Read Ndebele-IBhayibhili Elingcwele 2006 Umatewu 27 Bible Online

Umatewu 27 - Ndebele-IBhayibhili Elingcwele 2006 bible

Umatewu 27

¹Kwathi sekusile, bonke abapristi abakhulu labadala babantu bacebisana ngoJesu ukuthi bambulale;

²sebembophile ba m qhuba bamnikela kuPontiyusi Pilatu umbusi.

³Kwathi uJudasi owamnikelayo esebonile ukuthi ulahliwe, wazisola wabuyisela inhlamvu zesiliva ezingamatshumi amathathu kubapristi abakhulu labadala,

⁴wathi: Ngonile nginikele igazi elingelacala. Kodwa bona bathi: Kulani lathi? Zibonele wena.

⁵Wasephosela inhlamvu zesiliva ethempelini, wasuka; wayaziphanyeka.

⁶Abapristi abakhulu basebethatha inhlamvu zesiliva bathi: Kakuvunyelwa ukuzifaka emnikelweni, ngoba ziyintengo yegazi.

⁷Basebecebisana bathenga ngazo isiqinti sombumbi, sibe ngesokungcwaba abezizwe.

⁸Ngakho lesosiqinti sathiwa yisiqinti segazi, kuze kube lamuhla.

⁹Kwasekugcwaliseka okwakhulunywa ngumprofethi uJeremiya, esithi: Basebethatha inhlamvu zesiliva ezingamatshumi amathathu, intengo yalowo owalinganiswayo, abantwana bakoIsrayeli abamlinganisayo;

¹⁰basebebapha zona ngensimu yombumbi, njengoba iNkosi ingilayile.

¹¹UJesu wasesima phambi kombusi; umbusi wasembuza, wathi: Wena uyiNkosi yamaJuda yini? UJesu wasesithi: Utshilo wena.

¹²Kwathi nxa esemangalelwe ngabapristi abakhulu labadala, kaphendulanga lutho.

¹³UPilatu wasesithi kuye: Kawuzwa yini izinto ezingaka abazifakaza ngawe?

¹⁴Kodwa kamphendulanga lakwelilodwa ilizwi, waze wamangala kakhulu umbusi.

¹⁵Futhi ngomkhosi umbusi wayejwayele ukukhululela ixuku isibotshwa esisodwa, elisifunayo.

¹⁶Njalo ngalesosikhathi babelesibotshwa esidumileyo, esithiwa nguBarabasi.

¹⁷Ngakho sebebuthene, uPilatu wathi kubo: Lithanda ukuthi ngilikhululele bani, uBarabasi, kumbe uJesu othiwa nguKristu?

¹⁸Ngoba wayekwazi ukuthi bamnikele ngomona.

¹⁹Kwathi esehlezi esihlalweni sokwahlulela, umkakhe wathumela kuye, wathi: Ungabi landaba lalowo olungileyo; ngoba lamuhla ngihluphekile kakhulu ngaye ephutsheni.

²⁰Kodwa abapristi abakhulu labadala bancengana lamaxuku ukuthi acele uBarabasi, ambhubhise uJesu.

²¹Wasephendula umbusi wathi kubo: Lithanda ukuthi ngilikhululele bani kulaba ababili? Basebesithi: UBarabasi.

²²UPilatu wathi kubo: Pho ngimenzeni uJesu othiwa nguKristu? Bonke bathi kuye: Kabethelwe.

²³Umbusi wasesithi: Ngoba wenze bubi bani? Kodwa bamemeza kakhulu, bathi: Kabethelwe!

²⁴Kwathi uPilatu esebonile ukuthi kakusizi lutho, kodwa kwasekuqala kulalokhu ukuba lesiphithiphithi, wathatha amanzi, wageza izandla phambi kwexuku, wathi: Angilacala ngegazi lalumuntu olungileyo; ziboneleni lina.

²⁵Bonke abantu basebephendula bathi: Igazi lakhe kalibe phezu kwethu laphezu kwabantwana bethu.

²⁶Wasebakhululela uBarabasi; kodwa esemtshaye ngesiswepu uJesu wa m nikela ukuthi abethelwe.

²⁷Abebutho bombusi basebemngenisa uJesu endlini yombusi, baqoqela kuye ibutho lonke;

²⁸bamhlubula, bamgqokisa isembatho esibomvu,

²⁹sebelukile umqhele wameva, bamethesa wona ekhanda, bamphathisa lomhlanga esandleni sakhe sokunene; baguqa phambi kwakhe bamklolodela, bathi: Bayethe, Nkosi yamaJuda !

³⁰Bamkhafulela amathe, bathatha umhlanga, batshaya ikhanda lakhe.

³¹Sebemklolodele, bamhlubula isembatho, bamgqokisa izigqoko zakhe, bamqhuba ukuze ba m bethele.

³²Kwathi sebephuma, bafica umuntu weKurene, uSimoni ngebizo; bambamba ngamandla lowo ukuthi athwale isiphambano sakhe.

³³Sebefikile endaweni ethiwa yiGolgotha, okuyikuthi iNdawo yokhakhayi,

³⁴bamnika iviniga elixutshaniswe lenyongo ukuze alinathe; kodwa eselizwile kavumanga ukunatha.

³⁵Futhi sebembethele, babelana izembatho zakhe, benza inkatho yokuphosa; ukuze kugcwaliseke okwakhulunywa ngumprofethi ukuthi: Babelana izembatho zami, benza inkatho yokuphosa ngesigqoko sami.

³⁶Njalo sebehlala phansi bamlinda khona.

³⁷Babeka ngaphezu kwekhanda lakhe incwadi yecala lakhe ilotshiwe ukuthi: LO NGUJESU INKOSI YAMAJUDA.

³⁸Kwasekubethelwa abaphangi ababili kanye laye, omunye ngakwesokunene lomunye ngakwesokhohlo.

³⁹Labadlulayo bamhlambaza, benikina amakhanda abo,

⁴⁰besithi: Wena odiliza ithempeli ulakhe ngensuku ezintathu, zisindise; uba uyiNdodana kaNkulunkulu, yehla esiphambanweni.

⁴¹Langokunjalo labapristi abakhulu labo bekloloda kanye lababhali labadala bathi:

⁴²Wasindisa abanye, yena angezisindise. Uba eyiNkosi yakoIsrayeli, kehle khathesi esiphambanweni, futhi sizamkholwa.

⁴³Wathemba kuNkulunkulu; kamkhulule khathesi, uba emthanda. Ngoba wathi: NgiyiNdodana kaNkulunkulu.

⁴⁴Labaphangi ababebethelwe kanye laye bamyangisa ngokufananayo.

⁴⁵Njalo kusukela ngehola lesithupha kwaba lobumnyama emhlabeni wonke kwaze kwaba lihola lesificamunwemunye*;

⁴⁶sekungaba lihola lesificamunwemunye uJesu wamemeza ngelizwi elikhulu, wathi: "Eli, Eli, lama sabaktani?" Okuyikuthi: Nkulunkulu wami, Nkulunkulu wami, ungitshiyeleni?

⁴⁷Njalo abanye kwababemi khona besizwa bathi: Lo ubiza uElija.

⁴⁸Njalo omunye wabo wahle wagijima, wathatha uzipho, wa lu gcwalisa ngeviniga, wa lu hloma emhlangeni, wamnika ukuthi anathe.

⁴⁹Kodwa abanye bathi: Yekelani sibone ukuthi uElija uzakuza amsindise.

⁵⁰UJesu wasebuya ememeza ngelizwi elikhulu wanikela umoya.

⁵¹Futhi khangela, iveyili lethempeli ladatshulwa incezu ezimbili laqala phezulu lisiya phansi; lomhlaba wazamazama; lamadwala aqhekezeka;

⁵²lamangcwaba avuleka; lezidumbu ezinengi zabangcwele abasebelele zavuswa;

⁵³sebephumile emangcwabeni emva kokuvuka kwakhe bangena emzini ongcwele, babonakala kwabanengi.

⁵⁴Kwathi induna yekhulu lalabo ababelayo belinde uJesu, sebebonile ukuzamazama komhlaba lezinto ezenzekileyo, besaba kakhulu, bathi: Ngeqiniso lo ubeyiNdodana kaNkulunkulu.

⁵⁵Kwakukhona lapho abesifazana abanengi bebukele bekhatshana, ababemlandele uJesu bevela eGalili, bemncedisa;

⁵⁶okwakukhona phakathi kwabo oMariya Magadalena, loMariya unina kaJakobe loJose, lonina wamadodana kaZebediya.

⁵⁷Kwathi sekuhlwile, kwafika umuntu onothileyo evela eArimathiya, ibizo lakhe linguJosefa, owayengumfundi kaJesu laye;

⁵⁸yena waya kuPilatu, wacela isidumbu sikaJesu. UPilatu waselaya ukuthi isidumbu a sinikwe.

⁵⁹UJosefa wasethatha isidumbu wasigoqela ngelembu elicolekileyo elihlambulukileyo,

⁶⁰wasibeka engcwabeni lakhe elitsha, elaligujiwe edwaleni; wasegiqela ilitshe elikhulu emnyango wengcwaba, wahamba.

⁶¹Futhi kwakukhona lapho uMariya Magadalena, lomunye uMariya, behlezi maqondana lengcwaba.

⁶²Langosuku olulandelayo, olulandela olwamalungiselelo, abapristi abakhulu labaFarisi babuthana kuPilatu,

⁶³besithi: Nkosi, siyakhumbula ukuthi lowomkhohlisi esaphila wathi: Emva kwensuku ezintathu ngizavuka.

⁶⁴Ngakho laya ukuthi ingcwaba liqiniswe kuze kube lusuku lwesithathu; hlezi abafundi bakhe bafike ebusuku bamebe, besebesithi ebantwini: Uvukile kwabafileyo; kuthi inkohliso yokucina ibembi kuleyokuqala.

⁶⁵UPilatu wasesithi kubo: Lilabalindi; hambani, li li qinise njengokubona kwenu.

⁶⁶Bahamba-ke baliqinisa ingcwaba, beliphawula ilitshe, belabalindi.