Read Ndebele-IBhayibhili Elingcwele 2006 Umarkosi 16 Bible Online

Umarkosi 16 - Ndebele-IBhayibhili Elingcwele 2006 bible

Umarkosi 16

¹Isabatha selidlulile, uMariya Magadalena loMariya unina kaJakobe loSalome bathenga amakha, ukuze bahambe bayemgcoba.

²Kwathi ekuseni kakhulu ngo suku lokuqala lweviki beza engcwabeni, ekuphumeni kwelanga.

³Basebekhulumisana besithi: Ngubani ozasigiqela ilitshe lisuke emnyango wengcwaba?

⁴Futhi bathi ukukhangela babona ilitshe seligiqwe lasuswa; ngoba lalilikhulu kakhulu.

⁵Kuthe bengena engcwabeni, babona ijaha lihlezi ngakwesokunene, lembethe isembatho eside esimhlophe; besaba.

⁶Kodwa lathi kubo: Lingesabi; lidinga uJesu weNazaretha obebethelwe; uvukile, kakho lapha; khangelani, indawo lapho abebembeke khona.

⁷Kodwa hambani, litshele abafundi bakhe loPetro ukuthi uzalandulela ukuya eGalili; lizambona khona, njengalokho ayekutshilo kini.

⁸Basebephuma ngokuphangisa babaleka engcwabeni; futhi ukuqhuqha lokwethuka kwababamba; futhi kabakhulumanga lutho emuntwini, ngoba babesesaba.

⁹Kwathi uJesu esevukile ekuseni kakhulu ngolokuqala lweviki, wabonakala kuqala kuMariya Magadalena, ayekhuphe kuye amadimoni ayisikhombisa.

¹⁰Yena wasuka wababikela labo ababelaye, belila bekhala.

¹¹Labo sebezwile ukuthi uyaphila lokuthi ubonwe nguye, kabakholwanga.

¹²Njalo emva kwalezizinto wabonakala ngesinye isimo kwababili babo behamba, besiya emaphandleni.

¹³Labo bahamba babikela abanye; lalabo kababakholwanga.

¹⁴Emva kwalokhu wabonakala kwabalitshumi lanye behlezi ekudleni, wasola ukungakholwa kwabo lobulukhuni benhliziyo, ngoba bengakholwanga labo abambonayo esevukile.

¹⁵Wasesithi kubo: Hambani liye emhlabeni wonke, litshumayele ivangeli kuso sonke isidalwa.

¹⁶Lowo okholwayo abhabhathizwe uzasindiswa; kodwa ongakholwayo uzalahlwa.

¹⁷Lalezizibonakaliso zizabalandela abakholwayo; ebizweni lami bazakhupha amadimoni; bakhulume ngendimi ezintsha;

¹⁸bazadobha izinyoka; uba benatha loba yikuphi okubulalayo, kakusoze kubalimaze; bazabeka izandla phezu kwabagulayo, futhi bazaphila.

¹⁹Ngakho iNkosi, emva kokuthi isikhulumile labo, yakhutshulelwa ezulwini, yahlala ngakwesokunene sikaNkulunkulu.

²⁰Bona basebephuma batshumayela endaweni zonke, iNkosi isebenza la bo, iqinisa ilizwi ngezibonakaliso ezazilandela. Ameni.