Read Ndebele-IBhayibhili Elingcwele 2006 Umatewu 5 Bible Online

Umatewu 5 - Ndebele-IBhayibhili Elingcwele 2006 bible

Umatewu 5

¹Kwathi ebona amaxuku wenyukela entabeni. Esehlezi phansi, abafundi bakhe beza kuye;

²wasevula umlomo wakhe, wabafundisa, wathi:

³Babusisiwe abayanga emoyeni; ngoba umbuso wamazulu ungowabo.

⁴Babusisiwe abalilayo; ngoba bona bazaduduzwa.

⁵Babusisiwe abamnene; ngoba bona bazakudla ilifa lomhlaba.

⁶Babusisiwe abalambela labomela ukulunga; ngoba bona bazasuthiswa.

⁷Babusisiwe abalesihawu; ngoba bona bazahawukelwa.

⁸Babusisiwe abamhlophe ngenhliziyo; ngoba bona bazabona uNkulunkulu.

⁹Babusisiwe abalamulayo; ngoba bona bazathiwa ngabantwana bakaNkulunkulu.

¹⁰Babusisiwe abazingelwayo ngenxa yokulunga; ngoba umbuso wamazulu ungowabo.

¹¹Lina libusisiwe, nxa belithuka belizingela, bekhuluma okubi konke bemelana lani beqamba amanga, ngenxa yami;

¹²thokozani lithabe kakhulu, ngoba umvuzo wenu mkhulu emazulwini; ngoba ngokunjalo babazingela abaprofethi abalandulelayo.

¹³Lina lilitswayi lomhlaba; kodwa uba itswayi seliduma lizatswaywa ngani? Kalisasizi lutho, ngaphandle kokulahlwa phandle beselinyathelwa ngabantu.

¹⁴Lina liyikukhanya komhlaba; umuzi omiswe phezu kwentaba ungesitheke;

¹⁵njalo kabalumathisi isibane basibeke ngaphansi kwesitsha, kodwa phezu kwesiqobane sesibane, besesibakhanyisela bonke abasendlini.

¹⁶Ngokunjalo kakukhanye ukukhanya kwenu phambi kwabantu, ukuze babone imisebenzi yenu emihle, badumise uYihlo osemazulwini.

¹⁷Lingacabangi ukuthi ngize ukuchitha umlayo kumbe abaprofethi; angizanga ukuchitha kodwa ukugcwalisa.

¹⁸Ngoba ngiqinisile ngithi kini: Kuze kudlule izulu lomhlaba, kakusoze kudlule ibadlana libe linye kumbe ichatshana libe linye lomlayo kuze kwenzeke konke.

¹⁹Ngakho owephula owodwa kulimilayo emincinyane, afundise abantu ngokunjalo, uzathiwa ngomncinyane embusweni wamazulu; kodwa oyenzayo ayifundise, lowo uzathiwa mkhulu embusweni wamazulu.

²⁰Ngoba ngithi kini: Ngaphandle kokuthi ukulunga kwenu kwedlule okwababhali lokwabaFarisi, kalisoze lingene embusweni wamazulu.

²¹Lizwile ukuthi kwathiwa kwabasendulo: Ungabulali; laloba ngubani obulalayo, uzakuba lecala lokugwetshwa;

²²kodwa mina ngithi kini: Wonke othukuthelela umfowabo kungelasizatho uzakuba lecala lokugwetshwa; lotshoyo kumfowabo ukuthi: Siphukuphukundini! uzakuba lecala emphakathini; lotshoyo ukuthi: Sithuthandini ! uzakuba lecala elokuya esihogweni somlilo.

²³Ngakho uba uletha umnikelo wakho elathini, ubusukhumbula ulapho ukuthi umfowenu ulolutho olumelana lawe,

²⁴tshiya lapho umnikelo wakho phambi kwelathi, uhambe, uqale ubuyisane lomfowenu, ubusuzonikela umnikelo wakho.

²⁵Phangisa uzwane laye omangalelane lawe usesendleleni laye, hlezi omangalelane lawe akunikele kumahluleli, futhi umahluleli akunikele epholiseni, ubusuphoselwa entolongweni.

²⁶Ngiqinisile ngithi kuwe: Kawusoze uphume khona, uze ubhadale indibilitshi yokucina.

²⁷Lizwile ukuthi kwathiwa kwabasendulo: Ungafebi.

²⁸Kodwa mina ngithi kini: Wonke okhangela owesifazana ukumkhanuka usefebile laye enhliziyweni yakhe.

²⁹Njalo uba ilihlo lakho lokunene likukhubekisa, likhuphe ulilahlele khatshana lawe; ngoba kungcono kuwe ukuthi kubhubhe sibe sinye sezitho zakho, lokuthi umzimba wakho wonke ungaphoselwa esihogweni.

³⁰Njalo uba isandla sakho sokunene sikukhubekisa, siqume usilahlele khatshana lawe; ngoba kungcono kuwe ukuthi kubhubhe sibe sinye sezitho zakho, lokuthi umzimba wakho wonke ungaphoselwa esihogweni.

³¹Kwathiwa-ke: Loba ngubani owala umkakhe, kumele amnike incwadi yesehlukaniso;

³²kodwa mina ngithi kini: Loba ngubani owala umkakhe, ngaphandle kodaba lokufeba, umenza afebe, njalo loba ngubani omthathayo owaliweyo uyafeba.

³³Lizwile futhi ukuthi kwathiwa kwabasendulo: Ungafungi amanga, kodwa gcwalisa izifungo zakho eNkosini.

³⁴Kodwa mina ngithi kini: Lingafungi lakanye; loba ngezulu, ngoba liyisihlalo sobukhosi sikaNkulunkulu;

³⁵loba ngomhlaba, ngoba uyisenabelo senyawo zakhe; loba ngeJerusalema, ngoba ingumuzi weNkosi enkulu;

³⁶njalo ungafungi ngekhanda lakho, ngoba ungelwenze unwele lalunye lube mhlophe kumbe lube mnyama.

³⁷Kodwa ilizwi lenu kalibe ngelokuthi: Yebo yebo, hatshi hatshi; kodwa okudlula lokho kuvela komubi.

³⁸Lizwile ukuthi kwathiwa: Ilihlo ngelihlo, lezinyo ngezinyo;

³⁹kodwa mina ngithi kini: Lingamelani lobubi; kodwa loba ngubani okuwakala esihlathini sokunene, mphendulele lesinye;

⁴⁰lalowo ofuna ukukumangalela lokuthatha isigqoko sakho, mtshiyele lesembatho;

⁴¹laloba ngubani okubamba ngamandla ukuthi uhambe imayili libe linye, hamba laye abe mabili.

⁴²Mnike ocela kuwe; njalo ungamfulatheli ofisa ukweboleka kuwe.

⁴³Lizwile ukuthi kwathiwa: Wothanda umakhelwane wakho, njalo uzonde isitha sakho;

⁴⁴kodwa mina ngithi kini: Thandani izitha zenu, libabusise abaliqalekisayo, libaphathe kuhle abalizondayo, libakhulekele abaliphatha kubi, labalizingelayo;

⁴⁵ukuze libe ngabantwana bakaYihlo osemazulwini, ngoba yena uphumisa ilanga lakhe phezu kwababi labahle, anise izulu phezu kwabalungileyo labangalunganga.

⁴⁶Ngoba aluba lithanda labo abalithandayo, lilomvuzo bani? Kabenzi njalo labathelisi yini?

⁴⁷Futhi uba libingelela abafowenu bodwa, lenzani okukhulu okwedlula okwabanye? Kabenzi njalo labathelisi yini?

⁴⁸Ngakho lina banini ngabapheleleyo, njengoba uYihlo osemazulwini ephelele.