Read Ndebele-IBhayibhili Elingcwele 2006 Umarkosi 4 Bible Online

Umarkosi 4 - Ndebele-IBhayibhili Elingcwele 2006 bible

Umarkosi 4

¹Wasebuya waqala ukufundisa ngaselwandle; kwasekubuthana kuye ixuku elikhulu, waze wangena emkhunjini wahlala olwandle; njalo ixuku lonke lalisemhlabathini ngaselwandle.

²Wasebafundisa izinto ezinengi ngemifanekiso, lekufundiseni kwakhe wathi kubo:

³Lalelani; khangelani, kwaphuma umhlanyeli ukuyahlanyela.

⁴Kwasekusithi ekuhlanyeleni, enye yawela eceleni kwendlela, kwasekufika inyoni zezulu zayidla zayiqeda.

⁵Kodwa enye yawela edwaleni, lapho eyayingelamhlabathi omnengi khona; futhi yahle yamila, ngoba yayingelakutshona komhlabathi;

⁶kwathi ekuphumeni kwelanga yahangulwa yabuna ngoba yayingelampande.

⁷Enye yasiwela emeveni, ameva asekhula, ayiminyanisa, futhi ayithelanga isithelo.

⁸Njalo enye yawela emhlabathini omuhle; yathela isithelo esakhulayo sanda, yazala enye amatshumi amathathu, lenye amatshumi ayisithupha, lenye ikhulu.

⁹Wasesithi kubo: Olendlebe zokuzwa, akezwe.

¹⁰Kwathi eseyedwa, labo ababemphahlile kanye labalitshumi lambili bambuza ngemifanekiso.

¹¹Wasesithi kubo: Kuphiwe kini ukwazi imfihlo yombuso kaNkulunkulu; kodwa labo abangaphandle benzelwa izinto zonke ngemifanekiso;

¹²ukuze bebona babone, bangabonisisi; njalo besizwa bezwe, bangaqedisisi; hlezi loba nini baphenduke, bathethelelwe izono zabo.

¹³Wasesithi kubo: Kaliwazi lumfanekiso yini? Pho lizayazi njani imifanekiso yonke?

¹⁴Umhlanyeli uhlanyela ilizwi.

¹⁵Njalo abaseceleni kwendlela, yilabo lapho okuhlanyelwa khona ilizwi, futhi nxa belizwa, uSathane ahle afike alisuse ilizwi elihlanyelwe enhliziyweni zabo.

¹⁶Lalabo ngokunjalo abahlanyelwe edwaleni, abathi, lapho besizwa ilizwi, bahle balemukele ngentokozo,

¹⁷njalo kabalampande phakathi kwabo, kodwa bahlala okwesikhathi; kuthi sekufika inkathazo kumbe ukuzingelwa ngenxa yelizwi, bahle bakhubeke.

¹⁸Lalaba yilabo abahlanyelwe emeveni, abalizwayo ilizwi,

¹⁹kodwa impisekelo yalumhlaba, lenkohliso yenotho, lenkanuko yezinye izinto kungene kuminyanise ilizwi, futhi ibe ingasatheli.

²⁰Lalaba yilabo abahlanyelwe emhlabathini omuhle, abathi belizwile ilizwi, ba le mukele, bathele, enye amatshumi amathathu, lenye amatshumi ayisithupha, lenye ikhulu.

²¹Wasesithi kubo: Kanti isibane silethwa ukuze sibekwe ngaphansi kwesitsha kumbe ngaphansi kombheda? Angithi ukuze sibekwe esiqobaneni sesibane?

²²Ngoba kakukho okufihliweyo okungayikubonakaliswa; akukho okwenzeka kube yimfihlo, kodwa ukuze kube sobala.

²³Nxa umuntu elendlebe zokuzwa akezwe.

²⁴Wasesithi kubo: Qaphelisani elikuzwayo. Ngesilinganiso elilinganisa ngaso lizalinganiselwa ngaso, njalo lina elizwayo lizaphiwa ngokwengezelelweyo.

²⁵Ngoba loba ngubani olakho, uzaphiwa; kodwa loba ngubani ongelakho, uzakwemukwa lalokho alakho.

²⁶Wasesithi: Unjalo umbuso kaNkulunkulu, njengokuba nxa umuntu ephosa inhlanyelo emhlabathini,

²⁷njalo alale abesevuka ebusuku lemini, lenhlanyelo imile njalo ikhule, yena kakwazi ukuthi njani.

²⁸Ngoba umhlabathi uyathela ngokwawo, kuqala usungulo, kulandele isikhwebu, kulandele amabele apheleleyo esikhwetshini.

²⁹Kodwa nxa sesivuthiwe isithelo, uhle athumeze isikela, ngoba ukuvuna sekufikile.

³⁰Wathi futhi: Sizawufananisa lani umbuso kaNkulunkulu? Kumbe sizawufananisa ngomfanekiso bani?

³¹Unjengohlamvu lwemasitedi, oluthi nxa seluhlanyelwe emhlabathini, luncinyane kulazo zonke inhlamvu ezisemhlabeni;

³²njalo nxa seluhlanyelwe, lukhule, lube lukhulu lwedlule izilimo zonke, lwenze ingatsha ezinkulu, kuze kuthi inyoni zezulu zingakhela ngaphansi komthunzi wazo.

³³Waselikhuluma kubo ilizwi ngemifanekiso eminengi enjalo, njengamandla abo okuzwa;

³⁴kodwa ngaphandle komfanekiso kakhulumanga kubo; kodwa sebebodwa wabachasisela abafundi bakhe izinto zonke.

³⁵Ngalolosuku sekuhlwile, wasesithi kubo: Asichapheleni ngaphetsheya.

³⁶Sebeyekele ixuku lahamba, bamthatha bahamba laye njengoba enjalo emkhunjini. Futhi leminye imikolo yayilaye.

³⁷Kwasekuvuka isiphepho esikhulu somoya; lamagagasi aphoseka emkhunjini, waze wagcwala khathesi.

³⁸Njalo yena wayengemuva emkhunjini elele emqamelweni; basebemvusa, bathi kuye: Mfundisi, kawukhathali yini ukuthi siyabhubha?

³⁹Wasevuka wakhuza umoya, wathi kulo ulwandle: Thula, uthi zwi! Umoya wasuqamuka, kwasekusiba khona ukuthula okukhulu.

⁴⁰Wasesithi kubo: Kungani lisesaba kangaka? Kalilakholo ngani?

⁴¹Basebesesaba ngokwesaba okukhulu, bathi omunye komunye: Kanti ungubani lo, ukuthi lomoya lolwandle kumlalele?