Read Ndebele-IBhayibhili Elingcwele 2006 Umarkosi 14 Bible Online

Umarkosi 14 - Ndebele-IBhayibhili Elingcwele 2006 bible

Umarkosi 14

¹Kwathi emva kwensuku ezimbili kwaba khona iphasika l omkhosi wesinkwa esingelamvubelo; abapristi abakhulu lababhali basebedinga ukuthi bangambamba njani ngobuqili ba m bulale;

²kodwa bathi: Kungabi ngomkhosi, hlezi kube lesiphithiphithi sabantu.

³Kwathi eseBethani, endlini kaSimoni umlephero, ehlezi ekudleni, kwafika owesifazana ephethe umfuma we-alibasta* wamagcobo awenadi* uqobo aligugu elikhulu; wasephahlaza umfuma we-alibasta, wa wa thela ekhanda lakhe.

⁴Kwakukhona abanye abathukuthelayo ngaphakathi kwabo, besithi: Kwenzelwani ukumotshwa kwalamagcobo?

⁵Ngoba la abengathengiswa ngemali edlula odenariyo* abangamakhulu amathathu, besekunikwa abayanga. Basebemsola.

⁶Kodwa uJesu wathi: Myekeleni; limhluphelani? Wenze umsebenzi omuhle kimi.

⁷Ngoba abayanga lihlala lilabo, futhi uba lithanda lingabenzela okuhle; kodwa mina kalihlali lilami.

⁸Yena wenzile abengakwenza; uqalile ngaphambili ukuwugcobela ukungcwatshwa umzimba wami.

⁹Ngiqinisile ngithi kini: Loba ngaphi emhlabeni wonke lapho okuzatshunyayelwa khona lelivangeli, lalokhu akwenzileyo kuzakhulunywa ngakho kube yisikhumbuzo ngaye.

¹⁰UJudasi Iskariyothi, omunye wabalitshumi lambili, wasesiya kubapristi abakhulu, ukuze amnikele kubo.

¹¹Futhi sebezwile bathokoza, bathembisa ukumnika imali; wasedinga ukuthi angamnikela njani kuhle.

¹²Kwathi ngosuku lokuqala lwesinkwa esingelamvubelo, ababehlaba ngalo iphasika, abafundi bakhe bathi kuye: Uthanda ukuthi siyelungisa ngaphi ukuze udle iphasika?

¹³Wasethuma ababili kubafundi bakhe, wathi kubo: Hambani liye emzini, njalo umuntu uzahlangana lani ethwele imbiza yamanzi; limlandele,

¹⁴njalo loba kungaphi azangena khona, kalibokuthi kumninindlu: UMfundisi uthi: Ingaphi indlu yezihambi, lapho engingadlela khona iphasika labafundi bami?

¹⁵Futhi yena uzalitshengisa indlu enkulu ephezulu eyendlelweyo elungisiweyo; silungiseleni khona.

¹⁶Abafundi bakhe basebephuma, bangena emzini, bathola kunjengokutsho kwakhe kubo ; basebelungisa iphasika.

¹⁷Kwathi sekukusihlwa wafika labalitshumi lambili.

¹⁸Sebehlezi besidla, uJesu wathi: Ngiqinisile ngithi kini: Omunye wenu, odla lami, uzanginikela.

¹⁹Basebeqala ukudabuka, bathi kuye ngamunye ngamunye: Yimi yini? Lomunye: Yimi yini?

²⁰Kodwa waphendula wathi kubo: Ng omunye wabalitshumi lambili, otsheba kanye lami emganwini.

²¹Sibili iNdodana yomuntu ihamba, njengokulotshiweyo ngayo; kodwa maye kulowomuntu enikelwa nguye iNdodana yomuntu! Bekungakuhle kuye aluba lowomuntu wayengazalwanga.

²²Kwathi besidla, uJesu wathatha isinkwa, wa si busisa wa si hlephula, wabanika, wathi: Thathani, lidle; lokhu kungumzimba wami.

²³Wasethatha inkezo, esebongile wabanika; basebenatha kuyo bonke.

²⁴Wasesithi kubo: Leli ligazi lami, elesivumelwano esitsha, elichithelwa abanengi.

²⁵Ngiqinisile ngithi kini: Angisayikunatha okwesithelo sevini, kuze kufike lolosuku engizasinatha ngalo sisitsha embusweni kaNkulunkulu.

²⁶Kwathi sebehlabele ingoma yokudumisa baphuma baya entabeni yeMihlwathi.

²⁷UJesu wasesithi kubo: Lonke lizakhubeka ngami ngalobubusuku; ngoba kulotshiwe ukuthi: Ngizatshaya umelusi, izimvu besezihlakazeka.

²⁸Kodwa emva kokuvuswa kwami, ngizalandulela ukuya eGalili.

²⁹Kodwa uPetro wathi kuye: Lanxa bonke bezakhubeka, kodwa hatshi mina.

³⁰UJesu wasesithi kuye: Ngiqinisile ngithi kuwe: Lamuhla ngalobubusuku, lingakakhali kabili iqhude, uzangiphika kathathu.

³¹Kodwa waqinisa ngamandla esithi: Loba kudingeka ngife lawe, angisoze ngikuphike. Basebesitsho njalo labo bonke.

³²Basebefika endaweni ebizo layo yiGetsemane; wasesithi kubafundi bakhe: Hlalani phansi lapha, ngisa ya khuleka.

³³Wasethatha kanye laye uPetro loJakobe loJohane, waseqala ukudatshulwa sibili lokukhathazeka kakhulu.

³⁴Wasesithi kubo: Umphefumulo wami udabukile kakhulu kuze kube sekufeni; hlalani lapha lilinde.

³⁵Waseqhubeka ibangana, wawela emhlabathini, wakhuleka ukuthi, uba kungenzeka, kudlule kuye lelihola.

³⁶Wasesithi: Aba*, Baba, zonke izinto ziyenzeka kuwe. Susa linkezo kimi; kodwa kungabi yikuthi ngithandani mina, kodwa kube yikuthi uthanda ni wena.

³⁷Wasesiza, wabafica belele, wathi kuPetro: Simoni, ulele yini? Ubungelinde yini ihola libe linye?

³⁸Lindani likhuleke, ukuze lingangeni ekulingweni. Umoya uyavuma-ke, kodwa inyama ibuthakathaka.

³⁹Wasebuya wahamba wa ya khuleka, esitsho wona lawomazwi.

⁴⁰Wasebuya wabafica futhi belele; ngoba amehlo abo ayenzima, kodwa babengazi ukuthi bazamphendula bathi ni.

⁴¹Wasesiza ngokwesithathu, wathi kubo: Qhubekani lilele-ke liphumule. Kwanele; ihola selifikile; khangelani, iNdodana yomuntu iyanikelwa ezandleni zezoni.

⁴²Sukumani, sihambe; khangelani, onginikelayo useduze.

⁴³Kwathi esakhuluma, wahle wafika uJudasi, omunye wabalitshumi lambili, njalo elexuku elikhulu elilezinkemba lezinduku, livela kubapristi abakhulu lababhali labadala.

⁴⁴Lomnikelayo wayebanike isiboniso, esithi: Lowo engizamanga, nguye; limbambe, li m qhube li m qinise.

⁴⁵Esefikile, wahle wasondela kuye wathi: Rabi*, Rabi! Wasemanga.

⁴⁶Basebemdumela, bambamba.

⁴⁷Lomunye kwababemi khona wakhokha inkemba wagadla inceku yompristi omkhulu, waquma indlebe yayo.

⁴⁸UJesu wasephendula wathi kubo: Liphume njengokuyamelana lomphangi yini lilezinkemba lezinduku ukuzangibamba?

⁴⁹Bengilani insuku ngensuku ethempelini ngifundisa, kodwa kalingibambanga; kodwa lokhu kwenzeke ukuze kugcwaliseke imibhalo.

⁵⁰Bonke basebemtshiya babaleka.

⁵¹Lejaha elithile lamlandela, lembethe ilembu elicolekileyo emzimbeni onqunu. Aselibamba amajaha;

⁵²laselitshiya ilembu elicolekileyo lababalekela linqunu.

⁵³Basebemqhuba uJesu bamusa kumpristi omkhulu; basebebuthana kuye abapristi abakhulu bonke labadala lababhali.

⁵⁴UPetro wasemlandela ekhatshana waze waba phakathi kweguma lompristi omkhulu; wayehlezi kanye lezinceku, esotha umlilo.

⁵⁵Labapristi abakhulu lomphakathi wonke badinga ubufakazi ngoJesu, ukuze bambulale; kodwa kababutholanga.

⁵⁶Ngoba abanengi bafakaza amanga ngaye, kodwa ubufakazi babo kabuvumelananga.

⁵⁷Kwasekusukuma abanye bafakaza amanga amelana laye besithi:

⁵⁸Thina samuzwa esithi: Mina ngizadiliza lelithempeli elenziwe ngezandla, njalo ngakhe elinye elingenziwanga ngezandla ngensuku ezintathu.

⁵⁹Loba kunjalo ubufakazi babo kabuvumelananga.

⁶⁰Kwasekusukuma umpristi omkhulu phakathi kwabo wambuza uJesu, esithi: Kawuphenduli lutho yini? Bafakazani laba okumelana lawe?

⁶¹Kodwa wathula, kaphendulanga lutho. Umpristi omkhulu wabuya wambuza, wathi kuye: Wena unguKristu, iNdodana yoBusisiweyo yini?

⁶²UJesu wasesithi: Mina nginguye. Njalo lizabona iNdodana yomuntu ihlezi ngakwesokunene samandla, isiza ngamayezi ezulu.

⁶³Umpristi omkhulu wasedabula izembatho zakhe wathi: Sisaswelelani abafakazi?

⁶⁴Liyizwile inhlamba; licabangani? Bonke basebemlahla ukuthi ulecala lokufa.

⁶⁵Abanye basebeqala ukumkhafulela amathe, lokumgubuzela ubuso, lokumdutshuza, lokuthi kuye: Profetha ! Izinceku zasezimwakala.

⁶⁶UPetro esegumeni ngaphansi, kwafika enye yezincekukazi zompristi omkhulu;

⁶⁷isibona uPetro esotha, yamkhangela yathi: Lawe ubulomNazaretha, uJesu.

⁶⁸Kodwa waphika, wathi: Kangikwazi, futhi kangikuqedisisi okutshoyo. Wasephuma phandle, waya entubeni; laselikhala iqhude.

⁶⁹Njalo incekukazi encane imbona yabuya yaqala ukutsho kwababemi khona ukuthi: Lo ungo munye wabo.

⁷⁰Kodwa wabuya waphika. Kwathi emva kwesikhatshana futhi labo ababemi khona bathi kuPetro: Ngeqiniso ungo munye wabo; ngoba lawe ungumGalili, lolimi lwakho luyavumelana.

⁷¹Waseqala ukuqalekisa lokufunga esithi: Kangimazi lumuntu elimtshoyo.

⁷²Iqhude laselikhala ngokwesibili. UPetro wasekhumbula ilizwi uJesu ayelitshilo kuye lokuthi: Lingakakhali kabili iqhude, uzangiphika kathathu. Esenakane ngalokhu wakhala.