Read Ndebele-IBhayibhili Elingcwele 2006 Uzakariya 8 Bible Online

Uzakariya 8 - Ndebele-IBhayibhili Elingcwele 2006 bible

Uzakariya 8

¹Ilizwi le Nkosi yamabandla lafika kimi lisithi:

²I Nkosi yamabandla ithi: Ngilobukhwele ngeZiyoni, ubukhwele obuvuthayo kakhulu.

³I Nkosi ithi: Ngizabuyela eZiyoni, ngihlale phakathi kweJerusalema, leJerusalema izakuthiwa ngumuzi othembekileyo, lentaba ye Nkosi yamabandla izakuthiwa yintaba engcwele.

⁴I Nkosi yamabandla ithi: Amaxhegu lezalukazi bazahlala futhi endleleni zeJerusalema, ngulowo lalowo ephethe udondolo ngenxa yokuluphala.

⁵Lezindlela zomuzi zizagcwala abafana lamankazana bedlala kizo.

⁶I Nkosi yamabandla ithi: Uba kumangalisa emehlweni alabo abaseleyo balababantu kulezinsuku, kuzamangalisa yini lemehlweni ami yini?

⁷Khangela, ngizakhulula abantu bami elizweni lapho eliphuma khona lalapho elitshona khona ilanga,

⁸ngibalethe ukuze bahlale phakathi kweJerusalema, babe ngabantu bami, lami ngibe nguNkulunkulu wabo ngeqiniso langokulunga.

⁹I Nkosi yamabandla ithi: Qungani isibindi, lina elizwa kulezinsuku amazwi avela kubaprofethi, ababekhona kusukela esikhathini sokubekwa kwesisekelo sethempeli lami, ukuze lakhiwe.

¹⁰Ngoba ngaphambi kwalezonsuku kwakungelakuqatshwa umuntu lokwenyamazana, kungekho lokuvikelwa ezitheni kwabasebenzayo. Ngoba wonke umuntu ngamxega lomfowabo.

¹¹Kodwa khathesi kangisayikubaphatha abaseleyo balababantu njengensukwini zakuqala, kutsho i Nkosi yamabandla.

¹²Ngoba kuzahlanyelwa ngokuthula, ivini lizathela izithelo zalo lomhlabathi wandise inala yawo, lamazulu ehlise amazolo awo; ngizabanika abaseleyo balababantu zonke lezizinto.

¹³Njengoba beliyisiqathekiso phakathi kwezizwe, wena Juda lawe Israyeli, ngakho ngizalikhulula libe yisibusiso. Lingesabi, kodwa manini isibindi.

¹⁴I Nkosi yamabandla ithi: Njengoba ngazimisela ukwenza okubi kini ekungithukutheliseni kwaboyihlo, ngingaliyekelanga, kutsho i Nkosi yamabandla,

¹⁵ngakho-ke ngizimisele kulezinsuku ukwenza okulungileyo eJerusalema lakoJuda; lingesabi.

¹⁶Nanzi izinto elizazenza. Khulumani iqiniso omunye komunye; lahlulele ngokuqotho langokuqonda enkundleni;

¹⁷lingenzelani amacebo amabi enhliziyweni zenu; lingathandi izifungo zamanga; ngoba ngiyazizonda zonke lezizinto, kutsho i Nkosi.

¹⁸Ilizwi le Nkosi yamabandla lafika kimi lisithi:

¹⁹I Nkosi yamabandla ithi: Ukuzila ukudla kwenyanga yesine, lenyanga yesihlanu, lenyanga yesikhombisa, lenyanga yetshumi, kuzakuba yizikhathi zentokozo lezokuthaba lezikhathi ezimisiweyo zenjabulo koJuda. Ngakho-ke thandani iqiniso lokuthula.

²⁰I Nkosi yamabandla ithi: Izizwe labantu abakhe imizi emikhulu bazafika,

²¹kuthi abakhileyo komunye umuzi baye kwabakhe komunye, bathi: Asihle sihambeni, siyedinga i Nkosi yamabandla, sicele umusa wayo; siyahamba khathesi.

²²Abantu abanengi lezizwe ezilamandla zizakuza ukuyidinga i Nkosi yamabandla eJerusalema lokucela umusa wayo.

²³I Nkosi yamabandla ithi: Ngalezonsuku abantu abalitshumi abavela ezizweni zezindimi zonke bazabamba umJuda ngesembatho sakhe, bathi kuye: Sizahamba lawe ngoba sesizwile ukuthi uNkulunkulu ukini.