Read Ndebele-IBhayibhili Elingcwele 2006 Umatewu 11 Bible Online

Umatewu 11 - Ndebele-IBhayibhili Elingcwele 2006 bible

Umatewu 11

¹Kwasekusithi uJesu eseqedile ukulaya abafundi bakhe abalitshumi lambili, wasuka lapho ukuyafundisa lokutshumayela emizini yabo.

²Kwathi uJohane esentolongweni esezwile imisebenzi kaKristu, wathuma ababili babafundi bakhe,

³wathi kuye: Wena unguye ozayo yini, kumbe silindele omunye?

⁴UJesu wasephendula wathi kubo: Hambani limtshele uJohane izinto elizizwayo lelizibonayo:

⁵Iziphofu zemukela ukubona, leziqhuli ziyahamba, amalephero ayahlanjululwa, lezacuthe ziyezwa, abafileyo bayavuswa, labayanga bayatshunyayezwa ivangeli;

⁶njalo ubusisiwe loba ngubani ongakhubekiyo ngami.

⁷Kwathi bona besuka uJesu waqala ukukhuluma emaxukwini ngoJohane wathi: Laphuma laya enkangala ukuyabonani? Umhlanga onyikinywa ngumoya yini?

⁸Kanti laphumela ukuyabonani? Umuntu owembethe izembatho ezibuthakathaka yini? Khangelani, abembethe ezibuthakathaka basezindlini zamakhosi.

⁹Pho laphumela ukuyabonani? Umprofethi yini? Yebo, ngithi kini: Loba owedlula umprofethi;

¹⁰ngoba lo nguye okulotshwe ngaye ukuthi: Khangela, mina ngiyathuma isithunywa sami phambi kobuso bakho, esizalungisa indlela yakho phambi kwakho.

¹¹Ngiqinisile ngithi kini: Kakuvelanga phakathi kwabazelwe ngabesifazana omkhulu kuloJohane uMbhabhathizi. Kodwa omncinyane embusweni wamazulu mkhulu kulaye.

¹²Njalo kusukela ensukwini zikaJohane uMbhabhathizi kuze kube khathesi umbuso wamazulu uphathwa ngodlakela, labalodlakela bawuthatha ngamandla.

¹³Ngoba abaprofethi bonke lomlayo baprofetha kwaze kwaba nguJohane;

¹⁴njalo uba livuma uku kw emukela, lo unguElija obezakuza.

¹⁵Olendlebe zokuzwa, akezwe.

¹⁶Kodwa ngizasifananisa lani lesisizukulwana? Sifanana labantwana abahlezi emamakethe, bememeza kubangane babo,

¹⁷besithi: Salitshayela umhlanga, kodwa kalisinanga; salililela, kodwa kalikhalanga.

¹⁸Ngoba uJohane wafika engadli enganathi, basebesithi: Uledimoni.

¹⁹INdodana yomuntu yafika isidla inatha, basebesithi: Khangelani, umuntu oligovu lesinathi sewayini, umngane wabathelisi lezoni. Kodwa inhlakanipho ithiwa ilungile ngabantwana bayo.

²⁰Waseqala ukusola imizi okwakwenziwe phakathi kwayo ubunengi bemisebenzi yakhe yamandla, ngoba ingaphendukanga, wathi:

²¹Maye kuwe, Korazini ! Maye kuwe, Bethisayida ! Ngoba uba kwakwenziwe eTire leSidoni imisebenzi yamandla eyenziwe kini, ngabe kade baphenduka bembethe amasaka lemlotheni.

²²Kodwa ngithi kini: Kuzakuba ngcono eTire leSidoni ngosuku lwesigwebo kulakini.

²³Lawe, Kapenawume, ophakanyiselwe ezulwini, uzaphoselwa phansi esihogweni; ngoba uba yayenziwe eSodoma imisebenzi yamandla eyenziwe kuwe, ngabe isekhona kuze kube lamuhla.

²⁴Kodwa ngithi kini: Kuzakuba ngcono kulizwe leSodoma ngosuku lwesigwebo, kulakuwe.

²⁵Ngalesosikhathi uJesu waphendula wathi: Ngiyakubonga, Baba, Nkosi yezulu lomhlaba, ngoba uzifihlile lezizinto kwabahlakaniphileyo labaqedisisayo, kodwa wazembulela izingane;

²⁶yebo Baba, ngoba ngokunjalo kwaba kuhle phambi kwakho.

²⁷Konke kwanikelwa kimi nguBaba; njalo kakho oyaziyo iNdodana, ngaphandle kukaYise; kakho futhi omaziyo uYise ngaphandle kweNdodana, njalo loba ngubani iNdodana ethanda ukumembulela.

²⁸Wozani kimi lonke elikhatheleyo lelisindiweyo, njalo mina ngizaliphumuza.

²⁹Thathani ijogwe lami lilibeke phezu kwenu lifunde kimi, ngoba ngimnene ngithobekile enhliziyweni; njalo lizathola ukuphumula emiphefumulweni yenu;

³⁰ngoba ijogwe lami libutshelezi, lomthwalo wami ulula.