Read Ndebele-IBhayibhili Elingcwele 2006 Uzakariya 1 Bible Online

Uzakariya 1 - Ndebele-IBhayibhili Elingcwele 2006 bible

Uzakariya 1

¹Ngenyanga yesificaminwembili, ngomnyaka wesibili kaDariyusi, ilizwi le Nkosi lafika kuZekariya umprofethi. indodana kaBerekiya kaldo, lisithi:

²I Nkosi yabathukuthelela oyihlo.

³Ngakho-ke tshono ebantwini uthi: I Nkosi yamabandla ithi: Buyelani kimi, lami ngizabuyela kini, kutsho i Nkosi yamabandla.

⁴Lingabi njengoyihlo abaprofethi bakuqala abamemeza kibo besithi: I Nkosi yamabandla ithi: Phendukani ezindleleni zenu ezimbi lezenzweni zenu ezimbi. Kodwa kabezwanga, kabanginanzanga, kutsho i Nkosi.

⁵Oyihlo bangaphi? Labaprofethi baphila kokuphela yini?

⁶Kodwa amazwi ami lezimiso zami, engalaya ngakho inceku zami abaprofethi, kakubaficanga oyihlo yini? Ngakho baphenduka bathi: Njengalokhu i Nkosi yamabandla yazimisela ukusiphatha ngokufanele indlela zethu lezenzo zethu, yenze njalo.

⁷Ngosuku lwamatshumi amabili lane lwenyanga yetshumi lanye ethiwa nguShebati, ngomnyaka wesibili kaDariyusi, ilizwi le Nkosi lafika kuZekariya umprofethi, indodana kaBerekiya kaldo. UZekariya wathi:

⁸Ngabona ebusuku, khangela, umuntu ogade ibhiza elibomvu. Wayemi phakathi kwezihlahla zomtshekisane esigodini, kukhona ngemva kwakhe amabhiza abomvu lalubhidi lamhlophe.

⁹Ngasengisithi: Kutshoni lokhu, Nkosi? Ingilosi eyayikhuluma lami yathi kimi: Ngizakutshengisa ukuthi kuyini.

¹⁰Ngakho-ke lowomuntu owayemi phakathi kwezihlahla zomtshekisane waphendula wathi: Laba yibo i Nkosi ebathumileyo ukuhlola umhlaba.

¹¹Bona basebeyiphendula ingilosi ye Nkosi eyayimi phakathi kwezihlahla zomtshekisane, bathi: Sesiwuhlolile umhlaba, khangela, umhlaba wonke uhlezi kuhle.

¹²Ingilosi ye Nkosi yasisithi: Nkosi yamabandla, koze kube nini ungabanga lasihawu kiyo iJerusalema lakuyo imizi yakoJuda, oyithukutheleleyo okweminyaka engamatshumi ayisikhombisa?

¹³I Nkosi yasiphendula ingilosi eyayikhuluma lami ngamazwi omusa laduduzayo.

¹⁴Ngakho ingilosi eyayikhuluma lami yathi kimi: Memeza uthi i Nkosi yamabandla ithi: Ngilobukhwele obukhulu ngeJerusalema langeZiyoni.

¹⁵Ngithukuthele kakhulu ngezizwe ezichelesileyo, ngoba ngathi ngisazondile kancinyane, zandisa ububi.

¹⁶Ngalokho-ke, ithi i Nkosi, sengibuyile eJerusalema ngilesihawu; indlu yami izakwakhiwa kuyo, kutsho i Nkosi yamabandla, lentambo yokulinganisa izatshonjululwa phezu kweJerusalema.

¹⁷Memeza futhi ithi: I Nkosi yamabandla ithi: Imizi yami izagcwala iphuphume futhi izinto ezinhle. I Nkosi izaduduza futhi iZiyoni, ibuye iyikhethe iJerusalema.

¹⁸Ngaphakamisa amehlo ami, ngabona, khangela-ke, impondo ezine.

¹⁹Ngathi kuyo ingilosi eyayikhuluma lami: Kuyini lokhu? Yangiphendula yathi: Lezi zimpondo ezachithachitha uJuda loIsrayeli leJerusalema.

²⁰I Nkosi yasingitshengisa abakhandi abane.

²¹Ngasengisithi: Laba bazekwenzani? Yangiphendula yathi: Leziya impondo zachithachitha uJuda, kwaze kwasweleka loyedwa ongaphakamisa ikhanda. Lababakhandi bezile ukwesabisa izizwe, lokwephula impondo zezizwe ezaphakamisela impondo zazo ilizwe lakoJuda ukulichithachitha.