Read Ndebele-IBhayibhili Elingcwele 2006 Umatewu 26 Bible Online

Umatewu 26 - Ndebele-IBhayibhili Elingcwele 2006 bible

Umatewu 26

¹Kwasekusithi uJesu eseqedile wonke lamazwi, wathi kubafundi bakhe:

²Liyazi ukuthi emva kwensuku ezimbili kuzakuba liphasika, leNdodana yomuntu izanikelwa ukuze ibethelwe.

³Kwasekubuthana abapristi abakhulu lababhali labadala besizwe egumeni lompristi omkhulu othiwa nguKayafasi,

⁴basebecebisana ukuthi bambambe uJesu ngobuqili ba m bulale.

⁵Kodwa bathi: Kungabi ngomkhosi, hlezi kube khona isiphithiphithi ebantwini.

⁶Kwathi uJesu eseBethani endlini kaSimoni umlephero,

⁷kwafika kuye owesifazana ephethe umfuma we-alibasta* ulamagcobo aligugu elikhulu, wase wu thululela ekhanda lakhe ehlezi ekudleni.

⁸Kodwa abafundi bebona lokhu bathukuthela, bathi: Ngokwani ukumotsha lokhu?

⁹Ngoba la amagcobo angathengiswa ngokunengi, besekunikwa abayanga.

¹⁰Kodwa uJesu ekwazi wathi kubo: Limhluphelani owesifazana? Ngoba wenzile umsebenzi omuhle kimi;

¹¹ngoba abayanga lihlala lilabo, kodwa mina kalihlali lilami.

¹²Ngoba ngokuthululela amagcobo emzimbeni wami, u kw enzele umngcwabo wami.

¹³Ngiqinisile ngithi kini: Loba ngaphi emhlabeni wonke lapho okuzatshunyayelwa khona lelivangeli, lalokho akwenzileyo kuzakhulunywa ngakho, kube yisikhumbuzo ngaye.

¹⁴Omunye wabalitshumi lambili, othiwa nguJudasi Iskariyothi, wasesiya kubapristi abakhulu,

¹⁵wathi: Lizanginikani, mina-ke ngizamnikela kini? Basebevumelana laye ngenhlamvu zesiliva ezingamatshumi amathathu.

¹⁶Njalo kusukela lapho wadinga ithuba elihle lokumnikela.

¹⁷Kwathi ngolokuqala lwesinkwa esingelamvubelo abafundi beza kuJesu, besithi kuye: Uthanda ukuthi sikulungisele ngaphi ukuthi udle iphasika?

¹⁸Wasesithi: Hambani liye emzini kusibanibani, lithi kuye: UMfundisi uthi: Isikhathi sami sesiseduze; ngizakwenza iphasika kwakho kanye labafundi bami.

¹⁹Benza-ke abafundi njengoba uJesu ebalayile, basebelungisa iphasika.

²⁰Kwathi ifika intambama wayehlezi labalitshumi lambili.

²¹Bathi besidla wathi: Ngiqinisile ngithi kini: Omunye wenu uzanginikela.

²²Basebedabuka kakhulu baqala ukuthi kuye ngamunye wabo: Nkosi, yimi yini?

²³Wasephendula wathi: Ofaka isandla sakhe kanye lami emganwini, nguye ozanginikela.

²⁴Sibili iNdodana yomuntu ihamba, njengokulotshiweyo ngayo; kodwa maye kulowomuntu iNdodana yomuntu enikelwa nguye ! Bekungakuhle kuye aluba lowomuntu wayengazalwanga.

²⁵Wasephendula uJudasi owamnikelayo wathi: Rabi*, yimi yini? Wathi kuye: Utshilo wena.

²⁶Kwathi besidla, uJesu wathatha isinkwa, wase si busisa, wa si hlephula wabanika abafundi, wathi: Thathani, lidle; lokhu kungumzimba wami.

²⁷Wasethatha inkezo, wabonga, wabanika, esithi: Nathani lonke kuyo;

²⁸ngoba lokhu kuligazi lami, elesivumelwano esitsha, elichithelwa abanengi kukho ukuthethelelwa kwezono.

²⁹Kodwa ngithi kini: Kusukela khathesi kangiyikunatha okwalesisithelo sevini, kuze kufike lolosuku lapho ngizasinatha lani sisitsha embusweni kaBaba.

³⁰Kwathi sebehlabele ingoma yokudumisa baphuma baya entabeni yeMihlwathi.

³¹UJesu wasesithi kubo: Lina lonke lizakhubeka ngami ngalobubusuku; ngoba kulotshiwe ukuthi: Ngizatshaya umelusi, izimvu zomhlambi besezihlakazeka.

³²Kodwa emva kokuvuswa kwami, ngizalandulela ukuya eGalili.

³³Kodwa uPetro waphendula wathi kuye: Lanxa bonke bezakhubeka ngawe, mina angisoze ngikhubeke.

³⁴UJesu wathi kuye: Ngiqinisile ngithi kuwe: Ngalobubusuku, lingakakhali iqhude, uzangiphika kathathu.

³⁵UPetro wathi kuye: Loba kudingeka ngife lawe, angisoze ngikuphike. Basebesitsho njalo bonke abafundi.

³⁶UJesu wasefika labo endaweni ethiwa yiGetsemane, wasesithi kubafundi: Hlalani phansi lapha, ngisayakhuleka laphaya.

³⁷Wasethatha kanye laye uPetro lamadodana amabili kaZebediya, waqala ukudabuka lokukhathazeka kakhulu.

³⁸Wasesithi kubo: Umphefumulo wami udabukile kakhulu kuze kube sekufeni; hlalani lapha lilinde lami.

³⁹Waseqhubeka ibangana, wawa ngobuso bakhe wakhuleka wathi: Baba, uba kungenzeka, kakudlule kimi linkezo; kodwa kungabi njengoba ngithanda mina, kodwa njengoba uthanda wena.

⁴⁰Wasesiza kubafundi, wabafica belele, wathi kuPetro: Kanti belingelinde lami ihola ibenye?

⁴¹Lindani likhuleke, ukuze lingangeni ekulingweni; umoya uyavuma, kodwa inyama ibuthakathaka.

⁴²Wabuya wasuka ngokwesibili wakhuleka, wathi: Baba, uba inkezo le ingedlule kimi, ngaphandle kokuthi ngiyinathe, kayenziwe intando yakho.

⁴³Wasebuya wabafica futhi belele, ngoba amehlo abo ayenzima.

⁴⁴Wasebatshiya wahamba futhi wakhuleka ngokwesithathu, esitsho wona lawomazwi.

⁴⁵Wasesiza kubafundi bakhe, wathi kubo: Qhubekani lilele liphumule; khangelani, isikhathi sesisondele, futhi iNdodana yomuntu iyanikelwa ezandleni zezoni.

⁴⁶Sukumani, sihambe; khangelani, onginikelayo useduze.

⁴⁷Kwathi esakhuluma, khangela, kwafika uJudasi, omunye wabalitshumi lambili, lexuku elikhulu lilaye elilezinkemba lezinduku, livela kubapristi abakhulu labadala besizwe.

⁴⁸Laye omnikelayo wayebanike isiboniso, esithi: Lowo engizamanga, nguye; limbambe.

⁴⁹Njalo wahle wasondela kuJesu wathi: Mpilo enhle, Rabi ! Wasemanga.

⁵⁰UJesu wasesithi kuye: Mngane, ulandeni? Basebesondela bamdumela uJesu ngezandla, bambamba.

⁵¹Futhi khangela, omunye walabo ababeloJesu welula isandla, wakhokha inkemba yakhe, wagadla inceku yompristi omkhulu waquma indlebe yayo.

⁵²UJesu wasesithi kuye: Buyisela inkemba yakho endaweni yayo; ngoba bonke ababamba inkemba bazabhubha ngenkemba.

⁵³Kumbe ucabanga ukuthi ngingemcele uBaba yini khathesi, futhi anginike amabutho amakhulu ezingilosi edlula itshumi lambili?

⁵⁴Pho ingagcwaliseka njani imibhalo, ukuthi kumele ukuthi kube njalo?

⁵⁵Ngalelohola uJesu wathi emaxukwini: Liphume njengokuyamelana lomphangi yini lilezinkemba lezinduku ukuzangibamba? Bengihlezi insuku ngensuku ethempelini ngifundisa, kodwa kalingibambanga.

⁵⁶Kodwa konke lokhu kwenzakele, ukuze kugcwaliseke imibhalo yabaprofethi. Basebemtshiya bonke abafundi babaleka.

⁵⁷Lababembambile uJesu ba m qhuba bamusa kuKayafasi umpristi omkhulu, lapho ababebuthene khona ababhali labadala.

⁵⁸Kodwa uPetro wamlandela ekhatshana, kwaze kwaba segumeni lompristi omkhulu, njalo wangena phakathi wahlala phansi lezinceku, ukuze abone isicino.

⁵⁹Njalo abapristi abakhulu labadala lomphakathi wonke badinga ubufakazi bamanga obumelana loJesu, ukuze bambulale,

⁶⁰kodwa kaba bu tholanga; lanxa kwavela abafakazi abanengi bamanga, aba bu tholanga. Kwathi emva kwalokho kwavela ababili abafakazi bamanga,

⁶¹bathi: Lo wathi: Ngilakho ukudiliza ithempeli likaNkulunkulu, njalo ngilakhe ngensuku ezintathu.

⁶²Kwasekusukuma umpristi omkhulu wathi kuye: Kawuphenduli lutho yini? Bafakazani laba okumelana lawe?

⁶³Kodwa uJesu wathula. Umpristi omkhulu wasephendula wathi kuye: Ngikufungisa ngoNkulunkulu ophilayo, ukuthi usitshele ukuthi unguKristu, iNdodana kaNkulunkulu.

⁶⁴UJesu wathi kuye: Utshilo wena. Kodwa ngithi kini: Kusukela khathesi lizabona iNdodana yomuntu ihlezi ngakwesokunene samandla isiza phezu kwamayezi ezulu.

⁶⁵Umpristi omkhulu wasedabula izembatho zakhe, wathi: Usehlambazile; sisadingelani abafakazi? Khangelani, khathesi seliyizwile inhlamba yakhe;

⁶⁶licabangani? Basebephendula besithi: Ulecala lokufa.

⁶⁷Basebemkhafulela amathe ebusweni bamdutshuza; labanye bamwakala,

⁶⁸bathi: Profetha kithi, Kristu, ngubani okutshayileyo?

⁶⁹UPetro wayesehlezi ngaphandle egumeni; kwasekusiza kuye incekukazi ethile, yathi: Lawe ubuloJesu weGalili.

⁷⁰Kodwa waphika phambi kwabo bonke, wathi: Kangikwazi lokho okutshoyo.

⁷¹Kwathi esephuma esiya esangweni, enye incekukazi yambona, yathi kwababekhona: Laye lo ubeloJesu weNazaretha.

⁷²Wasebuya ephika ngesifungo esithi: Kangimazi lumuntu.

⁷³Kwathi emva kwesikhatshana labo ababemi khona basondela bathi kuPetro: Ngeqiniso lawe ungowabo; ngoba lokukhuluma kwakho kuyakuveza.

⁷⁴Waseqala ukuqalekisa lokufunga esithi: Kangimazi lumuntu. Njalo lahle lakhala iqhude.

⁷⁵UPetro wasekhumbula ilizwi likaJesu esithi kuye: Lingakakhali iqhude, uzangiphika kathathu. Wasephumela ngaphandle wakhala ngokubabayo.