Read Ndebele-IBhayibhili Elingcwele 2006 Umarkosi 9 Bible Online

Umarkosi 9 - Ndebele-IBhayibhili Elingcwele 2006 bible

Umarkosi 9

¹Wasesithi kubo: Ngiqinisile ngithi kini: Bakhona abanye kwabemiyo lapha, abangasoze bezwe ukufa, baze babone umbuso kaNkulunkulu usufikile ngamandla.

²Emva kwensuku eziyisithupha uJesu wasethatha uPetro loJakobe loJohane, wasebakhuphulela entabeni ende ebehlukanisa bodwa; waseguqulwa isimo phambi kwabo;

³lezembatho zakhe zacwazimula, zaba mhlophe nke njengeliqhwa elikhithikayo, kakulamcoli welembu emhlabeni ongazenza zibe mhlophe kangako.

⁴Kwasekubonakala kubo uElija eloMozisi, njalo bekhuluma loJesu.

⁵UPetro wasephendula wathi kuJesu: Rabi*, kuhle ukuthi sibe lapha; futhi asakhe amadumba amathathu, elinye ngelakho, lelinye ngelikaMozisi, lelinye ngelikaElija.

⁶Ngoba wayengakwazi angakutsho; ngoba babesesaba kakhulu.

⁷Kwasekufika iyezi labasibekela; kwaba lelizwi elivela eyezini, lisithi: Lo uyiNdodana yami ethandekayo; zwanini yona.

⁸Njalo bahle bathalaza, kababe besabona muntu, kodwa uJesu yedwa elabo.

⁹Kwathi besehla entabeni, wabalaya ukuthi bangatsheli muntu izinto abazibonileyo, ize ivuke kwabafileyo iNdodana yomuntu.

¹⁰Njalo bazigcinela lelilizwi, bebuzana ukuthi kutshoni ukuvuka kwabafileyo.

¹¹Basebembuza, besithi: Batsholoni ababhali ukuthi uElija ufanele ukufika kuqala?

¹²Wasephendula, wathi kubo: UElija ufika kuqala isibili, abuyisele zonke izinto; njalo kubhalwe njani ngeNdodana yomuntu, ukuthi imele ihlupheke izinto ezinengi njalo idelelwe.

¹³Kodwa ngitsho kini ukuthi uElija laye sewafika, basebesenza kuye konke abakuthandayo, njengokulotshiweyo ngaye.

¹⁴Kwathi efika kubafundi, wabona ixuku elikhulu libahanqile, lababhali bephikisana labo.

¹⁵Lahle lathi ukumbona ixuku lonke laselimangala, lagijimela ku ye lambingelela.

¹⁶Wasebabuza ababhali wathi: Liphikisana ngani labo?

¹⁷Omunye wexuku wasephendula wathi: Mfundisi, ngilethe kuwe indodana yami, elomoya oyisimungulu;

¹⁸kuthi loba ngaphi oyibamba khona, uyidabule; ikhihlize amagwebu, igedle amazinyo ayo, yome qha; njalo ngikhulume labafundi bakho ukuthi bawukhuphe, kodwa behluleka.

¹⁹Wasemphendula wathi: O sizukulwana esingelakholo, koze kube nini ngilani? Koze kube nini ngilibekezelela? Iletheni kimi.

²⁰Basebeyiletha kuye; kwathi umbona, umoya wahle wayihlukuza; yawela emhlabathini, yazigiqagiqa ikhihliza amagwebu.

²¹Wasebuza uyise wathi: Kulesikhathi esingakanani, lokhu kwenzeka kiyo? Wasesithi: Kusukela ebuntwaneni.

²²Futhi uyiphosele kanengi emlilweni lemanzini, ukuze uyibhubhise; kodwa nxa kukhona ongakwenza, sihawukele, usisize.

²³UJesu wasesithi kuye: Nxa usenelisa ukukholwa, zonke izinto ziyenzeka kokholwayo.

²⁴Njalo uyise womntwana wahle wamemeza ngezinyembezi wathi: Ngiyakholwa, Nkosi, siza ukungakholwa kwami.

²⁵Kwathi uJesu esebona ukuthi ixuku ligijima kanyekanye ndawonye, wakhuza umoya ongcolileyo, esithi kuwo: Wena moya oyisimungulu loyisacuthe, mina ngiyakulaya: Phuma kuye, ungabe usangena kuye.

²⁶Usumemezile, wayihlukuza kakhulu, waphuma; yasisiba njengofileyo, kwaze kwathi abanengi bathi isifile.

²⁷Kodwa uJesu wayibamba ngesandla, wayiphakamisa; yasisukuma.

²⁸Wathi esengenile endlini, abafundi bakhe bambuza bebodwa bathi: Kungani thina sehlulekile ukuwukhupha?

²⁹Wasesithi kubo: Loluhlobo lungeke luphume ngalutho, ngaphandle komkhuleko lokuzila ukudla.

³⁰Basebesuka lapho badabula eGalili; wayengathandi ukuthi loba ngubani akwazi,

³¹ngoba wayefundisa abafundi bakhe, esithi kubo: INdodana yomuntu izanikelwa ezandleni zabantu, njalo bazayibulala; isibulewe izavuka ngosuku lwesithathu.

³²Kodwa kabaqedisisanga lumutsho, besaba ukumbuza.

³³Wasefika eKapenawume. Kwathi esendlini wababuza wathi: Beliphikisana ngani endleleni?

³⁴Kodwa bathula; ngoba endleleni babephikisene ngokuthi ngubani omkhulu.

³⁵Wasehlala phansi wabiza abalitshumi lambili, wathi kubo: Uba umuntu ethanda ukuba ngowokuqala, uzakuba ngowokucina kubo bonke, lesisebenzi sabo bonke.

³⁶Wasethatha umntwana omncane, wammisa phakathi kwabo; wamgona, wathi kubo:

³⁷Loba ngubani owemukela omunye wabantwana abancane abanje ebizweni lami, wemukela mina; njalo loba ngubani owemukela mina, kemukeli mina, kodwa yena ongithumileyo.

³⁸UJohane wasemphendula, wathi: Mfundisi, sabona omunye ongasilandeliyo ekhupha amadimoni ngebizo lakho; sasesimenqabela, ngoba engasilandeli.

³⁹Kodwa uJesu wathi: Lingamenqabeli; ngoba kakho owenza umsebenzi wamandla ebizweni lami, njalo olamandla okukhuluma kubi ngami masinyane;

⁴⁰ngoba ongamelani lathi, ungowethu.

⁴¹Ngoba loba ngubani ozalinathisa inkezo yamanzi ngebizo lami, ngoba lingabakaKristu, ngiqinisile ngithi kini: Kasoze alahlekelwa ngumvuzo wakhe.

⁴²Futhi loba ngubani okhubekisa omunye walaba abancinyane abakholwa kimi, kungcono kuye ukuthi ilitshe lokuchola ligaxwe entanyeni yakhe, abesephoselwa olwandle.

⁴³Njalo uba isandla sakho sikukhubekisa, siqume; kungcono kuwe ukungena ekuphileni uyingini, kulokuthi ulezandla ezimbili usuke uye esihogweni, emlilweni ongacitshekiyo,

⁴⁴lapho impethu yabo engafi khona, lomlilo ongacitshi khona.

⁴⁵Njalo uba unyawo lwakho lukukhubekisa, luqume; kungcono kuwe ukungena ekuphileni uyisiqhwala, kulokuthi ulenyawo ezimbili uphoselwe esihogweni, emlilweni ongacitshekiyo,

⁴⁶lapho impethu yabo engafi khona, lomlilo ongacitshi khona.

⁴⁷Njalo uba ilihlo lakho likukhubekisa, likhuphe; kungcono kuwe ukungena embusweni kaNkulunkulu ulelihlo elilodwa, kulokuthi ulamehlo amabili uphoselwe esihogweni somlilo,

⁴⁸lapho impethu yabo engafi khona, lomlilo ongacitshi khona.

⁴⁹Ngoba wonke uzatswaywa ngomlilo; njalo wonke umhlatshelo uzatswaywa ngetswayi.

⁵⁰Itswayi lihle; kodwa uba itswayi lingelabutswayi, lizalivuselela ngani? Banini letswayi phakathi kwenu, njalo lihlalisane ngokuthula.