Read Ndebele-IBhayibhili Elingcwele 2006 Uzakariya 7 Bible Online

Uzakariya 7 - Ndebele-IBhayibhili Elingcwele 2006 bible

Uzakariya 7

¹Ngomnyaka wesine wenkosi uDariyusi ilizwi le Nkosi lafika kuZekariya ngosuku lwesine lwenyanga yesificamunwemunye ethiwa nguKisilevi.

²Abantu beBhetheli babethume oSharezeri loRegemeleki labantu babo ukucela umusa e Nkosi ni,

³lokubuza abapristi bendlu ye Nkosi yamabandla labaprofethi ukuthi: Sizakhala inyembezi ngenyanga yesihlanu njengokwenza kwethu iminyaka yonke yini?

⁴Laselifika kimi ilizwi le Nkosi yamabandla lisithi:

⁵Tshono ebantwini bonke belizwe lakubapristi uthi: Ekuzileni kwenu ukudla lekulileni kwenu enyangeni yesihlanu lenyangeni yesikhombisa, kule iminyaka engamatshumi ayisikhombisa, lalizilela mina ukudla yini?

⁶Nxa lisidla linatha, kalizidleli lizinathele lina yini?

⁷Nxa iJerusalema yayisakhiwe iphumelele, lemizi yayo yonke iyihanqile, leningizimu leShefela kwakhiwe kuzo, la ayengesiwo amazwi i Nkosi eyawatshumayela ngabaprofethi bakuqala yini?

⁸Ilizwi le Nkosi lafika kuZekariya lisithi:

⁹I Nkosi yamabandla ithi: Lenze isahlulelo esiqotho, lenze umusa lesihawu kubafowenu,

¹⁰lingacindezeli umfelokazi lentandane lowezizweni lomyanga, kungabi khona loyedwa wenu owenza amacebo amabi enhliziyweni yakhe ngomfowabo.

¹¹Kodwa bona bala ukulalela, baqinisa amakhanda abo, bavimba indlebe zabo ukuze bangezwa.

¹²Benza inhliziyo zabo zaba lukhuni njengendayimana, hlezi bezwe ukulaya lamazwi i Nkosi yamabandla ebathumele wona ngomoya wayo ngabaprofethi bakuqala. Lokhuke kwayithukuthelisa kakhulu i Nkosi yamabandla.

¹³I Nkosi yamabandla yathi: Njengoba ngababiza, kabaze bezwa, labo babiza, lami kangaze ngezwa.

¹⁴Ngabachithachitha phakathi kwezizwe zonke ababekade bengazazi. Ngakho ilizwe abalitshiyayo lachitheka, kakusadabulanga muntu kulo, lelizwe elihle laba yinkangala.