Read Ndebele-IBhayibhili Elingcwele 2006 Umatewu 12 Bible Online

Umatewu 12 - Ndebele-IBhayibhili Elingcwele 2006 bible

Umatewu 12

¹Ngalesosikhathi uJesu wadabula emasimini amabele ngesabatha; futhi abafundi bakhe babelambile, baqala ukukha izikhwebu, badla.

²Kodwa abaFarisi be ku bona bathi kuye: Khangela, abafundi bakho benza okungavunyelwanga ukwenziwa ngesabatha.

³Kodwa wathi kubo: Kalifundanga yini uDavida akwenzayo, mhla elambile yena lababelaye;

⁴ukuthi wangena njani endlini kaNkulunkulu, wadla izinkwa zokubukiswa, ayengavunyelwa ukuzidla, ngitsho lababelaye, ngaphandle kwabapristi bodwa?

⁵Ingabe kalifundanga yini emlayweni, ukuthi ngamasabatha abapristi bayalona isabatha ethempelini, bangabi lacala?

⁶Kodwa ngithi kini: Kukhona lapha omkhulu kulethempeli.

⁷Kodwa aluba belisazi ukuthi kutshoni ukuthi: Ngifisa isihawu hatshi umhlatshelo, ngabe kalibalahlanga abangelacala.

⁸Ngoba iNdodana yomuntu iyiNkosi leyesabatha.

⁹Futhi wasuka lapho wangena esinagogeni labo;

¹⁰njalo khangela, kwakukhona umuntu olesandla esitshwabheneyo; basebembuza besithi: Kuvunyelwe yini ukusilisa ngamasabatha? Ukuze bambeke icala.

¹¹Kodwa wathi kubo: Nguwuphi umuntu phakathi kwenu, elemvu eyodwa, futhi uba iwele emgodini ngesabatha, ongayikuyibamba a yi khuphe?

¹²Umuntu uyedlula-ke kangakanani imvu ! Ngakho kuvunyelwe ukwenza okuhle ngamasabatha.

¹³Wasesithi kumuntu: Yelula isandla sakho. Wase s elula, sasesisiliswa saphelela njengesinye.

¹⁴Basebephuma abaFarisi becebisana ngaye, ukuthi bangambulala njani.

¹⁵Kodwa uJesu esekwazi wasuka lapho; amaxuku amakhulu asemlandela, wasebasilisa bonke.

¹⁶Wasebalayisisa ukuthi bangamvezi;

¹⁷ukuze kugcwaliseke okwakhulunywa ngumprofethi uIsaya, ukuthi:

¹⁸Khangela, inceku yami engiyikhethileyo; othandekayo wami othokoza ngaye umphefumulo wami; ngizabeka uMoya wami phezu kwakhe, njalo uzatshumayela ukwahlulela kwabezizwe.

¹⁹Kayikubangisa, kayikumemeza, njalo kakho ozalizwa ilizwi lakhe ezindleleni.

²⁰Umhlanga ofecekileyo kayikuwephula, lentambo yesibane ethunqayo kayikuyicitsha, aze aphumelelise ukwahlulela ekunqobeni.

²¹Lezizwe zizathemba ebizweni lakhe.

²²Kwasekulethwa kuye umuntu ongenwe lidimoni, ey isiphofu lesimungulu; wasemsilisa, kwaze kwathi isiphofu esiy isimungulu sakhuluma njalo sabona.

²³Asemangala amaxuku wonke athi: Lo kayisiyo yini iNdodana kaDavida?

²⁴Kodwa abaFarisi sebezwile bathi: Lumuntu kakhuphi amadimoni, ngaphandle kukaBhelezebhule inkosi yamadimoni.

²⁵Kodwa uJesu, eseyazi imicabango yabo, wathi kubo: Wonke umbuso owehlukene umelene lawo ngokwawo uyachitheka; lawo wonke umuzi kumbe indlu eyehlukene ngokuzimelana ingeze yema.

²⁶Njalo uba uSathane ekhupha uSathane, wehlukene emelene laye ngokwakhe; pho umbuso wakhe uzakuma njani?

²⁷Futhi uba mina ngikhupha amadimoni ngoBhelezebhule, amadodana enu akhupha ngobani? Ngakho wona azakuba ngabagwebi benu.

²⁸Kodwa uba mina ngikhupha amadimoni ngoMoya kaNkulunkulu, umbuso kaNkulunkulu usufikile kini.

²⁹Kumbe umuntu angangena njani endlini yesiqhwaga aphange impahla yaso, ngaphandle kokuthi asibophe kuqala isiqhwaga? Abesephanga-ke indlu yaso.

³⁰Ongelami, umelene lami, longabuthi lami, uyachithiza.

³¹Ngakho ngithi kini: Abantu bazathethelelwa sonke isono lenhlamba; kodwa ukuhlambaza uMoya kakuyikuthethelelwa abantu.

³²Lalowo okhuluma ilizwi elimelana leNdodana yomuntu, uzathethelelwa; kodwa lowo okhuluma emelana loMoya oyiNgcwele, kayikuthethelelwa, kungeyisikho kulesisikhathi loba kwesizayo.

³³Loba yenzani isihlahla sibe ngesilungileyo, lesithelo saso sibe ngesilungileyo, kumbe lenze isihlahla sibe sibi, lesithelo saso sibe sibi, ngoba isihlahla saziwa ngesithelo.

³⁴Nzalo yezinyoka, lingakhuluma njani izinto ezinhle, libabi? Ngoba umlomo ukhuluma ngokugcwala kwenhliziyo.

³⁵Umuntu olungileyo ukhupha izinto ezilungileyo kokuligugu elilungileyo lenhliziyo; lomuntu omubi ukhupha izinto ezimbi kokuligugu elibi.

³⁶Kodwa ngithi kini: Lonke ilizwi eliyize abalikhulumayo abantu, bazaziphendulela ngalo ngosuku lokwahlulela.

³⁷Ngoba ngamazwi akho uzalungisiswa, langamazwi akho uzalahlwa.

³⁸Abanye bababhali labaFarisi basebephendula, bathi: Mfundisi, sifuna ukubona isibonakaliso esivela kuwe.

³⁹Kodwa waphendula wathi kubo: Isizukulwana esibi lesifebayo sidinga isibonakaliso; kodwa kasiyikunikwa isibonakaliso, ngaphandle kwesibonakaliso sikaJona umprofethi.

⁴⁰Ngoba njengalokhu uJona waba sesiswini sensikabayitshiye insuku ezintathu lobusuku obuthathu, ngokunjalo iNdodana yomuntu izakuba semathunjini omhlaba insuku ezintathu lobusuku obuthathu.

⁴¹Amadoda eNinive azasukuma ekugwetshweni kanye lalesisizukulwana, asilahle; ngoba aphenduka ngokutshumayela kukaJona; njalo khangelani, omkhulu kuloJona ulapha.

⁴²Indlovukazi yeningizimu izasukuma ekugwetshweni kanye lalesisizukulwana, isilahle; ngoba yavela emikhawulweni yomhlaba u kuza kuzwa inhlakanipho kaSolomoni; njalo khangelani, omkhulu kuloSolomoni ulapha.

⁴³Kodwa nxa umoya ongcolileyo esephumile emuntwini, uyahamba adabule indawo ezomileyo, edinga ukuphumula, kodwa enga ku tholi.

⁴⁴Abesesithi: Ngizabuyela endlini yami engaphuma kuyo; njalo esefikile ayifice ize, ithanyelwe, njalo ilungisiwe.

⁴⁵Abesehamba athathe kanye laye abanye omoya abayisikhombisa ababi kulaye uqobo, besebengena bahlale khona; njalo ukucina kwalowomuntu kube kubi kulokuqala. Kuzakuba njalo lakulesisizukulwana esibi.

⁴⁶Kwathi esakhuluma emaxukwini, khangela, unina labafowabo bema ngaphandle, bedinga ukukhuluma laye.

⁴⁷Omunye wasesithi kuye: Khangela, unyoko labafowenu bemi phandle, badinga ukukhuluma lawe.

⁴⁸Kodwa waphendula wathi komtshelileyo: Ngubani umama? Labafowethu ngobani?

⁴⁹Waseselulela isandla sakhe kubafundi bakhe wathi: Khangelani, umama labafowethu.

⁵⁰Ngoba loba ngubani owenza intando kaBaba osemazulwini, nguye ongumfowethu lodadewethu lomama.