Read Ndebele-IBhayibhili Elingcwele 2006 Umarkosi 5 Bible Online

Umarkosi 5 - Ndebele-IBhayibhili Elingcwele 2006 bible

Umarkosi 5

¹Basebefika ngaphetsheya kolwandle, elizweni lamaGadarene.

²Esephumile emkhunjini, wahle wamhlangabeza umuntu ovela emangcwabeni elomoya ongcolileyo,

³owayehlala emangcwabeni; njalo kwakungelamuntu owayengambopha ngitsho langamaketane,

⁴ngoba wayebotshiwe kanengi ngezibopho langamaketane, kodwa amaketane ayeqanyulwa nguye, lezibopho zaqanyuqanyulwa; njalo kwakungekho owayengamthambisa;

⁵langezikhathi zonke, ebusuku lemini, wayesezintabeni lemangcwabeni eklabalala ezisika ngamatshe.

⁶Kwathi ebona uJesu ekhatshana, wagijima wamkhonza,

⁷wamemeza ngelizwi elikhulu esithi: Ngilani lawe, Jesu, Ndodana kaNkulunkulu oPhezukonke? Ngikufungisa ngoNkulunkulu, ungangihluphi.

⁸Ngoba wathi kuye: Phuma emuntwini, moya ongcolileyo.

⁹Wasembuza wathi: Ibizo lakho ungubani? Wasephendula, wathi: Ibizo lami nginguLegiyoni, ngoba sibanengi.

¹⁰Wasemncenga kakhulu, ukuthi angabaxotsheli ngaphandle kwelizwe.

¹¹Kwakukhona lapho ngasezintabeni umhlambi omkhulu wengulube usidla;

¹²lamadimoni wonke amncenga, athi: Sithume engulubeni, singene kuzo.

¹³Njalo uJesu wahle wawavumela. Omoya abangcolileyo basebephuma bangena ezingulubeni; umhlambi wasuphaphatheka eliweni usiya olwandle; njalo zazingaba zinkulungwane ezimbili; zaminzwa olwandle.

¹⁴Abazelusayo ingulube basebebaleka, bayabika emzini lemaphandleni. Basebephuma ukubona ukuthi kuyini okwenzakeleyo;

¹⁵bafika kuJesu, bambona obengenwe ngamadimoni ehlezi egqokile eqondile, yena owayelelegiyoni; basebesesaba.

¹⁶Labo ababekubonile babatshela ukuthi kwenzeke njani kowayengenwe ngamadimoni, langengulube.

¹⁷Basebeqala ukumncenga ukuthi asuke elizweni lakibo.

¹⁸Wathi engena emkhunjini, owayengenwe ngamadimoni wamncenga, ukuthi abe laye.

¹⁹Kodwa uJesu kamvumelanga, kodwa wathi kuye: Hamba uye ekhaya kwabakini, ubatshele ukuthi iNkosi ikwenzele okungakanani, ikuhawukele.

²⁰Wasesuka ehamba waqala ukutshumayela eDikapolisi ukuthi uJesu umenzele okungakanani; basebemangala bonke.

²¹UJesu esebuye wachaphela ngaphetsheya ngomkhumbi, kwabuthana kuye ixuku elikhulu, futhi wayengasolwandle.

²²Njalo khangela, kwafika omunye wabaphathi besinagoge, uJayirosi ngebizo; embona, wawa phansi enyaweni zakhe,

²³wamncenga kakhulu, esithi: Indodakazi yami encane isiphela; ngiyakuncenga ukuthi ubuye ubeke izandla phezu kwayo, ukuze isindiswe, njalo izaphila.

²⁴Wasehamba laye; ixuku elikhulu laselimlandela, lamminyezela.

²⁵Njalo owesifazana othile owayelomopho wegazi okweminyaka elitshumi lambili,

²⁶ehluphekile kakhulu kubelaphi abanengi, echithile konke ayelakho, engasizakalanga, kodwa kulokhu kumqinela,

²⁷esezwile ngoJesu, weza exukwini ngemuva, wathinta isembatho sakhe;

²⁸ngoba wathi: Aluba ngithinta izembatho zakhe nje, ngizasindiswa.

²⁹Futhi wahle woma umthombo wegazi lakhe, wasesizwa emzimbeni ukuthi usilile esifweni.

³⁰Njalo uJesu wahle wazi phakathi kwakhe ukuthi amandla aphumile kuye, watshibilika esexukwini, wathi: Ngubani othinte izembatho zami?

³¹Abafundi bakhe basebesithi kuye: Uyabona ixuku likuminyezela, kodwa uthi: Ngubani ongithintileyo?

³²Wasethalaza ukuthi ambone owenze lokhu.

³³Kodwa owesifazana esesaba ethuthumela, ekwazi okwenzekileyo kuye, weza wawa phambi kwakhe, wamtshela iqiniso lonke.

³⁴Wasesithi kuye: Ndodakazi, ukholo lwakho lukusindisile; hamba ngokuthula, siliswa esifweni sakho.

³⁵Esakhuluma, kwafika aba nye bomphathi wesinagoge, bathi: Indodakazi yakho isifile; usamkhathazelani uMfundisi?

³⁶Kwahle kwathi uJesu esizwa ilizwi elikhulunywayo wathi kumphathi wesinagoge: Ungesabi, kholwa kuphela.

³⁷Futhi kavumelanga muntu ukuthi amlandele, ngaphandle kukaPetro loJakobe loJohane umfowabo kaJakobe.

³⁸Bafika-ke endlini yomphathi wesinagoge, wabona isiphithiphithi, labakhalayo labalilayo kakhulu,

³⁹esengenile wathi kubo: Liphithizelelani, likhala? Umntwana omncane kafanga, kodwa ulele.

⁴⁰Basebemhleka usulu. Kodwa yena, esebakhuphile bonke, wathatha uyise womntwana omncane lonina lalabo ababelaye, wangena lapho okwakulele khona umntwana omncane.

⁴¹Wabamba isandla somntwana omncane, wathi kuye: "Thalitha, kumi"; okuyikuthi ngokuphendulelwa: Wena ntombazana encane, ngithi kuwe, vuka.

⁴²Njalo yahle yavuka intombazana encane, yahamba, ngoba yayileminyaka elitshumi lambili; basebesanganiseka ngokusanganiseka okukhulu.

⁴³Wasebalayisisa kakhulu ukuthi lokhu kungaziwa muntu; wathi kayinikwe ukudla.