Read Ndebele-IBhayibhili Elingcwele 2006 Umarkosi 10 Bible Online

Umarkosi 10 - Ndebele-IBhayibhili Elingcwele 2006 bible

Umarkosi 10

¹Wasesukuma lapho weza emingceleni yeJudiya edabula ngaphetsheya kweJordani; amaxuku asebuya abuthana kuye; wasephinda ukubafundisa, njengokwejwayela kwakhe.

²Kwasekusiza kuye abaFarisi bambuza ukuthi: Kuvunyelwe yini ukuthi indoda yale umka yo? bemlinga.

³Wasephendula wathi kubo: UMozisi walilayani?

⁴Basebesithi: UMozisi wavuma ukubhala incwadi yesehlukaniso, loku m ala.

⁵UJesu wasephendula wathi kubo: Ngenxa yobulukhuni benhliziyo yenu walibhalela lumlayo;

⁶kodwa kusukela ekuqaleni kokudaliweyo, uNkulunkulu wabenza owesilisa lowesifazana.

⁷Ngenxa yalokhu indoda izatshiya uyise lonina, inamathele kumkayo,

⁸njalo labo ababili bazakuba nyamanye. Ngakho kabasebabili, kodwa ba nyamanye.

⁹Ngakho lokho uNkulunkulu akuhlanganisileyo, kakungabi lamuntu okwehlukanisayo.

¹⁰Endlini abafundi bakhe basebebuya bembuza ngalokhu.

¹¹Wasesithi kubo: Loba ngubani owala umkakhe athathe omunye, uyafeba kuye;

¹²lomfazi uba esala indoda yakhe endele kwenye, uyafeba.

¹³Basebeletha abantwana abancane kuye ukuze ababambe; kodwa abafundi bakhe babakhuza aba ba lethayo.

¹⁴Kodwa uJesu e ku bona wathukuthela, wathi kubo: Vumelani abantwana abancane beze kimi, lingabenqabeli. Ngoba umbuso kaNkulunkulu ungowabanje.

¹⁵Ngiqinisile ngithi kini: Loba ngubani ongemukeli umbuso kaNkulunkulu njengomntwana omncane, kasoze angene kuwo.

¹⁶Njalo ebagona, ebeka izandla zakhe phezu kwabo, wababusisa.

¹⁷Esephumele endleleni, omunye wa m gijimela, eguqa phambi kwakhe wambuza wathi: Mfundisi olungileyo, ngingenzani ukuze ngidle ilifa lempilo elaphakade?

¹⁸UJesu wasesithi kuye: Ungibizelani ngokuthi olungileyo? Kakho olungileyo, ngaphandle koyedwa, uNkulunkulu.

¹⁹Uyayazi imilayo ethi: Ungafebi, ungabulali, ungebi, ungafakazi amanga, ungadlelezeli, hlonipha uyihlo lonyoko.

²⁰Wasephendula wathi kuye: Mfundisi, lezizinto zonke ngizigcinile kusukela ebutsheni bami.

²¹Njalo uJesu emkhangela wamthanda, wathi kuye: Kunye okusweleyo; hamba, uthengise konke olakho, uphe abayanga, njalo uzakuba lokuligugu ezulwini; njalo uze, uthathe isiphambano, ungilandele.

²²Kodwa edanile ngalelilizwi wasuka wahamba edabukile; ngoba wayelempahla ezinengi.

²³UJesu wasethalaza wathi kubafundi bakhe: Kuzakuba lukhuni kangakanani kwabalenotho ukungena embusweni kaNkulunkulu.

²⁴Abafundi basebemangala ngamazwi akhe. Kodwa uJesu ephendula futhi wathi kubo: Bantwana, kulukhuni kangakanani kwabathembela enothweni ukungena embusweni kaNkulunkulu;

²⁵kulula ukuthi ikamela lithutshe entunjeni yenalithi, kulokuthi umuntu onothileyo angene embusweni kaNkulunkulu.

²⁶Basebemangala kakhulukazi, bekhulumisana bathi: Pho kungasindiswa bani?

²⁷UJesu wasebakhangela wathi: Kubantu kakulakwenzeka, kodwa kaku njalo kuNkulunkulu; ngoba zonke izinto ziyenzeka kuNkulunkulu.

²⁸UPetro waseqala ukuthi kuye: Khangela, thina sitshiye konke, sakulandela.

²⁹UJesu wasephendula wathi: Ngiqinisile ngithi kini: Kakukho muntu otshiye indlu, kumbe abafowabo, kumbe odadewabo, kumbe uyise, kumbe unina, kumbe umka khe, kumbe abantwana, kumbe amasimu, ngenxa yami levangeli,

³⁰ongayikwemukela ngokwekhulu khathesi ngalesisikhathi, izindlu labafowabo labodadewabo labonina labantwana lamasimu, kanye lokuzingelwa, lempilo elaphakade esikhathini esizayo.

³¹Kodwa abanengi abokuqala bazakuba ngabokucina, labokucina ngabokuqala.

³²Njalo besendleleni benyukela eJerusalema; uJesu wayesehamba phambi kwabo, njalo babemangele, belandela babesesaba. Wasethatha futhi abalitshumi lambili, waqala ukubatshela izinto ezazizamehlela

³³ukuthi: Khangelani, senyukela eJerusalema, futhi iNdodana yomuntu izanikelwa kubapristi abakhulu lakubabhali, njalo bazayigwebela ukufa, bayinikele kwabezizwe,

³⁴bazayiyangisa, bayitshaye ngesiswepu, bayikhafulele amathe, bayibulale; njalo ngosuku lwesithathu izabuya ivuke ekufeni.

³⁵Kwasekusiza kuye uJakobe loJohane, amadodana kaZebediya, besithi: Mfundisi, sithanda ukuthi usenzele loba yini esizayicela.

³⁶Wasesithi kubo: Lithanda ukuthi ngilenzeleni?

³⁷Basebesithi kuye: Siphe ukuthi sihlale omunye ngakwesokunene sakho lomunye ngakwesokhohlo sakho ebukhosini bakho.

³⁸Kodwa uJesu wathi kubo: Kalikwazi elikucelayo. Linganatha yini inkezo engiyinathayo mina, njalo libhabhathizwe ngobhabhathizo engibhabhathizwa ngalo mina?

³⁹Basebesithi kuye: Singa kwenza. Kodwa uJesu wathi kubo: Isibili inkezo engiyinathayo mina lizayinatha; lizabhabhathizwa ngobhabhathizo engibhabhathizwa ngalo mina;

⁴⁰kodwa ukuhlala ngakwesokunene sami langakwesokhohlo sami kayisikho okwami ukukupha, kodwa kungo kwalabo abakulungiselweyo.

⁴¹Kwathi sebezwile abalitshumi baqala ukuthukuthela ngoJakobe loJohane.

⁴²Kodwa uJesu wababizela kuye wathi kubo: Liyazi ukuthi labo okuthiwa babusa izizwe bazibusa ngobulukhuni; lezikhulu zazo zisebenzisa amandla phezu kwazo.

⁴³Kodwa akuyikuba njalo phakathi kwenu; kodwa loba ngubani othanda ukuba ngomkhulu phakathi kwenu, kabe yisisebenzi senu;

⁴⁴njalo loba ngubani othanda ukuba ngowokuqala phakathi kwenu, kabe yisisebenzi sabo bonke.

⁴⁵Ngoba leNdodana yomuntu kayizanga ukukhonzwa, kodwa ukukhonza, lokunika impilo yayo ibe lihlawulo labanengi.

⁴⁶Basebefika eJeriko; kwathi esephuma eJeriko, labafundi bakhe, lexuku elikhulu, indodana kaTimewu, uBartimewu oyisiphofu wayehlezi endleleni ephanza.

⁴⁷Kwathi esezwile ukuthi nguJesu weNazaretha, waqala ukumemeza lokuthi: Jesu Ndodana kaDavida, akungihawukele !

⁴⁸Abanengi basebemkhuza ukuthi athule; kodwa wamemeza kakhulukazi, esithi: Ndodana kaDavida, akungihawukele !

⁴⁹UJesu esima wasesithi kabizwe; basebesibiza isiphofu, besithi kuso: Mana isibindi; sukuma, uyakubiza.

⁵⁰Sasesilahla isembatho saso sasukuma seza kuJesu.

⁵¹UJesu wasephendula wathi kuso: Ufuna ukuthi ngikwenzeleni? Isiphofu sasesisithi kuye: Raboni*, ukuthi ngemukele ukubona.

⁵²UJesu wasesithi kuso: Hamba; ukholo lwakho lukusindisile. Njalo sahle semukela ukubona, salandela uJesu endleleni.