Read Ndebele-IBhayibhili Elingcwele 2006 Umatewu 4 Bible Online

Umatewu 4 - Ndebele-IBhayibhili Elingcwele 2006 bible

Umatewu 4

¹UJesu wasekhokhelelwa nguMoya enkangala, ukuze alingwe nguSathane.

²Esezile ukudla insuku ezingamatshumi amane lobusuku obungamatshumi amane, ekucineni walamba.

³Kwasekusiza kuye umlingi wathi: Uba uyiNdodana kaNkulunkulu, tshono ukuthi lamatshe abe yizinkwa.

⁴Kodwa yena waphendula wathi: Kulotshiwe ukuthi: Umuntu kayikuphila ngesinkwa sodwa, kodwa ngalo lonke ilizwi eliphuma emlonyeni kaNkulunkulu.

⁵USathane wasemthatha wamusa emzini ongcwele, wasemmisa engqongeni yethempeli,

⁶wasesithi kuye: Uba uyiNdodana kaNkulunkulu, ziwisele phansi; ngoba kulotshiwe ukuthi: Uzalaya ingilosi zakhe ngawe, besezikuphatha ngezandla, hlezi loba nini ukhube unyawo lwakho elitsheni.

⁷UJesu wathi kuye: Kulotshiwe futhi ukuthi: Ungayilingi iNkosi uNkulunkulu wakho.

⁸USathane wabuya wamusa entabeni ende kakhulu, wamtshengisa imibuso yonke yomhlaba lokukhazimula kwayo,

⁹wathi kuye: Zonke lezizinto ngizakunika zona, uba uwela phansi ungikhonza.

¹⁰UJesu wasesithi kuye: Suka, Sathane ! Ngoba kulotshiwe ukuthi: Uzakhothamela eNkosini uNkulunkulu wakho, njalo uzakhonza yona yodwa.

¹¹USathane wasemyekela; njalo khangela, kwafika ingilosi zasezimsebenzela.

¹²Kwathi uJesu esezwile ukuthi uJohane unikelwe entolongweni, wasuka waya eGalili;

¹³wasesuka eNazaretha, weza wahlala eKapenawume engaselwandle, emingceleni yakoZebuloni leyakoNafithali;

¹⁴ukuze kugcwaliseke okwakhulunywa ngumprofethi uIsaya, ukuthi:

¹⁵Ilizwe lakoZebuloni lelizwe lakoNafithali, e ndlel eni yaselwandle, ngaphetsheya kweJordani, iGalili labezizwe,

¹⁶abantu ababehlezi emnyameni babonile ukukhanya okukhulu, lababehlezi elizweni lethunzini lokufa ukukhanya kuphumele kubo.

¹⁷Kusukela kulesosikhathi uJesu waqala ukutshumayela lokuthi: Phendukani; ngoba umbuso wamazulu ususondele.

¹⁸Kwathi uJesu ehambahamba elwandle lweGalili wabona izelamani ezimbili, uSimoni othiwa nguPetro, loAndreya umfowabo, bephosela imbule olwandle; ngoba babengabagoli benhlanzi.

¹⁹Wasesithi kubo: Ngilandelani, njalo ngizalenza libe ngabagoli babantu.

²⁰Bahle-ke batshiya amambule bamlandela.

²¹Eseqhubeke esuka lapho, wabona ezinye izelamani ezimbili, uJakobe okaZebediya loJohane umfowabo, besemkhunjini kanye loZebediya uyise, belungisa amambule abo; wasebabiza.

²²Njalo bahle batshiya umkhumbi loyise bamlandela.

²³UJesu wasebhoda iGalili yonke, efundisa emasinagogeni abo, etshumayela ivangeli lombuso, eselapha sonke isifo lobuthakathaka bonke ebantwini.

²⁴Indumela yakhe yasiphumela kuyo yonke iSiriya; basebeletha kuye bonke abagulayo, ababephethwe yizifo ngezifo lobuhlungu, lababengenwe ngamadimoni, lababelezithuthwane, lezigoga; wasebasilisa.

²⁵Amaxuku amakhulu asemlandela evela eGalili leDikapolisi leJerusalema leJudiya langaphetsheya kweJordani.