Read Ndebele-IBhayibhili Elingcwele 2006 Umatewu 20 Bible Online

Umatewu 20 - Ndebele-IBhayibhili Elingcwele 2006 bible

Umatewu 20

¹Ngoba umbuso wamazulu ufanana lomuntu ongumninindlu, owaphuma ekuseni kakhulu ukuqatsha izisebenzi ziye esivinini sakhe;

²esevumelene lezisebenzi ngodenariyo* ngosuku, wazithuma esivinini sakhe.

³Wasephuma sekungaba lihola lesithathu*, wabona abanye bemi emdangeni bengenzi lutho;

⁴lakulabo wathi: Yanini lani esivinini; njalo loba yini efaneleyo ngizalinika yona. Bahamba-ke.

⁵Wabuya waphuma sekungaba lihola lesithupha* langelesificamunwemunye, wenza njalo.

⁶Kwathi sekungaba lihola letshumi* lanye waphuma, wathola abanye bemi bengenzi lutho, wathi kubo: Limeleni lapha usuku lonke lingenzi lutho?

⁷Bathi kuye: Ngoba akulamuntu osiqatshileyo. Wathi kubo: Yanini lani esivinini, njalo lizakwemukela lokho okufaneleyo.

⁸Kwathi sekuntambama umninisivini wathi enduneni yakhe: Biza izisebenzi, uzibhadale iholo, uqale ngezokucina kuze kube ngezokuqala.

⁹Kuthe befika aba qatshwa ngehola letshumi lanye ngulowo lalowo wemukela udenariyo.

¹⁰Njalo sebezile abokuqala bacabanga ukuthi bazakwemukela okungaphezulu; kodwa labo bemukela udenariyo ngamunye.

¹¹Kwathi be ye mukela bamsola umninindlu,

¹²besithi: Labo abokucina basebenze ihola elilodwa, kodwa ubalinganise lathi esithwele ubunzima bosuku lokutshisa.

¹³Kodwa ephendula wathi komunye wabo: Mngane, angikoni; kanti kawuvumelananga lami ngodenariyo?

¹⁴Thatha okwakho uhambe; ngiyathanda ukumnika lowokucina njengawe.

¹⁵Kumbe angivunyelwa yini ukwenza engikuthandayo ngezinto zami? Loba ilihlo lakho libi yini, ngoba mina ngilungile?

¹⁶Kunjalo-ke abokucina bazakuba ngabokuqala, labokuqala ngabokucina; ngoba banengi ababiziweyo, kodwa balutshwana abakhethiweyo.

¹⁷Kwathi uJesu esesenyukela eJerusalema wathatha abalitshumi lambili bebodwa besendleleni, wathi kubo:

¹⁸Khangelani, senyukela eJerusalema, njalo iNdodana yomuntu izanikelwa kubapristi abakhulu lakubabhali; besebeyilahlela ukufa,

¹⁹bayinikele kwabezizwe ukuthi ba yi yangise ba yi tshaye ngesiswepu ba yi bethele; njalo ngosuku lwesithathu izabuya ivuke.

²⁰Kwasekusiza kuye unina wamadodana kaZebediya kanye lamadodana akhe, waguqa wacela ulutho kuye.

²¹Wasesithi kuye: Ufunani? Wathi kuye: Tshono ukuthi la amadodana ami amabili ahlale, enye ngakwesokunene sakho, lenye ngakwesokhohlo, embusweni wakho.

²²Kodwa uJesu waphendula wathi: Kalikwazi elikucelayo. Linganatha yini inkezo engizayinatha mina, njalo libhabhathizwe ngobhabhathizo engibhabhathizwa ngalo mina? Bathi kuye: Singa kwenza.

²³Wasesithi kubo: Ngeqiniso lizayinatha inkezo yami, libhabhathizwe ngobhabhathizo mina engizabhabhathizwa ngalo; kodwa ukuhlala ngakwesokunene sami langakwesokhohlo sami, kayisikho okwami ukuphana ngakho, kodwa kungo kwalabo abakulungiselweyo nguBaba.

²⁴Kwathi sebezwile abalitshumi, bathukuthela ngezelamani ezimbili.

²⁵Kodwa uJesu wababizela kuye wathi: Liyazi ukuthi ababusi bezizwe bayazibusa ngobulukhuni, lezikhulu zisebenzisa amandla phezu kwazo.

²⁶Kodwa akuyikuba njalo phakathi kwenu; kodwa loba ngubani othanda ukuba ngomkhulu phakathi kwenu kabe yisisebenzi senu;

²⁷njalo loba ngubani othanda ukuba ngowokuqala phakathi kwenu kabe yisisebenzi senu;

²⁸njengalokhu iNdodana yomuntu kayizanga ukukhonzwa, kodwa ukukhonza, lokunika impilo yayo ibe lihlawulo labanengi.

²⁹Kwathi bephuma eJeriko, ixuku elikhulu lamlandela.

³⁰Njalo khangela, iziphofu ezimbili zihlezi endleleni, sezizwile ukuthi uJesu uyadlula, zamemeza, zathi: Sihawukele, Nkosi, Ndodana kaDavida !

³¹Ixuku laselizikhuza ukuthi zithule, kodwa zamemeza kakhulu, zisithi: Sihawukele, Nkosi, Ndodana kaDavida !

³²UJesu wasesima wazibiza, wathi: Lifuna ukuthi ngilenzeleni?

³³Zathi kuye: Nkosi, ukuthi amehlo ethu avuleke.

³⁴UJesu esesiba lesihelo wathinta amehlo azo; njalo amehlo azo ahle emukela ukubona, zasezimlandela.