Read Ndebele-IBhayibhili Elingcwele 2006 Umatewu 25 Bible Online

Umatewu 25 - Ndebele-IBhayibhili Elingcwele 2006 bible

Umatewu 25

¹Ngalesosikhathi umbuso wamazulu uzafananiswa lentombi ezilitshumi ezathatha izibane zazo zaphuma ukuhlangabeza umyeni.

²Njalo ezinhlanu zazo zazihlakaniphile, lezinhlanu zaziyizithutha.

³Eziyizithutha zathatha izibane zazo, kazithathanga amafutha kanye lazo;

⁴kodwa ezihlakaniphileyo zathatha amafutha ezitsheni kanye lezibane zazo.

⁵Kwathi umyeni esephuzile, zawozela zonke zalala ubuthongo.

⁶Kodwa phakathi kobusuku kwamenyezwa: Khangelani, umyeni uyeza, phumani liyemhlangabeza!

⁷Zasezivuka lezontombi zonke, zalungisa izibane zazo.

⁸Eziyizithutha zasezisithi kwezihlakaniphileyo: Sipheni okwamafutha enu, ngoba izibane zethu ziyacitsha.

⁹Kodwa ezihlakaniphileyo zaphendula, zathi: Hlezi angaseneli thina lani; kodwa kungcono ukuthi lihambe liye kwabathengisayo lizithengele.

¹⁰Kwathi zisiyathenga, weza umyeni. Ezasezilungile zasezingena laye emtshadweni, kwasekuvalwa umnyango.

¹¹Kwathi emva kwalokho zafika lalezontombi ezinye, zathi: Nkosi, Nkosi, sivulele !

¹²Kodwa yena waphendula wathi: Ngiqinisile ngithi kini: Angilazi lina.

¹³Ngakho lindani, ngoba kalilwazi usuku lehola iNdodana yomuntu efika ngalo.

¹⁴Ngoba kunjengomuntu owaya kwelinye ilizwe wabiza inceku zakhe, wazinika impahla zakhe;

¹⁵kwathi enye wayinika amathalenta* amahlanu, lenye amabili, lenye lalinye, kwaba yileyo laleyo njengamandla ayo; njalo wahle wasuka.

¹⁶Leyo eyayemukele amathalenta amahlanu yasihamba yathengiselana ngawo, yenza amanye amathalenta amahlanu.

¹⁷Ngokunjalo laleyo e la mabili, layo yazuza amanye amabili.

¹⁸Kodwa leyo eyayemukele elilodwa yasuka yagebha emhlabathini yayifihla imali yenkosi yayo.

¹⁹Kwathi emva kwesikhathi eside inkosi yalezozinceku yafika, yasilandiselana lazo.

²⁰Kwasekusiza eyayemukele amathalenta amahlanu yaletha amanye amathalenta amahlanu, yathi: Nkosi, wanginika amathalenta amahlanu; khangela, ngizuzile amanye amathalenta amahlanu phezu kwawo.

²¹Inkosi yayo yasisithi kiyo: Kuhle, nceku elungileyo lethembekileyo, ubuthembekile ezintweni ezinlutshwana, ngizakubeka phezu kwezinengi; ngena entokozweni yenkosi yakho.

²²Kwasekusiza laleyo eyayemukele amathalenta amabili yathi: Nkosi, wanginika amathalenta amabili; khangela, ngizuzile amanye amathalenta amabili phezu kwawo.

²³Inkosi yayo yathi kiyo: Kuhle, nceku elungileyo lethembekileyo, ubuthembekile ezintweni ezinlutshwana, ngizakubeka phezu kwezinengi; ngena entokozweni yenkosi yakho.

²⁴Kodwa kweza laleyo eyayemukele ithalenta elilodwa yathi: Nkosi, bengikwazi wena ukuthi ungumuntu olukhuni, uvuna lapho ongahlanyelanga khona, njalo ubutha lapho ongahlakazanga khona;

²⁵ngasengisesaba, ngasuka ngalifihla ithalenta lakho emhlabathini; khangela, ulokwakho.

²⁶Kodwa inkosi yayo yaphendula yathi kiyo: Nceku embi lelivila, ubusazi ukuthi ngivuna lapho engingahlanyelanga khona, njalo ngibutha lapho engingahlakazanga khona;

²⁷ngakho ngabe ubekile imali yami ebhanga, njalo ekufikeni kwami ngabe ngemukele okwami lenzuzo.

²⁸Ngakho mthatheleni ithalenta, li li nike yena olamathalenta alitshumi.

²⁹Ngoba wonke olakho uzaphiwa, uzakwengezelelwa; kodwa ongelakho uzathathelwa lalokho alakho.

³⁰Laleyonceku engasizi lutho iphoseleni emnyameni ongaphandle; kuzakuba khona lapho ukukhala lokugedla amazinyo.

³¹Njalo nxa isiza iNdodana yomuntu ngobukhosi bayo, lengilosi ezingcwele zonke laye, khona izahlala esihlalweni sobukhosi sodumo lwayo,

³²kuzabuthelwa phambi kwayo izizwe zonke, njalo izabehlukanisa abanye kwabanye, njengomelusi esehlukanisa izimvu embuzini;

³³ibisibeka izimvu ngakwesokunene sayo, kodwa imbuzi ngakwesokhohlo.

³⁴Khona-ke iNkosi izakuthi kubo abangakwesokunene sayo: Wozani, lina elibusisiweyo nguBaba, lidle ilifa lombuso eliwulungiselweyo kusukela ekusekelweni komhlaba.

³⁵Ngoba ngangilambile, langinika ukudla; ngangomile, langinathisa; ngangingowemzini, langemukela;

³⁶ngangize, langigqokisa; ngangigula, leza ukungibona; ngangisentolongweni, leza kimi.

³⁷Khona abalungileyo bezayiphendula, besithi: Nkosi, sakubona nini ulambile, njalo sa ku nika ukudla, kumbe womile, njalo sa ku nathisa?

³⁸Njalo sakubona nini ungowemzini, futhi sa kw emukela, kumbe uze, futhi sa ku gqokisa?

³⁹Njalo sakubona nini ugula, loba usentolongweni, njalo seza kuwe?

⁴⁰Futhi iNkosi izaphendula ithi kubo: Ngiqinisile ngithi kini: Njengoba li kw enzile komunye walaba abazalwane bami abancinyane, li kw enzile kimi.

⁴¹Ngalesosikhathi izakuthi njalo kubo abangakwesokhohlo: Sukani kimi, lina eliqalekisiweyo, liye emlilweni olaphakade, olungiselwe uSathane lengilosi zakhe.

⁴²Ngoba ngangilambile, kodwa kalinginikanga ukudla; ngangomile, kodwa kalinginathisanga;

⁴³ngangingowemzini, kodwa kalingemukelanga; ngangi ze, kodwa kalingigqokisanga; ngangi gula, ngangi sentolongweni, kodwa kalizanga ukungibona.

⁴⁴Khona lalaba bezamphendula, besithi: Nkosi, sakubona nini ulambile, loba womile, loba ungowemzini, loba uze, loba ugula, loba usentolongweni, kodwa kasakusiza?

⁴⁵Isizabaphendula, ithi: Ngiqinisile ngithi kini: Njengoba linga kw enzanga komunye walaba abancinyane, kali kw enzanga lakimi.

⁴⁶Lalaba bazakuya ekujezisweni okulaphakade; kodwa abalungileyo empilweni elaphakade.