Read Ndebele-IBhayibhili Elingcwele 2006 Umatewu 22 Bible Online

Umatewu 22 - Ndebele-IBhayibhili Elingcwele 2006 bible

Umatewu 22

¹UJesu wasephendula wabuya wakhuluma labo ngemifanekiso, wathi:

²Umbuso wamazulu ufananiswa lomuntu oy inkosi, owenzela indodana yakhe idili lomtshado;

³wasethuma inceku zakhe ukuthi zibize abanxusiweyo emtshadweni, kodwa kabavumanga ukubuya.

⁴Wabuya wathuma ezinye inceku, esithi: Batsheleni abanxusiweyo ukuthi: Khangelani, sengilungisile ukudla kwami kwemini, inkabi zami lokunonileyo sekuhlatshiwe, izinto zonke sezilungile; wozani emtshadweni.

⁵Kodwa kabananzanga, bazihambela, omunye ensimini yakhe, omunye ekuthengiselaneni kwakhe;

⁶abaseleyo basebezibamba inceku zakhe ba zi phatha kubi ba zi bulala.

⁷Kodwa kwathi inkosi ikuzwa lokho yathukuthela, yathuma amabutho ayo yabhubhisa labobabulali, yatshisa umuzi wabo.

⁸Yasisithi encekwini zayo: Umtshado usulungile, kodwa abanxusiweyo bebengafanelanga.

⁹Ngakho yanini emahlanganweni ezindlela, njalo bonke elingabathola, libabizele emtshadweni.

¹⁰Lezonceku zaseziphuma zaya ezindleleni zabutha bonke ezabatholayo, ababi kanye labalungileyo; indlu yomtshado yasigcwala ngabahleziyo.

¹¹Kwathi inkosi ingena ukukhangela ababehlezi ekudleni yabona khona umuntu owayengembathanga isembatho somtshado;

¹²yasisithi kuye: Mngane, ungene njani lapha ungelasembatho somtshado? Kodwa yena waqunywa umlomo.

¹³Inkosi yasisithi ezincekwini: Mbopheni inyawo lezandla, limsuse limphosele emnyameni ongaphandle; lapho kuzakuba khona ukukhala lokugedla amazinyo.

¹⁴Ngoba banengi ababiziweyo, kodwa balutshwana abakhethiweyo.

¹⁵Khona-ke abaFarisi basuka, bacebisana ngokuthi bangamthiya njani ekukhulumeni.

¹⁶Basebethuma kuye abafundi babo kanye labakaHerodi, besithi: Mfundisi, siyazi ukuthi wena uqotho, ufundisa indlela kaNkulunkulu ngeqiniso, kawukhathaleli muntu, ngoba kawunanzi isimo somuntu.

¹⁷Ngakho sitshele, wena ucabangani? Kuvunyelwe yini ukuthela kuKesari, kumbe hatshi?

¹⁸Kodwa uJesu ebazi ububi babo wathi: Bazenzisi, lingilingelani?

¹⁹Ngitshengisani imali yokuthela. Basebemlethela udenariyo*.

²⁰Wasesithi kubo: Ngokabani lumfanekiso lalumbhalo?

²¹Bathi: NgokaKesari. Wasesithi kubo: Ngakho mnikeni uKesari izinto zikaKesari; loNkulunkulu izinto zikaNkulunkulu.

²²Kwathi sebezwile bamangala; bamtshiya bahamba.

²³Ngalolosuku kweza kuye abaSadusi, abathi kakukho ukuvuka kwabafileyo, basebembuza,

²⁴besithi: Mfundisi, uMozisi wathi: Uba umuntu esifa engelabantwana, umfowabo uzamthatha umkakhe, amvusele umfowabo inzalo.

²⁵Kwakukhona phakathi kwethu izelamani eziyisikhombisa; owokuqala wasethatha umfazi wafa; futhi engelanzalo, watshiya umkakhe kumfowabo.

²⁶Kwaba njalo lowesibili, lowesithathu, kwaze kwaba kowesikhombisa.

²⁷Kwathi emva kwabo bonke kwafa lomfazi.

²⁸Ngakho ekuvukeni kwabafileyo, uzakuba ngumkabani kwabayisikhombisa? Ngoba bonke babelaye.

²⁹Kodwa uJesu waphendula wathi kubo: Liduhile, lingayazi imibhalo, loba amandla kaNkulunkulu;

³⁰ngoba ekuvukeni kwabafileyo kabathathani, kabendiswa, kodwa banjengengilosi zikaNkulunkulu ezulwini.

³¹Kodwa mayelana lokuvuka kwabafileyo, kalifundanga yini okwakhulunywa kini nguNkulunkulu, esithi:

³²Mina nginguNkulunkulu kaAbrahama, loNkulunkulu kaIsaka, loNkulunkulu kaJakobe? UNkulunkulu kayisuye uNkulunkulu wabafileyo, kodwa owabaphilayo.

³³Kwathi amaxuku ekuzwa amangala kakhulu ngokufundisa kwakhe.

³⁴Kwathi abaFarisi, sebezwile ukuthi uJesu ubaqume umlomo abaSadusi, babuthana ndawonye.

³⁵Lomunye wabo, isazumthetho, wa m buza, emlinga, esithi:

³⁶Mfundisi, yiwuphi umlayo omkhulu emthethweni?

³⁷UJesu wasesithi kuye: Wothanda iNkosi uNkulunkulu wakho, ngenhliziyo yakho yonke, langomphefumulo wakho wonke, langengqondo yakho yonke;

³⁸yiwo lowo umlayo owokuqala lomkhulu.

³⁹Lowesibili ufanana lawo uthi: Wothanda umakhelwane wakho njengalokhu uzi thanda wena.

⁴⁰Kuleyomilayo emibili kumisiwe umthetho wonke labaprofethi.

⁴¹Kwathi sebebuthene abaFarisi, uJesu wababuza,

⁴²esithi: Licabangani ngoKristu? Uyindodana kabani? Bathi kuye: NgekaDavida.

⁴³Wathi kubo: Pho uDavida wambiza njani ekuMoya ngokuthi yiNkosi, esithi:

⁴⁴INkosi yathi eNkosini yami: Hlala ngakwesokunene sami, ngize ngenze izitha zakho zibe yisenabelo senyawo zakho?

⁴⁵Ngakho uba uDavida embiza ngokuthi yiNkosi, uyiNdodana yakhe njani?

⁴⁶Njalo kwakungekho owayengamphendula ilizwi; kusukela ngalolosuku kakwabe kusaba khona umuntu olesibindi sokumbuza.