabandla.