Read Ndebele-IBhayibhili Elingcwele 2006 Umatewu 8 Bible Online

Umatewu 8 - Ndebele-IBhayibhili Elingcwele 2006 bible

Umatewu 8

¹Kwathi esehlile entabeni, amlandela amaxuku amakhulu;

²njalo khangela, umlephero weza wamkhonza wathi: Nkosi, aluba uthanda ungangihlambulula.

³UJesu waseselula isandla, wamthinta, wathi: Ngiyathanda, hlambuluka. Njalo ubulephero bakhe bahle bahlanjululwa.

⁴UJesu wasesithi kuye: Khangela ungatsheli muntu; kodwa hamba, uziveze kumpristi, unikele umnikelo uMozisi awulayayo, kube yibufakazi kubo.

⁵Kwathi uJesu esengenile eKapenawume, kweza kuye induna yekhulu imncenga,

⁶yasisithi: Nkosi, inceku yami ilele endlini iyisigoga, isebuhlungwini obukhulu.

⁷UJesu wasesithi kuye: Mina ngizakuza ngiyisilise.

⁸Induna yekhulu yasiphendula yathi: Nkosi, kangifanele ukuthi ungene ngaphansi kophahla lwami; kodwa kuphela khuluma ilizwi, njalo inceku yami izasiliswa.

⁹Ngoba lami ngingumuntu ongaphansi kwamandla, ngilamabutho ngaphansi kwami; njalo ngithi kuleli: Hamba, beselihamba; lakwelinye: Woza, beselisiza; lencekwini yami: Yenza lokhu, njalo ikwenze.

¹⁰Kwathi uJesu esezwile wamangala, wathi kwabalandelayo: Ngiqinisile ngithi kini: Angitholanga ukholo olungaka ngitsho lakoIsrayeli.

¹¹Njalo ngithi kini: Abanengi bazakuza bevela empumalanga lentshonalanga, bahlale loAbrahama loIsaka loJakobe, embusweni wamazulu;

¹²kodwa abantwana bombuso bazaphoselwa emnyameni ongaphandle; lapha kuzakuba khona ukukhala lokugedla amazinyo.

¹³UJesu wasesithi enduneni yekhulu: Hamba, futhi kakube kuwe njengoba ukholiwe. Inceku yakhe yasisiliswa ngalelohola.

¹⁴Kwathi uJesu engene endlini kaPetro, wabona uninazala elele njalo ebulawa luqhuqho.

¹⁵Wasebamba isandla sakhe, njalo uqhuqho lwamyekela; wasesukuma, wabancedisa.

¹⁶Kwathi sekuhlwile baletha kuye abanengi ababengenwe ngamadimoni; wasekhupha omoya ngelizwi, wasilisa bonke abagulayo;

¹⁷ukuze kugcwaliseke okwakhulunywa nguIsaya umprofethi ukuthi: Yena wathatha ubuthakathaka bethu, wazithwala izifo zethu.

¹⁸Kwathi uJesu ebona amaxuku amakhulu emhanqile, walaya ukuthi bachaphele ngaphetsheya.

¹⁹Kwasekusondela umbhali othile wathi kuye: Mfundisi, ngizakulandela loba kungaphi lapho oya khona.

²⁰UJesu wasesithi kuye: Amakhanka alemilindi, lenyoni zezulu izidleke; kodwa iNdodana yomuntu kayila lapho engaqamelisa ikhanda khona.

²¹Omunye wabafundi bakhe wasesithi kuye: Nkosi, ngivumela ukuthi ngiqale ngiyengcwaba ubaba.

²²Kodwa uJesu wathi kuye: Ngilandela, uyekele abafileyo bangcwabe ababo abafileyo.

²³Kwathi esengenile emkhunjini, abafundi bakhe bamlandela.

²⁴Njalo khangela, kwavuka isiphepho esikhulu olwandle, okungangokuthi umkhumbi wagutshuzelwa ngamagagasi; kodwa yena wayelele.

²⁵Basebesondela abafundi bakhe bamvusa, besithi: Nkosi, sisindise, siyabhubha!

²⁶Wasesithi kubo: Lesabelani, lina abokholo oluncinyane? Wasesukuma wakhuza imimoya lolwandle; kwasekusiba khona ukuthula okukhulu.

²⁷Kodwa abantu bamangala, besithi: Ngonjani lo, ukuthi lemimoya lolwandle kumlalele?

²⁸Kwathi esefikile ngaphetsheya elizweni lamaGergesi, bamhlangabeza ababili ababengenwe ngamadimoni bephuma emangcwabeni, belolaka kakhulu, okungangokuthi kwakungekho odlula ngaleyondlela;

²⁹njalo khangela, bamemeza besithi: Silani lawe, Jesu Ndodana kaNkulunkulu? Uze lapha yini ukusihlupha kungakafiki isikhathi?

³⁰Kwakukhona khatshana labo umhlambi wengulube ezinengi usidla.

³¹Amadimoni asemncenga, esithi: Uba usikhupha, sivumela ukuthi sihambe singene emhlanjini wengulube.

³²Wasesithi kuwo: Hambani. Esephumile angena emhlanjini wengulube; futhi khangela, umhlambi wonke wengulube waphaphatheka eliweni usiya olwandle, wafela emanzini.

³³Abazelusayo basebebaleka, basebesiya emzini babika konke, lezin daba zababengenwe ngamadimoni.

³⁴Njalo khangela, umuzi wonke waphuma ukumhlangabeza uJesu; bathi bembona, bancenga ukuthi asuke emikhawulweni yakibo.