Read Ndebele-IBhayibhili Elingcwele 2006 Umarkosi 8 Bible Online

Umarkosi 8 - Ndebele-IBhayibhili Elingcwele 2006 bible

Umarkosi 8

¹Ngalezonsuku kwakukhona ixuku elikhulu kakhulu, njalo lalingelakho okokudla, uJesu wabizela kuye abafundi bakhe wathi kubo:

²Ngilesihelo ngexuku; ngoba sebehlezi lami insuku ezintathu, bengelalutho lokudla;

³njalo uba ngibayekela baye emakhaya abo bengadlanga, bazayatha endleleni; ngoba abanye babo bavela khatshana.

⁴Abafundi bakhe basebemphendula bathi: Zingavela ngaphi izinkwa umuntu angasuthisa ngazo laba lapha enkangala?

⁵Wasebabuza wathi: Lilezinkwa ezingaki? Basebesithi: Eziyisikhombisa.

⁶Waselaya ixuku ukuthi lihlale phansi emhlabathini; wasethatha izinkwa eziyisikhombisa, esebongile wa zi hlephula wa zi nika abafundi bakhe, ukuthi babeke phambi kwabo; basebebeka phambi kwexuku.

⁷Njalo babelenhlanzana ezinlutshwana; esebusisile wathi bazibeke lazo phambi kwabo.

⁸Basebesidla, basutha; basebedobha imvuthu ezazisele, izitsha eziyisikhombisa.

⁹Labasebedlile babengaba zinkulungwane ezine; wasebayekela bahamba.

¹⁰Njalo wahle wangena emkhunjini labafundi bakhe, weza kungxenye zeDalmanutha.

¹¹AbaFarisi basebephuma, baqala ukuphikisana laye, befunisisa kuye isibonakaliso esivela ezulwini, bemlinga.

¹²Wasebubula kakhulu emoyeni wakhe wathi: Lesisizukulwana sidingelani isibonakaliso? Ngiqinisile ngithi kini: Qiniso akulasibonakaliso esizanikwa kulesisizukulwana.

¹³Wasebatshiya, wangena emkhunjini futhi, wasuka waya ngaphetsheya.

¹⁴Njalo abafundi babekhohliwe ukuthatha izinkwa, bengelalutho emkhunjini ngaphandle kwesinkwa esisodwa.

¹⁵Wasebalaya, wathi: Nanzelelani, liqaphele imvubelo yabaFarisi lemvubelo kaHerodi.

¹⁶Basebezindlisana, besithi: Ngoba kasilazinkwa.

¹⁷UJesu esekwazi wathi kubo: Kungani likhulumisana ngokuthi kalilazinkwa? Kalikaboni, njalo kaliqedisisi yini? Lokhe lilenhliziyo ezilukhuni yini?

¹⁸Lilamehlo kaliboni yini? Futhi lilendlebe kalizwa yini? Njalo kalikhumbuli yini?

¹⁹Mhla ngahlephulela abazinkulungwane ezinhlanu izinkwa ezinhlanu, ladobha izitsha ezingaki ezigcwele imvuthu? Bathi kuye: Ezilitshumi lambili.

²⁰Njalo mhla ziyisikhombisa kwabazinkulungwane ezine, ladobha izitsha ezingaki ezigcwele imvuthu? Basebesithi: Eziyisikhombisa.

²¹Wasesithi kubo: Yinindaba lingaqedisisi?

²²Wasefika eBethisayida. Basebeletha kuye isiphofu, bamncenga ukuthi asithinte.

²³Wasesibamba isiphofu ngesandla, wasikhuphela ngaphandle komzana; esekhafulele emehlweni aso, wabeka izandla zakhe phezu kwaso, wasibuza ukuthi ngabe sibona ulutho.

²⁴Sasesikhangela phezulu sathi: Ngibona abantu behambahamba kungathi yizihlahla.

²⁵Emva kwalokhu wabuya wabeka izandla zakhe phezu kwamehlo aso, wasenza sakhangela phezulu; sasesisiliswa, sabona bonke ngokucacileyo.

²⁶Wasesithuma endlini yaso, wathi: Ungangeni emzaneni, njalo ungatsheli muntu loyedwa emzaneni.

²⁷UJesu wasephuma labafundi bakhe baya emizaneni yeKesariya yeFiliphu; besendleleni wababuza abafundi bakhe, wathi kubo: Abantu bathi ngingubani?

²⁸Basebephendula bathi: UJohane uMbhabhathizi; labanye: UElija; labanye: Omunye wabaprofethi.

²⁹Yena wasesithi kubo: Lina-ke lithi ngingubani? UPetro wasephendula wathi kuye: Wena unguKristu.

³⁰Wasebalayisisa ukuthi bangatsheli muntu ngaye.

³¹Waseqala ukubafundisa, ukuthi iNdodana yomuntu imele ukuhlupheka izinto ezinengi, ilahlwe ngabadala labapristi abakhulu lababhali, ibulawe, ibuye ivuke emva kwensuku ezintathu.

³²Waselikhuluma lelilizwi obala. UPetro wasemthatha waqala ukumkhuza.

³³Kodwa etshibilika, wabona abafundi bakhe, wamkhuza uPetro, wathi: Suka ngemva kwami, Sathane; ngoba kawucabangi ngezinto zikaNkulunkulu, kodwa ngezabantu.

³⁴Kwathi esebizele kuye ixuku kanye labafundi bakhe, wathi kubo: Uba umuntu ethanda ukuza ngemva kwami, kazidele, athathe isiphambano sakhe, angilandele.

³⁵Ngoba loba ngubani othanda ukusindisa impilo yakhe, izamlahlekela; kodwa loba ngubani olahlekelwa yimpilo yakhe ngenxa yami levangeli, yena uzayisindisa.

³⁶Ngoba kuzamsizani umuntu, nxa ezuza umhlaba wonke, kodwa alahlekelwe ngumphefumulo wakhe?

³⁷Kumbe umuntu uzanikani kube lihlawulo lomphefumulo wakhe?

³⁸Ngoba loba ngubani olenhloni ngami langamazwi ami kulesisizukulwana esifebayo lesonakeleyo, iNdodana yomuntu layo izakuba lenhloni ngaye, nxa isiza enkazimulweni kaYise kanye lengilosi ezingcwele.