Read Ndebele-IBhayibhili Elingcwele 2006 Umarkosi 6 Bible Online

Umarkosi 6 - Ndebele-IBhayibhili Elingcwele 2006 bible

Umarkosi 6

¹Wasesuka lapho, waya emzini wakibo; abafundi bakhe basebemlandela.

²Sekufike isabatha, waqala ukufundisa esinagogeni; labanengi aba mu zwayo bamangala, bathi: Zivela ngaphi lezizinto kuye? Njalo yinhlakanipho bani ayinikiweyo, ukuthi lalimisebenzi yamandla enje yenziwe ngezandla zakhe?

³Lo kayisuye umbazi yini, indodana kaMariya, lomfowabo kaJakobe loJose loJudasi loSimoni? Labodadewabo kabakho yini lapha kithi? Basebekhubeka ngaye.

⁴Kodwa uJesu wathi kubo: Umprofethi kasweli ukudunyiswa, ngaphandle kwelizweni lakibo, lezihlotsheni zakhe lendlini yakwabo.

⁵Futhi wayengelakho ukwenza lowodwa umsebenzi wamandla lapho, ngaphandle kokubeka izandla phezu kwabagulayo abalutshwana, wa ba silisa.

⁶Wasemangala ngokungakholwa kwabo. Wabhodabhoda imizana efundisa.

⁷Wasebizela kuye abalitshumi lambili, waqala ukubathuma ngababili, wabanika amandla phezu kwabomoya abangcolileyo.

⁸Wabalaya ukuthi bangaphathi lutho lwendlela, ngaphandle kodondolo kuphela; lasikhwama, lamphako, lamali ezwezweni;

⁹kodwa bafake amanyathela; futhi bangembathi izembatho ezimbili.

¹⁰Wasesithi kubo: Lapho elingena khona endlini, hlalani kiyo lize liphume khona.

¹¹Njalo loba ngobani abangayikulemukela, kumbe balizwe, nxa liphuma lapho, thintithani uthuli olungaphansi kwenyawo zenu kube yibufakazi kubo. Ngiqinisile ngithi kini: Kuzakuba lula eSodoma kumbe laseGomora ngosuku lwesigwebo, kulakulowomuzi.

¹²Sebephumile batshumayela ukuthi baphenduke;

¹³bakhupha amadimoni amanengi, bagcoba abanengi abagulayo ngamagcobo ba ba silisa.

¹⁴Inkosi uHerodi wasesizwa ngakho, ngoba ibizo lakhe laba sobala, wasesithi: UJohane owabhabhathizayo uvukile kwabafileyo, futhi kungakho lamandla esebenza kuye.

¹⁵Abanye bathi: UnguElija; labanye bathi: Ungumprofethi, kumbe u njengomunye wabaprofethi.

¹⁶Kodwa uHerodi esizwa wathi: Lo nguJohane, mina engamquma ikhanda; yena uvukile kwabafileyo.

¹⁷Ngoba yena uHerodi wayethumele wambamba uJohane, wambopha entolongweni, ngenxa kaHerodiyasi umkaFiliphu umfowabo, ngoba wayemthethe.

¹⁸Ngoba uJohane wayethe kuHerodi: Kawuvunyelwa ukuba lomkamfowenu.

¹⁹UHerodiyasi wasembambela inhliziyo, wafuna ukumbulala; kodwa kenelisanga;

²⁰ngoba uHerodi wayemesaba uJohane, esazi ukuthi uyindoda elungileyo lengcwele, wamlondoloza; lalapho emuzwa, wenza izinto ezinengi, wamuzwa ngokuthokoza.

²¹Kwathi selufikile usuku oluhle, uHerodi ngelanga lakhe lokuzalwa wenzela izikhulu zakhe lenduna zenkulungwane labalisa beGalili ukudla kwantambama,

²²kwathi indodakazi kaHerodiyasi lo isingenile yagida, yamkholisa uHerodi lalabo ababehlezi ekudleni laye, inkosi yathi entombini: Cela kimi loba kuyini okuthandayo, njalo ngizakupha;

²³wafunga kuyo esithi: Loba kuyini ongakucela kimi, ngizakunika, kuze kube yingxenye yombuso wami.

²⁴Yasiphuma isithi kunina: Ngizacelani? Yena wasesithi: Ikhanda likaJohane uMbhabhathizi.

²⁵Njalo yahle yangena enkosini ngokuphangisa, yacela, yathi: Ngifuna ukuthi unginike khathesinje emganwini ikhanda likaJohane uMbhabhathizi.

²⁶Inkosi yasidabuka kakhulu, kodwa ngenxa yezifungo langalabo ababehlezi layo ekudleni kayithandanga ukuyilandulela.

²⁷Njalo inkosi yahle yathuma ibutho yalaya ukuthi kulethwe ikhanda lakhe. Wasehamba wamquma ikhanda entolongweni,

²⁸waletha ikhanda lakhe ngomganu, walinika intombi; intombi yasilinika unina.

²⁹Kwathi abafundi bakhe sebezwile beza, bathatha isidumbu sakhe, basibeka engcwabeni.

³⁰Abaphostoli basebebuthana kuJesu, bambikela konke, lababekwenzile kanye lababekufundisile.

³¹Wasesithi kubo: Wozani lina lodwa endaweni eyinkangala, liphumule kancinyane. Ngoba babebanengi abafikayo labahambayo, futhi bengelathuba lokudla.

³²Bakhuphuka ngomkhumbi baya endaweni eyinkangala bebodwa.

³³Amaxuku asebabona besuka, labanengi bamazi, bagijimela khona ndawonye ngenyawo bevela emizini yonke, basebebadlula, bahlangana kuye.

³⁴Kwathi uJesu esephuma wabona ixuku elikhulu, waba lesihelo ngabo, ngoba babenjengezimvu ezingelamelusi; waseqala ukubafundisa izinto ezinengi.

³⁵Kwathi isikhathi sesihambile, abafundi bakhe beza kuye bathi: Lindawo iyinkangala, lesikhathi sesihambile;

³⁶bayekele, ukuze baye ezigabeni ezizingelezeleyo lemizaneni bazithengele izinkwa. Ngoba bengelalutho abangaludla.

³⁷Wasephendula wathi kubo: Banikeni lina ukuthi badle. Basebesithi kuye: Sihambe yini siyethenga izinkwa ngabodenariyo* abangamakhulu amabili, sibaphe badle?

³⁸Wasesithi kubo: Lilezinkwa ezingaki? Hambani liyebona. Sebesazi bathi: Zinhlanu, lenhlanzi ezimbili.

³⁹Wasebalaya ukuthi babahlalise bonke phansi ngezigaba ngezigaba etshanini obuluhlaza.

⁴⁰Basebehlala phansi ngamaviyo ngamaviyo, ngamakhulu langamatshumi amahlanu.

⁴¹Wasethatha izinkwa ezinhlanu lenhlanzi ezimbili, ekhangela phezulu ezulwini, wabonga, wazihlephula izinkwa, wa zi nika abafundi bakhe ukuthi ba zi beke phambi kwabo; lenhlanzi ezimbili wazabela bonke.

⁴²Basebesidla bonke, basutha.

⁴³Basebedobha izitsha ezilitshumi lambili ezagcwala imvuthu ezazisele, l okuseleyo kwenhlanzi.

⁴⁴Lalabo abadlayo izinkwa, babengaba ngamadoda azinkulungwane ezinhlanu.

⁴⁵Njalo wahle wacindezela abafundi bakhe ukuthi bangene emkhunjini, njalo ba m qalele ukuya ngaphetsheya eBethisayida, yena esayekela ixuku lihamba.

⁴⁶Esebavalelisile, wasuka waya entabeni ukuyakhuleka.

⁴⁷Sekuhlwile, umkhumbi wawuphakathi kolwandle, futhi yena wayeyedwa emhlabathini.

⁴⁸Wababona behlupheka kakhulu ekugwedleni, ngoba umoya wawuphambene labo, wasesiza kubo sokungaba yisikhathi somlindo wesine wobusuku, ehamba phezu kolwandle; wasefuna ukubadlula.

⁴⁹Sebembonile ehamba phezu kolwandle, basebecabanga ukuthi lithonga, bakhala kakhulu;

⁵⁰ngoba bambona bonke, bethuka. Kodwa wahle wakhuluma labo, wathi kubo: Manini isibindi; yimi, lingesabi.

⁵¹Wasesenyukela kubo emkhunjini, umoya wasuthula; basebesanganiseka kakhulu okwedlula amalawulo ngaphakathi, bamangala.

⁵²Ngoba babengaqedisisanga ngezinkwa; ngoba inhliziyo yabo yayilukhuni.

⁵³Kwathi sebechaphile bafika elizweni leGenesaretha, babophela umkhumbi ekhunjini.

⁵⁴Bathi sebephumile emkhunjini, bahle bamazi,

⁵⁵bagijimela kuso sonke lesosigaba esizingelezeleyo, baqala ukubhoda bethwala abagulayo ngamathala bebasa lapho abebesizwa ukuthi ukhona.

⁵⁶Njalo loba ngaphi angena khona emizaneni loba emizini, loba emaphandleni, babeka abagulayo emidangeni, bamncenga ukuthi bathinte umphetho wesembatho sakhe nje; njalo bonke abamthintayo basindiswa.