Read Ndebele-IBhayibhili Elingcwele 2006 Umatewu 17 Bible Online

Umatewu 17 - Ndebele-IBhayibhili Elingcwele 2006 bible

Umatewu 17

¹Lemva kwensuku eziyisithupha uJesu wathatha uPetro loJakobe loJohane umfowabo, wasekhwela labo entabeni ende bebodwa.

²Waseguqulwa isimo phambi kwabo, njalo ubuso bakhe bakhanya njengelanga, lezembatho zakhe zaba mhlophe njengokukhanya.

³Futhi khangela, kwasekubonakala kubo uMozisi loElija, bekhuluma laye.

⁴UPetro wasephendula wathi kuJesu: Nkosi, kuhle ukuthi sibe lapha. Uba uthanda, asakhe lapha amadumba amathathu, elinye ngelakho, lelinye ngelikaMozisi, lelinye ngelikaElija.

⁵Kwathi esakhuluma, khangela, iyezi elikhanyayo labasibekela; futhi khangela, ilizwi laphuma eyezini, lisithi: Lo uyiNdodana yami ethandekayo, engithokoza ngayo; zwanini yona.

⁶Sebezwile abafundi, bawa phansi ngobuso babo, besaba kakhulu.

⁷Kodwa uJesu weza wabathinta wathi: Sukumani lingesabi.

⁸Sebephakamisile amehlo abo, kababonanga muntu, ngaphandle kukaJesu yedwa.

⁹Sebesehla entabeni, uJesu wabalaya, wathi: Lingatsheli muntu lowombono, ize ivuke kwabafileyo iNdodana yomuntu.

¹⁰Abafundi bakhe basebembuza bathi: Pho batsholoni ababhali ukuthi uElija ufanele ukufika kuqala?

¹¹UJesu wasephendula wathi kubo: UElija uzafika kuqala isibili, uzabuyisela zonke izinto;

¹²kodwa ngitsho kini ukuthi uElija sewafika, kodwa kabamazanga, kodwa benza kuye konke ababekuthanda; ngokunjalo leNdodana yomuntu izahlutshwa yibo.

¹³Abafundi basebeqedisisa ukuthi wakhuluma labo ngoJohane uMbhabhathizi.

¹⁴Kwathi sebefikile exukwini, kweza kuye umuntu waguqa phambi kwakhe wathi:

¹⁵Nkosi, akuhawukele indodana yami, ngoba ilesithuthwane iyahlupheka kakhulu; ngoba iwele kanengi emlilweni, futhi kanengi emanzini.

¹⁶Njalo ngiyilethe kubafundi bakho, kodwa bebengelakho ukuyisilisa.

¹⁷UJesu wasephendula wathi: O sizukulwana esingelakholo lesonakeleyo, koze kube nini ngizakuba lani? Koze kube nini ngizalibekezelela? Mletheni kimi lapha.

¹⁸UJesu waselikhuza, idimoni laseliphuma kuyo, umntwana wasesila kusukela kulelohola.

¹⁹Abafundi basebesiza kuJesu bebodwa bathi: Kungani thina sehlulekile ukulikhupha?

²⁰UJesu wasesithi kubo: Kungenxa yokungakholwa kwenu. Ngoba ngiqinisile ngithi kini: Aluba lilokholo olunjengohlamvu lwemasitedi, lizakuthi kulintaba: Suka lapha uye laphaya; njalo izasuka; futhi kaliyikwehlulwa lutho.

²¹Kodwa loluhlobo kaluphumi ngaphandle kwangomkhuleko langokuzila ukudla.

²²Besahlezi eGalili, uJesu wathi kubo: INdodana yomuntu izanikelwa ezandleni zabantu,

²³njalo bazayibulala, kodwa ngosuku lwesithathu izavuswa. Basebedabuka kakhulu.

²⁴Kwathi sebefikile eKapenawume, abemukela umthelo beza kuPetro bathi: Umfundisi wenu katheli yini?

²⁵Wathi: Yebo. Esengenile endlini, uJesu wamandulela wathi: Ucabangani, Simoni? Amakhosi omhlaba emukela kubani imfanelo kumbe imithelo? Kumadodana abo yini, kumbe kwabezizwe?

²⁶UPetro wathi kuye: Kwabezizwe. UJesu wathi kuye: Ngakho-ke amadodana akhululekile.

²⁷Kodwa-ke ukuze singabakhubekisi, hamba uye elwandle uphose ingwegwe, uthathe inhlanzi ezaphuma kuqala; kuzakuthi usuvule umlomo wayo uzathola imali; uyithathe ubanike ibe ngeyami leyakho.