Read Ndebele-IBhayibhili Elingcwele 2006 Umarkosi 3 Bible Online

Umarkosi 3 - Ndebele-IBhayibhili Elingcwele 2006 bible

Umarkosi 3

¹Wasebuya engena esinagogeni, njalo kwakukhona lapho umuntu olesandla esitshwabheneyo.

²Basebemqaphela ukuthi uzamsilisa ngesabatha, ukuze bambeke icala.

³Wasesithi kumuntu olesandla esitshwabheneyo: Sukuma uye phakathi.

⁴Wathi kubo: Kuvunyelwe yini ngamasabatha ukwenza okulungileyo, kumbe ukwenza okubi? Ukusindisa impilo, kumbe ukubulala? Kodwa bathula.

⁵Wasebathalaza ngokuthukuthela, edabukile ngobulukhuni benhliziyo yabo, wathi kumuntu: Yelula isandla sakho. Waselula, isandla sakhe sasesisiliswa saphila njengesinye.

⁶Basebephuma abaFarisi bahle bacebisana labakaHerodi bemelane laye, ukuthi bangambulala njani.

⁷Kodwa uJesu wasuka wahamba labafundi bakhe ngaselwandle; ixuku elikhulu laselimlandela livela eGalili, leJudiya;

⁸leJerusalema, leIdumiya, langaphetsheya kweJordani, labemimangweni yeTire leSidoni, ixuku elikhulu, selizwile izinto ezinkulu abezenza, leza kuye.

⁹Wasetshela abafundi bakhe ukuthi umkolo umlindele ngenxa yexuku, ukuze lingamcindezeli.

¹⁰Ngoba wayesilisa abanengi, baze bawela phezu kwakhe bonke abalezifo, ukuze bamthinte.

¹¹Futhi omoya abangcolileyo, bembona, babesiwa phansi phambi kwakhe, bekhala besithi: Wena uyiNdodana kaNkulunkulu.

¹²Wasebalayisisa kakhulu ukuthi bangamvezi.

¹³Wasesenyukela entabeni, wabizela kuye labo ayebafuna yena; basebesiza kuye.

¹⁴Wasemisa abalitshumi lambili, ukuze babe laye, lokuze abathume ukuyatshumayela,

¹⁵futhi babe lamandla okwelapha imikhuhlane, lawokukhupha amadimoni:

¹⁶LoSimoni wamutha ibizo lokuthi nguPetro;

¹⁷loJakobe okaZebediya, loJohane umfowabo kaJakobe; wabatha amabizo wathi ngoBowanegesi, okuyikuthi, amadodana omdumo;

¹⁸loAndreya, loFiliphu, loBartolomewu, loMathewu, loTomasi, loJakobe okaAlfewu, loTadewu, loSimoni umKhanani,

¹⁹loJudasi uIskariyothi, laye owamnikelayo. Basebengena endlini.

²⁰Ixuku laselibuthana futhi, kwaze kwathi bona abasazange benelise lokudla isinkwa.

²¹Kwathi abakibo sebezwile lokhu baphuma ukuyambamba; ngoba bathi: Uyahlanya.

²²Lababhali abavela eJerusalema bathi: UloBhelezebhule, lokuthi: Ukhupha amadimoni ngenkosi yamadimoni.

²³Wasebabizela kuye, wathi kubo ngemifanekiso: USathane angakhupha njani uSathane?

²⁴Futhi uba umbuso wehlukene umelene lawo ngokwawo, lowombuso ungeme.

²⁵Lendlu uba yehlukene imelana layo ngokwayo, leyondlu ingeme.

²⁶LoSathane uba ezivukela yena, ahlukane, angeme, kodwa uyaphela.

²⁷Kakho ngitsho ongangena endlini yesiqhwaga, aphange impahla yaso, uba engasibophi isiqhwaga kuqala, abesephanga indlu yaso.

²⁸Ngiqinisile ngithi kini: Zonke izono zizathethelelwa kubantwana babantu, lezinhlamba loba ziphi abahlambaza ngazo;

²⁹kodwa loba ngubani ohlambaza emelene loMoya oyiNgcwele, kalakuthethelelwa lanini, kodwa ulecala lokulahlwa okulaphakade;

³⁰ngoba bathi: Ulomoya ongcolileyo.

³¹Kwasekufika abafowabo lonina, bema ngaphandle bathumela kuye, bembiza.

³²Njalo ixuku lalihlezi limphahlile; basebesithi kuye: Khangela, unyoko labafowenu baphandle bayakudinga.

³³Wasebaphendula wathi: Ngubani umama kumbe abafowethu?

³⁴Wasethalaza labo ababehlezi bemphahlile, wathi: Khangelani umama labafowethu.

³⁵Ngoba loba ngubani owenza intando kaNkulunkulu, nguye ongumfowethu lodadewethu lomama.