Read Ndebele-IBhayibhili Elingcwele 2006 Umatewu 13 Bible Online

Umatewu 13 - Ndebele-IBhayibhili Elingcwele 2006 bible

Umatewu 13

¹Kwathi ngalolosuku uJesu waphuma endlini wahlala phansi elwandle.

²Kwasekubuthana kuye amaxuku amakhulu, waze wangena emkhunjini wahlala phansi; lexuku lonke lema ekhunjini.

³Wasekhuluma labo izinto ezinengi ngemifanekiso, wathi: Khangelani, kwaphuma umhlanyeli ukuyahlanyela.

⁴Kwathi ekuhlanyeleni kwakhe, enye inhlanyelo yawela eceleni kwendlela; kwasekufika inyoni, zayidla zayiqeda.

⁵Kodwa enye yawela emadwaleni, lapho eyayingelamhlabathi omnengi khona; futhi yahle yamila, ngoba kwakungelakutshona komhlabathi;

⁶kwathi ekuphumeni kwelanga yahangulwa; njalo ngoba yayingelampande yabuna.

⁷Kodwa enye yawela emeveni; ameva asekhula ayiminyanisa.

⁸Kodwa enye yawela emhlabathini omuhle, yathela isithelo, enye ikhulu, lenye amatshumi ayisithupha, lenye amatshumi amathathu.

⁹Olendlebe zokuzwa, akezwe.

¹⁰Kwasekufika abafundi bathi kuye: Ukhulumelani kubo ngemifanekiso?

¹¹Wasephendula wathi kubo: Ngoba kuphiwe kini ukwazi imfihlo zombuso wamazulu, kodwa bona kabakunikwanga.

¹²Ngoba loba ngubani olakho uzaphiwa, abe lokwengezelelweyo; kodwa lowo ongelakho, uzakwemukwa lalokho alakho.

¹³Ngakho ngikhuluma labo ngemifanekiso, ngoba bebona kababoni, njalo besizwa kabezwa, futhi kabaqedisisi.

¹⁴Kubo besekugcwaliseka isiprofetho sikaIsaya, esithi: Ukuzwa lizakuzwa, kodwa kalisoze liqedisise; lokubona lizabona, kodwa kalisoze libonisise;

¹⁵ngoba inhliziyo yalababantu seyaba lukhuni, njalo bezwa kanzima ngendlebe, lamehlo abo bawacimezile; hlezi loba nini babone ngamehlo, njalo bezwe ngendlebe, futhi baqedisise ngenhliziyo, njalo baphenduke, besengibasilisa.

¹⁶Kodwa abusisiwe amehlo enu, ngoba ayabona; lendlebe zenu, ngoba ziyezwa.

¹⁷Ngoba ngiqinisile ngithi kini: Abaprofethi abanengi labalungileyo babethanda ukubona izinto elizibonayo, kodwa kaba zi bonanga; lokuzwa izinto elizizwayo kodwa kaba zi zwanga.

¹⁸Ngakho lina zwanini umfanekiso womhlanyeli.

¹⁹Kuthi wonke ozwayo ilizwi lombuso kodwa engaqedisisi, omubi afike, ahluthune okuhlanyelwe enhliziyweni yakhe. Lo nguye ohlanyelwe eceleni kwendlela.

²⁰Kodwa ohlanyelwe emadwaleni, nguye olizwayo ilizwi, ahle alemukele ngentokozo;

²¹kodwa kalampande phakathi kwakhe, kodwa uhlala isikhathi; kuthi sekufika inkathazo kumbe ukuzingelwa ngenxa yelizwi, ahle akhubeke.

²²Lohlanyelwe emeveni, nguye olizwayo ilizwi, kodwa impisekelo yalumhlaba lenkohliso yenotho kuyaliminyanisa ilizwi, futhi lingatheli isithelo.

²³Kodwa ohlanyelwe emhlabathini omuhle, nguye olizwayo ilizwi aliqedisise; athele izithelo, aveze, omunye ikhulu, lomunye amatshumi ayisithupha, lomunye amatshumi amathathu.

²⁴Wabeka phambi kwabo omunye umfanekiso, esithi: Umbuso wamazulu ufananiswa lomuntu owahlanyela inhlanyelo enhle ensimini yakhe.

²⁵Kodwa abantu besalele, kwafika isitha sakhe sahlanyela umfaba phakathi kwamabele, sahamba.

²⁶Kodwa kwathi selumilile usungulo lwathela isithelo, lomfaba wasubonakala.

²⁷Zasezisondela inceku zomninimuzi zathi kuye: Nkosi, kawuhlanyelanga yini inhlanyelo enhle ensimini yakho? Pho iwuthethe ngaphi umfaba?

²⁸Wasesithi kuzo: Umuntu oyisitha ukwenzile lokhu. Inceku zasezisithi kuye: Uthanda ukuthi siyewubutha yini?

²⁹Kodwa wathi: Hatshi, hlezi, ekubutheni kwenu umfaba, lisiphune amabele kanye lawo.

³⁰Yekelani kukhule kokubili ndawonye kuze kube yisivuno; langesikhathi sokuvuna ngizakuthi kwabavunayo: Buthani kuqala umfaba, liwubophe izinyanda ukuze liwutshise; kodwa amabele liwabuthele esiphaleni sami.

³¹Wasebabekela omunye umfanekiso, esithi: Umbuso wamazulu unjengohlamvu lwemasitedi, aluthatha umuntu waluhlanyela ensimini yakhe;

³²lona kambe luncinyane kulazo zonke inhlamvu; kodwa nxa selukhulile, lukhulu kulezilimo zonke, njalo luba yisihlahla, kuze kufike inyoni zezulu, zakhele engatsheni zaso.

³³Wabatshela omunye umfanekiso, wathi: Umbuso wamazulu unjengemvubelo, ayithathayo owesifazana wayifaka emagokokweni amathathu empuphu, kwaze kwabila konke.

³⁴Lezizinto zonke uJesu wazikhuluma emaxukwini ngemifanekiso, futhi ngaphandle komfanekiso kakhulumanga kubo;

³⁵ukuze kugcwaliseke okwakhulunywa ngumprofethi, esithi: Ngizavula umlomo wami ngemifanekiso, ngizaveza izinto ezifihlakeleyo kusukela ekusekelweni komhlaba.

³⁶Kwathi uJesu esewayekele amaxuku ahamba wangena endlini; basebesondela kuye abafundi bakhe, besithi: Sichasisele umfanekiso womfaba ensimini.

³⁷Wasephendula wathi kibo: Ohlanyela inhlanyelo enhle yiNdodana yomuntu;

³⁸lensimu ngumhlaba; lenhlanyelo enhle, yona ingabantwana bombuso; kodwa umfaba ungabantwana bomubi;

³⁹lesitha esawuhlanyelayo nguSathane; lesivuno siyikuphela kwesikhathi; labavunayo bazingilosi.

⁴⁰Ngakho-ke njengalokhu umfaba uyabuthwa utshiswe emlilweni, kuzakuba njalo ekupheleni kwalesisikhathi.

⁴¹INdodana yomuntu izathuma ingilosi zayo, besezibutha zikhuphe embusweni wayo konke okukhubekisayo lalabo abenza okubi,

⁴²besezibaphosela esithandweni somlilo; lapho kuzakuba khona ukukhala lokugedla amazinyo.

⁴³Khona abalungileyo bezakhanya njengelanga embusweni kaYise. Olendlebe zokuzwa akezwe.

⁴⁴Futhi umbuso wamazulu unjengempahla eligugu efihliweyo ensimini, okuthi umuntu eseyificile wa yi fihla; entokozweni yakhe uyahamba, athengise konke alakho, athenge leyonsimu.

⁴⁵Futhi umbuso wamazulu unjengomuntu ongumthengi odinga amapharele* amahle;

⁴⁶esethole elinye ipharele eliligugu kakhulu, wasuka wathengisa konke alakho, walithenga.

⁴⁷Futhi umbuso wamazulu unjengembule elaphoswa olwandle, laselibutha zonke inhlobo;

⁴⁸lona, lithe seligcwele, balidonsela ekhunjini, bahlala phansi, babuthela ezilungileyo ezitsheni, kodwa ezimbi bazilahlela ngaphandle.

⁴⁹Kuzakuba njalo ekupheleni kwesikhathi; ingilosi zizaphuma, zehlukanise ababi zibasuse phakathi kwabalungileyo,

⁵⁰besezibaphosela esithandweni somlilo; lapho kuzakuba khona ukukhala lokugedla amazinyo.

⁵¹UJesu wathi kubo: Seliziqedisisile zonke lezizinto yini? Bathi kuye: Yebo, Nkosi.

⁵²Wasesithi kubo: Ngakho wonke umbhali ofundiselwe umbuso wamazulu unjengomuntu ongumninimuzi, okhupha empahleni yakhe eligugu okutsha lokudala.

⁵³Kwasekusithi uJesu eseqedile limifanekiso, wasuka lapho.

⁵⁴Wathi esefikile emzini wakibo wabafundisa esinagogeni labo, baze bamangala bathi: Ivela ngaphi kuyenalo linhlakanipho lalimisebenzi yamandla?

⁵⁵Lo kayisiyo yini indodana yombazi? Unina kathiwa nguMariya yini, labafowabo oJakobe loJose loSimoni loJudasi?

⁵⁶Labodadewabo kabakho yini bonke kithi? Pho, zivela ngaphi zonke lezizinto kuye?

⁵⁷Basebekhubeka ngaye. Kodwa uJesu wathi kubo: Umprofethi kasweli ukudunyiswa ngaphandle kwelizweni lakibo lendlini yakwabo.

⁵⁸Njalo kenzanga lapho imisebenzi yamandla eminengi, ngenxa yokungakholwa kwabo.