Read Ndebele-IBhayibhili Elingcwele 2006 Umatewu 2 Bible Online

Umatewu 2 - Ndebele-IBhayibhili Elingcwele 2006 bible

Umatewu 2

¹Kwathi uJesu esezelwe eBhethelehema yeJudiya, ensukwini zikaHerodi inkosi, khangela, kwafika izazi eJerusalema zivela empumalanga,

²zisithi: Ungaphi ozelwe eyinkosi yamaJuda? Ngoba sibonile inkanyezi yakhe empumalanga, njalo sesize ukumkhonza.

³Ngakho uHerodi inkosi esezwile wakhathazeka, leJerusalema yonke kanye laye.

⁴Esebuthanisile bonke abapristi abakhulu lababhali babantu, wabuza kubo ukuthi uKristu uzazalelwa ngaphi.

⁵Basebesithi kuye: EBhethelehema yeJudiya; ngoba kulotshiwe ngokunjalo ngumprofethi ukuthi:

⁶Lawe, Bhethelehema lizwe lakoJuda, kawusuye omncinyane lakanye phakathi kwababusi bakoJuda; ngoba kuzavela kuwe umbusi, ozakwelusa abantu bami uIsrayeli.

⁷Khona uHerodi, esezibizile izazi ensitha, wabuzisisa kuzo isikhathi sokubonakala kwenkanyezi.

⁸Wasezithuma eBhethelehema wathi: Hambani libuzisise ngomntwana; kuzakuthi nxa limtholile, libike kimi, ukuze lami ngiye ngimkhonze.

⁹Kwathi seziyizwile inkosi zasuka zahamba; njalo khangela, inkanyezi, ezayibona empumalanga, yahamba phambi kwazo, yaze yafika yema phezu kwalapho usane olwalukhona.

¹⁰Zathi ukuyibona inkanyezi zathokoza ngentokozo enkulu kakhulu.

¹¹Zasezingena endlini, zabona usane kanye loMariya unina, zawela phansi zalukhonza, zavula impahla zazo eziligugu zalukhunga ngezipho, igolide lempepha lemure*.

¹²Kwathi sezilayiwe nguNkulunkulu ephutsheni ukuthi zingabuyeli kuHerodi, zasuka zabuyela elizweni lakizo ngenye indlela.

¹³Kwathi sezisukile, khangela, ingilosi yeNkosi yabonakala kuJosefa ephutsheni, isithi: Vuka uthathe usane lonina, ubusubalekela eGibhithe, uhlale khona ngize ngikutshele; ngoba uHerodi uzaludinga usane, ukuze alubulale.

¹⁴Wavuka-ke wathatha usane lonina ebusuku wasuka waya eGibhithe,

¹⁵wasehlala khona kwaze kwaba yikufa kukaHerodi; ukuze kugcwaliswe okwakhulunywa yiNkosi ngomprofethi ukuthi: EGibhithe ngiyibizile indodana yami.

¹⁶Kwathi uHerodi, esebonile ukuthi uphicwe yizazi, wathukuthela kakhulu, wathuma wabulala abantwana bonke ababeseBhethelehema lemingceleni yayo yonke, kusukela eminyakeni emibili langaphansi, njengesikhathi abebuzisise ngaso kuzazi.

¹⁷Kwasekugcwaliseka okwakhulunywa nguJeremiya umprofethi, ukuthi:

¹⁸Kwezwakala ilizwi eRama, ukukhala lokulila lokudabuka okukhulu, uRasheli elilela abantwana bakhe, njalo engavumi ukududuzwa, ngoba benga se kho.

¹⁹Kodwa kwathi esefile uHerodi, khangela ingilosi yeNkosi yabonakala ephutsheni kuJosefa eGibhithe,

²⁰yathi: Vuka uthathe umntwana omncinyane lonina, ubususiya elizweni lakoIsrayeli; ngoba sebefile ababedinga umphefumulo womntwana.

²¹Wavuka-ke wathatha umntwana omncinyane lonina wasefika elizweni lakoIsrayeli.

²²Kodwa esezwile ukuthi uAkelawu usebusa eJudiya esikhundleni sikaHerodi uyise, wesaba ukuya khona; kodwa esexwayisiwe nguNkulunkulu ephutsheni, wasuka waya kungxenye zeGalili,

²³wasefika wahlala emzini othiwa yiNazaretha; ukuze kugcwaliseke okwakhulunywa ngabaprofethi ukuthi: Uzabizwa ngokuthi ngumNazaretha.