Read Ndebele-IBhayibhili Elingcwele 2006 Uzakariya 6 Bible Online

Uzakariya 6 - Ndebele-IBhayibhili Elingcwele 2006 bible

Uzakariya 6

¹Ngabuya ngaphakamisa amehlo ami, ngabona, khangela-ke, inqola ezine ziphuma phakathi kwentaba ezimbili ezazingezethusi.

²Inqola yokuqala yayilamabhiza abomvu, eyesibili ilamabhiza amnyama,

³eyesithathu ilamabhiza amhlophe, leyesine ilamabhiza alamabala.

⁴Ngasengisithi kuyo ingilosi eyayikhuluma lami: Lokhu kuyini, Nkosi yami?

⁵Ingilosi yangiphendula yathi: Lokhu kuyimimoya emine yamazulu esuka ekumeni phambi kweNkosi yomhlaba wonke.

⁶Inqola elamabhiza amnyama iya elizweni lenyakatho, elamabhiza amhlophe iya elizweni lentshonalanga, lelamabhiza alamabala iya elizweni leningizimu.

⁷Ekuphumeni kwawo ayephitshekela ukuhamba, ayehlola ilizwe. Yathi: Hambani liyehlola umhlaba. Ngakho awuhlola umhlaba.

⁸Yasingimemeza isithi: Khangela, lawo aya elizweni lenyakatho aphumuzile umoya wami elizweni lenyakatho.

⁹Ilizwi le Nkosi lafika kimi lathi:

¹⁰Hamba uye kwabathunjiweyo, oHelidayi loTobiya loJedaya loJosiya indodana kaZefaniya, abafike bevela eBhabhiloni,

¹¹wemukele kibo isiliva legolide, wenze umqhele, uwuthwalise uJoshuwa indodana kaJehozadaki umpristi omkhulu,

¹²uthi kuye: I Nkosi yamabandla ithi: Khangela, umuntu obizo lakhe lithiwa ngulhlumela, ngoba uzakhula endaweni yakhe, akhe ithempeli le Nkosi.

¹³Nguye ozakwakha ithempeli le Nkosi, abe lobukhosi; uzahlala esihlalweni sobukhosi, abuse. Kuzakuba khona umpristi ngakwesokunene sakhe, bazazwana bobabili.

¹⁴Umqhele uzakuba sethempelini le Nkosi, ube yisikhumbuzo kuHelidayi loTobiya loJedaya loJosiya indodana kaZefaniya.

¹⁵Lalabo abakhatshana bazafika ukusiza ukwakha ithempeli le Nkosi; lizakwazi ukuthi i Nkosi yamabandla ingithumile kini. Lokhu kuzakwenzeka, uba lilalela ilizwi le Nkosi uNkulunkulu ngenhliziyo zenu zonke.