Read Ndebele-IBhayibhili Elingcwele 2006 Umatewu 9 Bible Online

Umatewu 9 - Ndebele-IBhayibhili Elingcwele 2006 bible

Umatewu 9

¹Wasengena emkhunjini wachapha wafika emzini wakibo.

²Futhi khangela, baletha kuye umuntu oyisigoga elele ehlakeni; uJesu ebona-ke ukholo lwabo wathi koyisigoga: Mana isibindi, mntwana; uthethelelwe izono zakho.

³Njalo khangela, abanye bababhali bakhulumela ngaphakathi bathi: Lo uyahlambaza.

⁴Njalo uJesu ebona imicabango yabo wathi: Linakanelani okubi enhliziyweni zenu?

⁵Ngoba yikuphi okulula, ukuthi: Uthethelelwe izono zakho; kumbe ukuthi: Sukuma uhambe?

⁶Kodwa ukuze lazi ukuthi iNdodana yomuntu ilamandla emhlabeni okuthethelela izono (wasesithi koyisigoga): Sukuma uthathe uhlaka lwakho, uye endlini yakho.

⁷Wasesukuma waya endlini yakhe.

⁸Kwathi amaxuku esebonile, amangala, adumisa uNkulunkulu, onike abantu amandla anje.

⁹Esedlula lapho uJesu wabona umuntu, othiwa nguMathewu, ehlezi endlini yokuthelisela, wathi kuye: Ngilandela. Wasesukuma wamlandela.

¹⁰Kwasekusithi ehlezi ekudleni endlini, khangela-ke, abathelisi abanengi lezoni beza bahlala ekudleni loJesu labafundi bakhe.

¹¹AbaFarisi sebebonile bathi kubafundi bakhe: Kungani umfundisi wenu esidla labathelisi lezoni?

¹²Kwathi uJesu esizwa wathi kubo: Abaphilileyo kabadingi melaphi, kodwa abagulayo.

¹³Kodwa hambani lifunde ukuthi kutshoni ukuthi: Ngifuna isihawu, njalo hatshi umhlatshelo; ngoba angizanga ukubiza abalungileyo, kodwa izoni zize ekuphendukeni.

¹⁴Khona kwafika kuye abafundi bakaJohane, besithi: Kungani thina labaFarisi sizila ukudla kanenginengi, kodwa abafundi bakho bengazili ukudla?

¹⁵UJesu wasesithi kubo: Abantwana bendlu yomthimba bangalila yini, selokhu umyeni elabo? Kodwa zizafika insuku lapho umyeni ezasuswa kubo; khona-ke bezazila ukudla.

¹⁶Futhi kakho obekela isichibi selembu elingakafinyeli esembathweni esidala; ngoba lokho okubekelwe kuso kuzadabuka esembathweni, besesiqhela isikhala.

¹⁷Njalo kabatheli iwayini elitsha emigodleni emidala; uba-ke kungenjalo imigodla iyadabuka, lewayini lichitheke, lemigodla yonakale; kodwa iwayini elitsha balifaka emigodleni emitsha, besekulondolozeka kokubili.

¹⁸Kwathi esakhuluma lezizinto kubo, khangela, kwafika umphathi othile waguqa phambi kwakhe, wathi: Indodakazi yami isanda ukufa; kodwa woza ubeke isandla sakho phezu kwayo, njalo izaphila.

¹⁹Wasesukuma uJesu wamlandela, labafundi bakhe.

²⁰Njalo khangela, owesifazana owayelomopho okweminyaka elitshumi lambili, wasondela ngemuva, wathinta umphetho wesembatho sakhe.

²¹Ngoba wathi ngaphakathi kwakhe: Aluba ngithinta nje isembatho sakhe, ngizasindiswa.

²²Kodwa uJesu etshibilika embona, wathi: Mana isibindi, ndodakazi; ukholo lwakho lukusindisile. Owesifazana wasesila kusukela ngalelohola.

²³UJesu wasefika endlini yomphathi, wabona abakhalisa imihlanga lexuku liphithizela,

²⁴wathi kubo: Sukani; ngoba intombazana kayifanga, kodwa ilele. Basebemhleka usulu.

²⁵Kodwa ixuku selikhutshiwe, wangena wabamba isandla sayo, intombazana yasivuka.

²⁶Indumela yalokho yasiphumela kulelolizwe lonke.

²⁷Kwathi uJesu esedlula lapho, iziphofu ezimbili zamlandela, zimemeza zisithi: Sihawukele, Ndodana kaDavida !

²⁸Esengenile endlini, iziphofu zeza kuye; uJesu wasesithi kuzo: Liyakholwa yini ukuthi ngingakwenza lokhu? Zathi kuye: Yebo, Nkosi.

²⁹Wasethinta amehlo azo, wathi: Akwenzeke kini njengokholo lwenu.

³⁰Asevulwa amehlo azo; uJesu wasezilayisisa kakhulu wathi: Qaphelani ukuthi kungaziwa muntu.

³¹Kodwa zaphuma zaxoxa ngaye kulo lonke lelolizwe.

³²Kwathi ekuphumeni kwazo, khangela, baletha kuye umuntu oyisimungulu owayengenwe lidimoni;

³³kwathi idimoni selikhutshiwe, isimungulu sakhuluma; amaxuku asemangala, athi: Kakuzanga kubonwe okunje koIsrayeli.

³⁴Kodwa abaFarisi bathi: Ukhupha amadimoni ngenkosi yamadimoni.

³⁵UJesu wasebhoda emizini yonke lemizaneni, efundisa emasinagogeni abo, etshumayela ivangeli lombuso, eselapha sonke isifo lobuthakathaka bonke ebantwini.

³⁶Kwathi ebona amaxuku, waba lesihelo ngawo, ngoba ayekhathele ehlakazekile njengezimvu ezingelamelusi.

³⁷Wasesithi kubafundi bakhe: Isibili isivuno sikhulu, kodwa izisebenzi zinlutshwana;

³⁸ngakho ncengani iNkosi yesivuno, ukuze ithume izisebenzi esivunweni sayo.