Read Ndebele-IBhayibhili Elingcwele 2006 Umatewu 24 Bible Online

Umatewu 24 - Ndebele-IBhayibhili Elingcwele 2006 bible

Umatewu 24

¹UJesu wasephuma wasuka ethempelini; basebesondela abafundi bakhe ukumtshengisa izakhiwo zethempeli.

²UJesu wasesithi kubo: Kaliziboni yini zonke lezizinto? Ngiqinisile ngithi kini: Akusoze kutshiywe lapha ilitshe elilodwa phezu kwelitshe, elingasoze lidilizelwe phansi.

³Kwathi esehlezi entabeni yeMihlwathi, abafundi beza kuye bebodwa, bathi: Sitshele, lezizinto zizakuba nini? Lesibonakaliso sokuza kwakho, lesokuphela kwesikhathi sizakuba yini?

⁴UJesu wasephendula wathi kubo: Qaphelani, kungabi khona oliduhisayo;

⁵ngoba abanengi bazakuza ngebizo lami, besithi: Mina nginguKristu; futhi baduhise abanengi.

⁶Njalo lizakuzwa ngezimpi lamahungahunga ezimpi; nanzelelani, lingethuki; ngoba konke lokhu kufanele kwenzeke; kodwa ukuphela kakukabi khona.

⁷Ngoba isizwe sizavukela isizwe, lombuso u vuk ele umbuso; njalo kuzakuba khona indlala labomatshayabhuqe bezifo lokuzamazama komhlaba indawo ngendawo;

⁸kodwa zonke lezizinto ziyikuqala kwemihelo.

⁹Lapho-ke bazalinikela ekuhluphekeni, balibulale; futhi lizazondwa yizizwe zonke ngenxa yebizo lami.

¹⁰Njalo ngalesosikhathi abanengi bazakhubeka, banikelane, bazondane.

¹¹Futhi kuzavuka abaprofethi bamanga abanengi, baduhise abanengi.

¹²Njalo ngenxa yokwanda kobubi, uthando lwabanengi luzaphola;

¹³kodwa ophikelelayo kuze kube sekupheleni, nguye ozasindiswa.

¹⁴Njalo lelivangeli lombuso lizatshunyayelwa emhlabeni wonke kube yibufakazi ezizweni zonke; khona-ke kuzafika ukuphela.

¹⁵Ngakho nxa libona amanyala encithakalo, akhulunywa nguDaniyeli umprofethi, emi endaweni engcwele (obalayo kaqedisise),

¹⁶khona labo abaseJudiya kababalekele ezintabeni;

¹⁷ophezu kophahla lwendlu angehli ukuthatha ulutho endlini yakhe;

¹⁸losemasimini angabuyeli emuva uku ya thatha izembatho zakhe.

¹⁹Kodwa maye kwabakhulelweyo labamunyisayo ngalezonsuku !

²⁰Kodwa khulekani ukuthi ukubaleka kwenu kungabi sebusika, loba ngesabatha.

²¹Ngoba ngalesosikhathi kuzakuba khona ukuhlupheka okukhulu, okungazanga kube khona kusukela ekuqaleni komhlaba kuze kube khathesi, njalo okungasayikuba khona.

²²Uba-ke lezonsuku bezingafinyezwanga, bekungesindiswe nyama; kodwa ngenxa yabakhethiweyo lezonsuku zizafinyezwa.

²³Ngalesosikhathi nxa umuntu esithi kini: Khangelani, nangu uKristu, kumbe nanguya, lingakholwa.

²⁴Ngoba kuzavuka okristu bamanga labaprofethi bamanga, benze izibonakaliso ezinkulu lezimangaliso, ukuze kuthi, nxa kungenzeka, baduhise labakhethiweyo.

²⁵Khangelani, sengilitshelile ngaphambili.

²⁶Ngakho uba bengathi kini: Khangelani, usenkangala, lingaphumi; khangelani, us endlini yensitha, lingakholwa.

²⁷Ngoba njengalokhu umbane ubaneka empumalanga ukhanye lentshonalanga, kuzakuba njalo lokufika kweNdodana yomuntu.

²⁸Ngoba loba ngaphi lapho okukhona isidumbu, lapho amanqe azakubuthana khona.

²⁹Njalo masinyane emva kokuhlupheka kwalezonsuku, ilanga lizafiphazwa, lenyanga kayiyikupha ukukhanya kwayo, lenkanyezi zizakuwa ezulwini, lamandla amazulu azazanyazanyiswa.

³⁰Khona-ke sizabonakala ezulwini isibonakaliso seNdodana yomuntu; njalo besezikhala zonke izizwe zomhlaba, sezibona iNdodana yomuntu isiza emayezini ezulu ilamandla lenkazimulo enkulu.

³¹Njalo izathuma izingilosi zayo lokukhala okukhulu kophondo, beseziqoqa abakhethiweyo bayo emimoyeni emine, kusukela emkhawulweni omunye wamazulu kuze kube komunye umkhawulo wawo.

³²Kodwa fundani umfanekiso emkhiweni; nxa khathesi ugatsha lwawo selusiba buthakathaka, njalo luhlume amahlamvu, liyazi ukuthi ihlobo seliseduze;

³³ngokunjalo lani, nxa libona lezizinto zonke, yazini ukuthi kuseduze kuseminyango.

³⁴Ngiqinisile ngithi kini: Lesisizukulwana asisoze sidlule, kuze kwenzeke zonke lezizinto.

³⁵Kuzadlula izulu lomhlaba, kodwa amazwi ami awasoze adlule.

³⁶Kodwa lolosuku lehola kakho owaziyo ngalo, ngitsho lezingilosi zemazulwini, ngaphandle kukaBaba kuphela.

³⁷Kodwa njengensuku zikaNowa, kuzakuba njalo ukufika kweNdodana yomuntu.

³⁸Ngoba njengakulezonsuku ezaziphambili kukazamcolo babesidla benatha, bethatha besendiswa, kwaze kwafika usuku uNowa angena ngalo emkhunjini,

³⁹njalo babengazi, kwaze kwafika uzamcolo wasebasusa bonke, kuzakuba njalo lokufika kweNdodana yomuntu.

⁴⁰Ngalesosikhathi kuzakuba khona ababili ensimini; omunye athathwe, lomunye atshiywe;

⁴¹kuzakuthi abesifazana ababili bechola elitsheni; omunye athathwe, lomunye atshiywe.

⁴²Ngakho lindani, ngoba kalazi ukuthi iNkosi yenu izafika ngaliphi ihola.

⁴³Kodwa yazini lokhu, ukuthi uba umninindlu ebewazi umlindo isela elizafika ngawo, ubezalinda, futhi ubengayikuvuma ukuthi indlu yakhe ifohlelwe.

⁴⁴Ngakho lani-ke hlalani lilungile; ngoba ngehola elingalicabangiyo, iNdodana yomuntu izakuza.

⁴⁵Pho ngubani inceku ethembekileyo lehlakaniphileyo, inkosi yayo eyibeke phezu kwabendlu yayo, ukuthi ibanike ukudla ngesikhathi esifaneleyo?

⁴⁶Ibusisiwe leyonceku, okuzakuthi inkosi yayo nxa ifika izayifica isenza njalo.

⁴⁷Ngiqinisile ngithi kini: Izayibeka phezu kwakho konke elakho.

⁴⁸Kodwa nxa leyonceku embi isithi enhliziyweni yayo: Inkosi yami iphuzile ukubuya,

⁴⁹njalo ibisiqala ukutshaya abayizinceku kanye layo, lokudla lokunatha lezidakwa,

⁵⁰inkosi yaleyonceku izafika ngosuku enga yi lindele ngalo, langehola engalaziyo,

⁵¹izayiquma phakathi, izanika isabelo sayo labazenzisi; kuzakuba khona lapho ukukhala lokugedla amazinyo.