Read Ndebele-IBhayibhili Elingcwele 2006 Umarkosi 15 Bible Online

Umarkosi 15 - Ndebele-IBhayibhili Elingcwele 2006 bible

Umarkosi 15

¹Kwathi khonokho ekuseni kakhulu abapristi abakhulu benza umhlangano kanye labadala lababhali, lomphakathi wonke, bambopha uJesu ba m qhuba ba m nikela kuPilatu.

²UPilatu wasembuza wathi: Wena uyiNkosi yamaJuda yini? Wasemphendula wathi kuye: Uyatsho wena.

³Abapristi abakhulu basebemmangalela ngezinto ezinengi; kodwa yena kaphendulanga lutho.

⁴UPilatu wasebuya embuza, wathi: Kawuphenduli lutho yini? Khangela, zingaki izinto abazifakazayo ezimelana lawe.

⁵Kodwa uJesu kabesaphendula lutho, waze wamangala uPilatu.

⁶Langomkhosi wayebakhululela isibotshwa esisodwa, loba yisiphi abasicelayo.

⁷Kwakukhona umuntu othiwa nguBarabasi, owayebotshiwe lalabo ababevukele umbuso laye, ababebulele ekuvukeleni umbuso.

⁸Ixuku laselimemeza laqala ukucela ukuthi alenzele njengezikhathi zonke.

⁹UPilatu wasebaphendula, wathi: Lithanda ukuthi ngilikhululele iNkosi yamaJuda yini?

¹⁰Ngoba wayekwazi ukuthi ngomona abapristi abakhulu bamnikele.

¹¹Kodwa abapristi abakhulu bavusa ixuku, ukuthi kungcono alikhululele uBarabasi.

¹²UPilatu wasephendula wathi futhi kubo: Pho lifuna ngimenzeni lo elithi uyiNkosi yamaJuda?

¹³Basebememeza futhi bathi: Mbethele!

¹⁴Kodwa uPilatu wathi kubo: Ngoba wenze ububi bani? Kodwa bamemeza kakhulu bathi: Mbethele!

¹⁵Khona uPilatu ethanda ukukholisa ixuku, wabakhululela uBarabasi; kodwa wamnikela uJesu, ese m tshaye ngesiswepu, ukuthi abethelwe.

¹⁶Abebutho basebemngenisa phakathi, egumeni, eliyindlu yombusi, basebebizela ibutho lonke ndawonye,

¹⁷bamgqokisa okuyibubende, sebeluke umqhele wameva bamethesa,

¹⁸baqala ukumbingelela besithi: Bayethe, Nkosi yamaJuda!

¹⁹Batshaya ikhanda lakhe ngomhlanga, bamkhafulela amathe, baguqa ngamadolo bamkhonza.

²⁰Sebemklolodele, bamhlubula okuyibubende, bamgqokisa ezakhe izembatho. Basebemusa phandle ukuze bambethele.

²¹Babamba ngamandla omunye owayesedlula othiwa nguSimoni umKurene, evela emaphandleni, uyise kaAleksandro loRufusi, ukuthi athwale isiphambano sakhe.

²²Basebemusa endaweni ethiwa yiGolgotha, okuyikuthi ngokuphendulelwa, iNdawo yokhakhayi.

²³Basebemnika iwayini lixutshaniswe lenhlaka ukuthi alinathe; kodwa kalemukelanga.

²⁴Sebembethele, babelana izembatho zakhe, benza inkatho yokuphosa ngazo, ukuthi ngamunye uzathathani.

²⁵Kwakulihola lesithathu*, njalo bambethela.

²⁶Futhi kwakulombhalo wecala lakhe elalibhalwe phezulu usithi: INKOSI YAMAJUDA.

²⁷Njalo babethelwa kanye laye abaphangi ababili, omunye ngakwesokunene lomunye ngakwesokhohlo sakhe.

²⁸Wasugcwaliseka umbhalo othi: Futhi wabalwa kanye lezoni.

²⁹Labedlulayo bamhlambaza, benikina amakhanda abo, besithi: Hiya, wena odiliza ithempeli, ulakhe ngensuku ezintathu,

³⁰zisindise, wehle esiphambanweni.

³¹Langokunjalo abapristi abakhulu labo bakloloda kanye lababhali bathi omunye komunye: Wasindisa abanye, angezisindise yena.

³²UKristu iNkosi yakoIsrayeli kehle khathesi esiphambanweni, ukuze sibone sikholwe. Lababebethelwe kanye laye bamklolodela.

³³Kwathi sekufike ihola lesithupha*, kwaba khona ubumnyama phezu komhlaba wonke kwaze kwaba lihola lesificamunwemunye*.

³⁴Ngehola lesificamunwemunye uJesu wamemeza ngelizwi elikhulu, wathi, "Eloyi, Eloyi, lama sabaktani?" Okuyikuthi ngokuphendulelwa: Nkulunkulu wami, Nkulunkulu wami, ungitshiyeleni?

³⁵Labanye kwababemi khona besizwa bathi: Khangelani, ubiza uElija.

³⁶Wasegijima omunye, wagcwalisa uzipho ngeviniga, waluhloma emhlangeni, wamnika ukuthi anathe, esithi: Yekelani, sibone uba uElija uzakuza amethule.

³⁷UJesu wasememeza ngelizwi elikhulu waphefumula okokucina.

³⁸Leveyili lethempeli ladatshulwa laba zincezu ezimbili laqala phezulu lisiya phansi.

³⁹Kwathi induna yekhulu eyayimi maqondana laye ibona ukuthi ukhale njalo, waphefumula okokucina, yathi: Ngeqiniso lumuntu ubeyiNdodana kaNkulunkulu.

⁴⁰Kwakukhona labesifazana bebukele bekhatshana, okwakukhona phakathi kwabo loMariya Magadalena, loMariya unina kaJakobe omncinyane lokaJose, loSalome,

⁴¹(labo ababemlandela, eseseGalili, bemncedisa), labanye abesifazana abanengi abenyukela eJerusalema laye.

⁴²Kwathi sekuhlwile, ngoba kwakungamalungiselelo, okuyikuthi usuku phambi kwesabatha,

⁴³wafika uJosefa owayevela eArimathiya, ilunga elihloniphekayo lomphakathi, owayelindele laye umbuso kaNkulunkulu; wangena ngesibindi kuPilatu, wacela isidumbu sikaJesu.

⁴⁴UPilatu wasemangala ngokuthi usefile; wabizela kuye induna yekhulu, wayibuza ukuthi kambe sekuyisikhathi efile.

⁴⁵Esazisiwe yinduna yekhulu, wamnika uJosefa isidumbu.

⁴⁶Wasethenga ilembu elicolekileyo, wamethula, wamgoqela ngelembu elicolekileyo, wambeka engcwabeni elaligujwe edwaleni; wagiqela ilitshe emnyango wengcwaba.

⁴⁷Futhi uMariya Magadalena loMariya unina kaJose babona lapho ayebekwa khona.