Read Ndebele-IBhayibhili Elingcwele 2006 Uzakariya 11 Bible Online

Uzakariya 11 - Ndebele-IBhayibhili Elingcwele 2006 bible

Uzakariya 11

¹Vula iminyango yakho, Lebhanoni, ukuze umlilo utshise imisedari yakho.

²Khala wena firi, ngoba umsedari usuwile, ngoba izihlahla ezinhle ziphundlekile. Khalani lina zihlahla zamaokhi* zeBashani, ngoba igusu elingangenekiyo seliwile.

³Ilizwi lokukhala kwabelusi liyezwakala, ngoba udumo lwabo luchithekile. Ukubhonga kwamabhongo ezilwane kuyezwakala ngoba ihlathi leJordani liqothulwe.

⁴I Nkosi uNkulunkulu wami yathi: Yelusa izimvu zokuhlatshwa.

⁵Abazithengayo bayazihlaba, bengabilacala; labazithengisayo bathi: Kayibusiswe i Nkosi, senginothile; abelusi bazo kabazihawukeli.

⁶Ngoba kangisayikubahawukela abakhileyo kulelilizwe, kutsho i Nkosi. Kodwa khangela, ngizabanikela abantu ezandleni zabomakhelwane babo, lezamakhosi abo; bazachitha ilizwe, kangiyikophula loyedwa ezandleni zabo.

⁷Ngasengizelusa izimvu zokuhlatshwa yilabo abathenga izimvu. Ngathatha intonga ezimbili, enye ngayibiza ngokuthi nguMusa, lenye ngayibiza ngokuthi nguNhlanganiso. Ngazelusa-ke izimvu.

⁸Ngaxotsha abelusi abathathu ngenyanganye, ngoba basebengidinile, lami sengiyisinengiso kibo.

⁹Ngakho-ke ngasengisithi: Kangisayikulelusa; efayo kayife, lelahlekayo kayilahleke; lalezo eziseleyo zidlane inyama.

¹⁰Ngasengithatha intonga yami ethiwa nguMusa, ngayephula ukuze ngephule isivumelwano sami engangisenze labantu bonke.

¹¹Sephulwa-ke ngalolosuku, labathengi bezimvu ababengikhangele bazi ukuthi kwakuyilizwi le Nkosi.

¹²Ngasengisithi kibo: Uba kulungile kini, ngiphani iholo lami; kodwa uba kungalunganga, yekelani. Basebengilinganisela iholo lami amashekeli* esiliva angamatshumi amathathu.

¹³I Nkosi yasisithi kimi: Aphosele endaweni yokugcinela imali; yeka inani elinje ababengihlawule ngalo! Ngakho-ke ngasengiwathatha amashekeli esiliva angamatshumi amathathu, ngawaphosela endaweni yokugcinela imali ethempelini.

¹⁴Ngasengisephula intonga yami yesibili ethiwa nguNhlanganiso ukuze kwaphuke ukuzalana kukaJuda loIsrayeli.

¹⁵I Nkosi yasisithi kimi: Thatha futhi izikhali zomelusi oyisithutha.

¹⁶Ngoba khangela, ngizabeka elizweni umelusi ongahambeli labo abaqunyiweyo, ongazidingiyo ezilahlekileyo, longazelaphiyo ezilimeleyo, longaziboneliyo eziphilayo, kodwa adle inyama yezinonileyo, adabule amasondo azo.

¹⁷Maye kumelusi oyisithutha otshiya izimvu! Kungathi inkemba ingagwaza ingalo yakhe lelihlo lakhe lokunene. Ingalo yakhe kayitshwabhane, lelihlo lokunene lifiphale.