Read Ndebele-IBhayibhili Elingcwele 2006 Umarkosi 7 Bible Online

Umarkosi 7 - Ndebele-IBhayibhili Elingcwele 2006 bible

Umarkosi 7

¹Kwasekubuthana kuye abaFarisi, labanye bababhali, ababevela eJerusalema;

²sebebonile ukuthi abanye babafundi bakhe badla izinkwa ngezandla ezingcolileyo, okuyikuthi ezingagezwanga, basola.

³Ngoba abaFarisi lamaJuda bonke kabadli, ngaphandle kokuthi bagezisise izandla zabo, belondoloza isiko labadala.

⁴Nxa be vela emdangeni, kabadli, ngaphandle kokuthi bageze; futhi zikhona ezinye izinto ezinengi abazemukelayo ukuzilondoloza, ukugezisa inkezo lembiza lezitsha zethusi lemibheda.

⁵Emva kwalokhu abaFarisi lababhali bambuza bathi: Kungani abafundi bakho bengahambi ngesiko labadala, kodwa badla isinkwa ngezandla ezingahlanjwanga?

⁶Kodwa waphendula wathi kubo: UIsaya waprofetha kuhle ngani lina bazenzisi, njengokulotshiweyo ukuthi: Lesisizwe singidumisa ngezindebe, kodwa inhliziyo yabo ikhatshana lami.

⁷Kodwa zingikhonza ngeze, zifundisa izimfundiso eziy imilayo yabantu.

⁸Ngoba liyekela umlayo kaNkulunkulu, ligcine isiko labantu, ukugezisa imbiza lenkezo; lezinye izinto ezinengi ezinjalo liyazenza.

⁹Wasesithi kubo: Liyekela kuhle umlayo kaNkulunkulu, ukuze lilondoloze isiko lenu.

¹⁰Ngoba uMozisi wathi: Hlonipha uyihlo lonyoko; lokuthi: Othuka uyise kumbe unina kumele afe ukufa;

¹¹kodwa lina lithi: Aluba umuntu esithi kuyise kumbe kunina: Lokho obungasizwa yimi ngakho, "liKhobane", okuyikuthi umnikelo kuNkulunkulu;

¹²kalisamvumeli ukwenzela uyise kumbe unina ulutho,

¹³lilenza ize ilizwi likaNkulunkulu ngesiko lenu eliliqhubayo; lezinto ezinengi ezinjalo liyazenza.

¹⁴Esebizile kuye ixuku lonke, wathi kilo: Ngilalelani lonke, liqedisise.

¹⁵Kalukho ulutho olungaphandle komuntu olungamngcolisa lungena kuye; kodwa izinto eziphuma kuye, yizo lezo ezingcolisa umuntu.

¹⁶Uba ekhona olendlebe zokuzwa akezwe.

¹⁷Esengenile endlini evela exukwini, abafundi bakhe bambuza ngomfanekiso.

¹⁸Wasesithi kubo: Ngokunjalo lani lingabangelakuqedisisa yini? Kaliqedisisi yini ukuthi konke okungaphandle okungena emuntwini kungemngcolise?

¹⁹Ngoba kakungeni enhliziyweni yakhe, kodwa esiswini; kuphumela ngaphandle, kuhlambulula ukudla konke.

²⁰Wasesithi: Okuphumayo emuntwini, yikho okungcolisa umuntu.

²¹Ngoba kuphuma ngaphakathi enhliziyweni yabantu imicabango emibi, ukuphinga, ukufeba, ukubulala,

²²ukweba, ubuhwaba, ukuxhwala, inkohliso, amanyala, ilihlo elibi, inhlamba, ukuzigqaja, ubuthutha;

²³zonke lezizinto ezimbi zivela ngaphakathi, zimngcolise umuntu.

²⁴Wasesukuma lapho waya emikhawulweni yeTire leSidoni. Wangena endlini, engathandi ukuthi umuntu akwazi, kodwa wayengelakufihlakala.

²⁵Ngoba owesifazana, olentombazana yakhe elomoya ongcolileyo, esezwile ngaye, weza wawa phansi enyaweni zakhe;

²⁶njalo owesifazana wayengumGriki, engumSirofenike ngokuzalwa; wasemncenga ukuthi akhuphe idimoni endodakazini yakhe.

²⁷Kodwa uJesu wathi kuye: Ake kusuthe abantwana kuqala; ngoba kakukuhle ukuthatha isinkwa sabantwana sisiphosele izinjana.

²⁸Kodwa waphendula wathi kuye: Yebo, Nkosi; kodwa lezinjana ezingaphansi kwetafula ziyadla imvuthuluka yabantwana.

²⁹Wasesithi kuye: Ngenxa yalokhukutsho hamba-ke; idimoni liphumile endodakazini yakho.

³⁰Wasesuka waya endlini yakhe, wafica idimoni seliphumile, lendodakazi ilele embhedeni.

³¹Wasebuya wasuka emikhawulweni yeTire leSidoni, weza elwandle lweGalili, phakathi kwemikhawulo yeDikapolisi.

³²Basebeletha kuye isacuthe esigagasayo, bamncenga ukuthi abeke isandla sakhe phezu kwaso.

³³Wasesikhupha exukwini saba sodwa, wafaka iminwe yakhe endlebeni zaso, wakhafula wathinta ulimi lwaso,

³⁴ekhangela phezulu ezulwini, wabubula, wathi kuso: "Efatha"; okuyikuthi: Vulwa !

³⁵Njalo zahle zavulwa indlebe zaso; yasithukululwa intambo yolimi lwaso, sasesikhuluma saqonda.

³⁶Wasebalaya ukuthi bangatsheli muntu; kodwa lanxa wayebalayile kakhulu, kwang’khona bekumemezela ngamandla.

³⁷Basebemangala kakhulukazi sibili, bathi: Uzenzile kuhle izinto zonke; wenza kokubili izacuthe ukuthi zizwe, lezimungulu ukuthi zikhulume.