Read Ndebele-IBhayibhili Elingcwele 2006 Umarkosi 2 Bible Online

Umarkosi 2 - Ndebele-IBhayibhili Elingcwele 2006 bible

Umarkosi 2

¹Esebuye wangena eKapenawume emva kwezinsuku; kwasekuzwakala ukuthi usendlini.

²Njalo kwahle kwabuthana abanengi, akwazabe kusaba lendawo ya bo, hatshi langasemnyango; wasekhuluma ilizwi kubo.

³Basebesiza kuye, beletha oyisigoga, ethwelwe ngabane.

⁴Babengelakusondela kuye ngenxa yexuku, bavula uphahla lapho ayekhona, bathi sebe lu bhobozile behlisa ithala alele kulo oyisigoga.

⁵Njalo uJesu ebona ukholo lwabo wathi koyisigoga: Ndodana, izono zakho uzithethelelwe.

⁶Kodwa abanye bababhali ababehlezi lapho, banakana enhliziyweni zabo, bathi:

⁷Ukhulumelani inhlamba enje lo? Ngubani ongathethelela izono ngaphandle koyedwa, uNkulunkulu?

⁸Njalo wahle wakwazi uJesu emoyeni wakhe ukuthi babenakana njalo phakathi kwabo, wathi kubo: Linakanelani izinto lezi enhliziyweni zenu?

⁹Yikuphi okulula, ukuthi koyisigoga: Izono zakho uzithethelelwe, kumbe ukuthi: Sukuma, uthathe icansi lakho, uhambe?

¹⁰Kodwa ukuze lazi ukuthi iNdodana yomuntu ilamandla okuthethelela izono emhlabeni (wathi koyisigoga):

¹¹Ngithi kuwe: Sukuma uthathe icansi lakho, uye endlini yakho.

¹²Njalo wahle wasukuma, wathatha icansi, waphuma phambi kwabo bonke; baze bamangala bonke, bamdumisa uNkulunkulu, besithi: Kasizange sikubone okunje.

¹³Wasebuya esiya elwandle, ixuku lonke laselisiza kuye, wasebafundisa.

¹⁴Esedlula wabona uLevi okaAlfewu ehlezi endlini yokuthelisela, wasesithi kuye: Ngilandela. Wasesukuma wamlandela.

¹⁵Kwasekusithi ehlezi endlini yakhe, labathelisi abanengi lezoni bahlala ekudleni loJesu labafundi bakhe; ngoba babebanengi, bemlandela.

¹⁶Kwathi ababhali labaFarisi, bembona esidla labathelisi lezoni, bathi kubafundi bakhe: Kungani esidla enatha labathelisi lezoni?

¹⁷Kwathi uJesu esezwile wathi kubo: Abaphilileyo kabadingi melaphi, kodwa abagulayo. Kangizanga ukubiza abalungileyo, kodwa izoni zize ekuphendukeni.

¹⁸Njalo abafundi bakaJohane lababaFarisi babezila ukudla; abantu basebesiza bathi kuye: Kungani abafundi bakaJohane lababaFarisi bezila ukudla, kodwa abafundi bakho bengazili ukudla?

¹⁹UJesu wasesithi kubo: Abantwana abasendlini yomthimba bangazila yini ukudla, umyeni eselabo? Bangezile, ingqe ngesikhathi umyeni eselabo;

²⁰kodwa zizafika insuku lapho umyeni azasuswa kubo, njalo khona bezazila ukudla ngalezonsuku.

²¹Futhi kakho othungela isichibi selembu elingakafinyeli esembathweni esidala; uba-ke kungenjalo okubekelweyo kudabuke kiso, okutsha kwesidala, kuqhele ukudabuka.

²²Futhi kakho othela iwayini elitsha emigodleni emidala; uba-ke kungenjalo iwayini elitsha lidabula imigodla, lichitheke iwayini lemigodla yonakale; kodwa iwayini elitsha limele lifakwe emigodleni emitsha.

²³Kwasekusithi edabula emasimini amabele ngesabatha, abafundi bakhe basebeqala ukukha izikhwebu behamba.

²⁴AbaFarisi basebesithi kuye: Khangela, kungani besenza okungavunyelwayo ngesabatha?

²⁵Yena wasesithi kubo: Kalizange libale yini uDavida akwenzayo, mhla eswele, elambile, yena lababelaye?

²⁶Ukuthi wayangena njani endlini kaNkulunkulu esikhathini uAbhiyatha engumpristi omkhulu, wadla izinkwa zokubukiswa ezingavunyelwa ukudliwa ngaphandle kwabapristi, wabanika lababelaye?

²⁷Wasesithi kubo: Isabatha lenziwa ngenxa yomuntu, njalo umuntu ke nzi wanga ngenxa yesabatha;

²⁸ngakho iNdodana yomuntu iyiNkosi leyesabatha.