Read Ndebele-IBhayibhili Elingcwele 2006 Umalaki 2 Bible Online

Umalaki 2 - Ndebele-IBhayibhili Elingcwele 2006 bible

Umalaki 2

¹Khathesi-ke, bapristi, umlayo lo ngowenu.

²Uba lingalaleli, njalo uba lingakubeki enhliziyweni ukunika ibizo lami udumo, itsho i Nkosi yamabandla, sengizathumela isiqalekiso phakathi kwenu, ngiqalekise izibusiso zenu. Yebo, sengiziqalekisile, ngoba kalikubeki enhliziyweni.

³Khangelani, ngizakona inzalo yenu, ngithele umswane ebusweni benu, umswane wamadili enu, lisuswe lawo.

⁴Njalo lizakwazi ukuthi ngithumele lumlayo kini, ukuze isivumelwano sami sibe loLevi, itsho i Nkosi yamabandla.

⁵Isivumelwano sami besilaye siyikuphila lokuthula; ngamnika khona kube yikwesaba angesaba ngakho; wathuthumela phambi kwebizo lami.

⁶Umlayo weqiniso wawusemlonyeni wakhe, lesiphambeko kasitholakalanga endebeni zakhe. Wahamba lami ngokuthula langobuqotho, waphendula abanengi ebubini.

⁷Ngoba indebe zompristi ziyagcina ulwazi, njalo bayadinga umlayo emlonyeni wakhe, ngoba uyisithunywa se Nkosi yamabandla.

⁸Kodwa lina liphambukile endleleni, lakhubekisa abanengi emlayweni; lona isivumelwano sikaLevi, itsho i Nkosi yamabandla.

⁹Ngakho lami ngilenzile laba ngabadelelekayo labehliselwe phansi phambi kwabantu bonke, njengokuba lingagcinanga izindlela zami, kodwa lamukele ubuso emlayweni.

¹⁰Kasilababa munye yini thina sonke? UNkulunkulu munye kasidalanga yini? Kungani sisenza ngenkohliso, omunye emelene lomfowabo, ngokungcolisa isivumelwano sabobaba?

¹¹UJuda wenze ngenkohliso, njalo kwenziwe amanyala koIsrayeli leJerusalema; ngoba uJuda ungcolisile ubungcwele bukaJehova abuthandayo, uthethe indodakazi kankulunkulu wezizweni.

¹²I Nkosi izaquma umuntu owenza lokhu, umfundisi lofundiswayo, asuke emathenteni kaJakobe, lalowo oletha umnikelo e Nkosi ni yamabandla.

¹³Lalokhu likwenzile kabili; lisibekela ilathi le Nkosi ngezinyembezi, ngokukhala, langokububula, okungangokuthi kayisawunanzi umnikelo, kumbe ukuwemukela ngokuthokoza esandleni senu.

¹⁴Kanti lithi: Kungani? Kungoba i Nkosi yayingumfakazi phakathi kwakho lomfazi wobutsha bakho, wena omphethe ngenkohliso, kanti engumngane wakho, lomfazi wesivumelwano sakho.

¹⁵Kenzanga yini oyedwa, lanxa elomoya oseleyo? Njalo kungani oyedwa? Wadinga inzalo kaNkulunkulu. Ngakho qaphelisani ngomoya wenu, njalo kakungabi lamunye ophatha umfazi wobutsha bakhe ngenkohliso.

¹⁶Ngoba i Nkosi uNkulunkulu kaIsrayeli ithi iyazonda ukwala. Ngoba omunye usibekela udlakela ngesembatho sakhe, itsho iNkosi yamabandla. Ngakho qaphelisani ngomoya wenu, ukuze lingenzi ngenkohliso.

¹⁷Liyidinisile i Nkosi ngamazwi enu. Kanti lithi: Siyidinise ngani? Ngokuthi kwenu: Wonke owenza okubi ulungile emehlweni e Nkosi, njalo uyathokoza ngabo; kumbe: Ungaphi uNkulunkulu wesahlulelo?