Read Ndebele-IBhayibhili Elingcwele 2006 Umatewu 7 Bible Online

Umatewu 7 - Ndebele-IBhayibhili Elingcwele 2006 bible

Umatewu 7

¹Lingehluleli, ukuze lingehlulelwa,

²ngoba ngokwehlulela elehlulela ngakho lizakwahlulelwa ngakho; langesilinganiso elilinganisa ngaso, lizalinganiselwa ngaso lani.

³Kanti ukhangelelani ucezwana oluselihlweni lomfowenu, kodwa ungalunanzeleli ugodo olukwelakho ilihlo?

⁴Kumbe ungatsho njani kumfowenu ukuthi: Kahle ngikhuphe ucezwana oluselihlweni lakho; khangela kanti ugodo luselihlweni lakho?

⁵Mzenzisi, qala ukhuphe ugodo elihlweni lakho, khona-ke uzabona kuhle ukukhupha ucezwana elihlweni lomfowenu.

⁶Linganiki izinja okungcwele; lingaphoseli amapharele* enu phambi kwezingulube, hlezi ziwanyathele ngenyawo zazo, besezitshibilika ziliklebhule.

⁷Celani, lizaphiwa; dingani, lizathola; qoqodani, lizavulelwa.

⁸Ngoba wonke ocelayo uyemukela, lodingayo uyathola, loqoqodayo uzavulelwa.

⁹Kumbe nguwuphi kini ongathi, nxa indodana yakhe icela isinkwa, ayinike ilitshe?

¹⁰Uba-ke icela inhlanzi, ayinike inyoka yini?

¹¹Ngakho uba lina, elingababi, likwazi ukupha abantwana benu izipho ezinhle, uYihlo osemazulwini uzabapha kakhulu kangakanani izinto ezinhle abacela kuye?

¹²Ngakho konke elithanda ukuthi abantu bakwenze kini, kwenzeni lani ngokunjalo kubo; ngoba lokhu kungumlayo labaprofethi.

¹³Ngenani ngesango elincinyane; ngoba isango likhulu, lendlela ibanzi eya ekubhujisweni, njalo banengi abangena ngalo;

¹⁴ngoba isango lincinyane, lendlela ilukhonjwana eya empilweni, njalo balutshwana abayitholayo.

¹⁵Kodwa nanzelelani abaprofethi bamanga, abeza kini bembathise okwezimvu, kodwa ngaphakathi bazimpisi eziphangayo.

¹⁶Lizabazi ngezithelo zabo; bayazikha yini izithelo zevini emeveni, kumbe imikhiwa ekhuleni oluhlabayo?

¹⁷Ngokunjalo sonke isihlahla esihle siyathela izithelo ezinhle; kodwa isihlahla esibi siyathela izithelo ezimbi;

¹⁸isihlahla esihle singethele izithelo ezimbi, lesihlahla esibi singethele izithelo ezinhle.

¹⁹Sonke isihlahla esingatheli isithelo esihle siyaganyulwa siphoselwe emlilweni.

²⁰Ngakho-ke lizabazi ngezithelo zabo.

²¹Kakusibo bonke abatshoyo kimi ukuthi: Nkosi, Nkosi, abazangena embusweni wamazulu; kodwa lowo oyenzayo intando kaBaba osemazulwini.

²²Abanengi bazakuthi kimi ngalolosuku: Nkosi, Nkosi, kasiprofethanga yini ngelakho ibizo, sakhupha amadimoni ngelakho ibizo, senza imisebenzi elamandla eminengi ngelakho ibizo?

²³Njalo khona ngizakutsho obala kubo ukuthi: Angizanga ngilazi; sukani kimi lina benzi bobubi.

²⁴Ngakho wonke owezwayo la amazwi ami njalo awenze, ngizamfananisa lendoda ehlakaniphileyo, eyakha indlu yayo phezu kwedwala;

²⁵laselisina izulu, kwasekufika impophoma, kwasekuvunguza imimoya yayitshaya leyondlu; kodwa kayiwanga; ngoba yayisekelwe phezu kwedwala.

²⁶Njalo wonke owezwayo la amazwi ami njalo angawenzi, uzafananiswa lendoda eyisithutha, eyakha indlu yayo phezu kwetshebetshebe;

²⁷laselisina izulu, kwasekufika impophoma, kwasekuvunguza imimoya yayitshaya leyondlu; yawa; kwaba kukhulu ukuwa kwayo.

²⁸Kwasekusithi uJesu eseqedile lawomazwi amaxuku ababaza ngemfundiso yakhe;

²⁹ngoba wabafundisa njengolamandla, njalo kungenjengababhali.